وڭتۇستىك ءوڭىردىڭ تۇرعىندارى ءۇشىن قالىڭ قار دەگەنىڭىز ەكزوتيكا سەكىلدى. افريكانى اق ۇلپا باسقانداي جەرگىلىكتى حالىق تا بۇل كۇنى بالالارىمەن سەرۋەنگە شىقتى. قالىڭ قار – تارازدىق بالدىرعاندار ءۇشىن تاماشا تارتۋ. اققالا سوققان بالالاردىڭ جۇزىندەگى شاتتىق تابى الىستان بايقالادى.
باسقالار قۋانىپ جاتقاندا قالىڭ قارمەن «مىلتىقسىز مايدانعا» شىققان قىزمەتكەرلەر ماڭدايدان شۇمەكتەپ تەر توگىپ, كولىك قوزعالىسىندا ماسەلە تۋىنداماۋى ءۇشىن ايانباي ەڭبەك ەتتى. قىسقاسى, جەدەل ىسكە كىرىسكەن قالا اكىمدىگى جاۋاپتى قىزمەتكەرلەردىڭ الا تاڭنان قاس قارايعانعا دەيىن توننالاپ قار شىعارۋىن قاتاڭ باقىلاۋدا ۇستادى.
قالا تازالىعىنا جاۋاپتى «جاسىل ەل-تاراز» مەكەمەسى وبلىس ورتالىعىنداعى اۆتوكولىك جانە جاياۋ جۇرگىنشىلەر جولىن ءسات سايىن تازارتىپ جاتىر. جالقى ماقسات – كولىك قوزعالىسىندا قار كەدەرگى بولماۋى كەرەك.
قالا بيلىگى كەلتىرگەن دەرەكتەرگە سۇيەنسەك, كونە شاھاردى قار قۇرساۋىنان ارشىپ الۋعا قابىلەتتى 47 تەحنيكا بار. ونىڭ 20-سى قار كۇرەۋگە ارنالعان اۆتوكولىك بولسا, 13-ءى تۇز ارالاس قۇم شاشاتىن جانە 7 قار كۇرەۋگە ارنالعان اۆتوتەحنيكا. سونداي-اق 2 اۆتوگرەيدەر, 7 جاياۋ جۇرگىنشىلەر جولىن تازالايتىن مك-320, 2 متز-82 تەحنيكاسى, 3 قۇم, قار تيەگىش تەحنيكا جانە كەلىسىمشارت بويىنشا جالعا الىنعان 1 تەحنيكا, 1 زيل-130, 2 گاز-53 جۇك كولىكتەرى, 4 متز-82 تىركەمەسى, 5 بىرلىك «كاماز» تاۋلىك بويى تىنىمسىز جۇمىس ىستەدى.
سالاعا جاۋاپتى مامانداردىڭ ايتۋىنشا, كاسىپورىن قورىندا 295 توننا تۇز بار. ودان بولەك 7 مىڭ تەكشە مەتر قۇم جانە 1 مىڭ توننا تۇز جەتكىزىلگەن. قار تازالاۋ جۇمىستارىنا قىزۋ كىرىسكەن بريگادالار تاۋلىك بويى اۋىسىممەن جۇمىس ىستەۋگە ءازىر. مەكەمەدەگى ديسپەتچەرلىك قىزمەت بارلىق جۇمىستى نازاردان تىس قالدىرمايدى. جالپى, قالا بويىنشا 450 تەكشە مەتر قار شىعارىلعان.
وڭىردەگى وبلىستىق ماڭىزى بار اۆتوموبيل جولدارىن قار قۇرساۋىنان تازارتۋ, كۇتىپ ۇستاۋ ءۇشىن جالپى 104,8 ملن تەڭگە قاراستىرىلعان. جۇمىستاردى جۇيەلى تۇردە جۇرگىزۋ ءۇشىن 13 مەردىگەر جۇمىلدىرىلعان. مەردىگەرلەر ناۋقاندىق جۇمىسقا 141 بىرلىك جول تەحنيكاسى مەن جابدىقتارىن, 2 800 توننا قۇم, 280 توننا تۇز ازىرلەگەن.
مامانداردىڭ ايتۋىنا قاراعاندا, 9-10 قاڭتار كۇندەرى وبلىستىڭ بارلىق اۋماعىندا قاردىڭ قالىڭ تۇسۋىنە بايلانىستى وبلىستىق ماڭىزى بار 1 700 شاقىرىم جولدى تازارتۋ جۇمىستارى جۇرگىزىلىپ, وعان 130-دان استام ارنايى تەحنيكا جۇمىلدىرىلعان جانە 900 توننا تايعاققا قارسى ماتەريالدار سەبىلگەن.
جامبىل وبلىسى
