اسىرەسە, قاردى تاڭسىق كورەتىن ماقتالى ايماق تۇرعىندارى قويان جىلىنىڭ قاڭتارىن ۇمىتا قويماس. ولاي دەيتىنىمىز, ماقتاارال اۋدانىنىڭ تۇرعىندارى مۇنداي قاردى سوڭعى رەت 1995 جىلدارى كورگەنىن ايتۋدا. اپتا باسىندا دا اۋداندا اۋا-رايى كۇرت سۋىتىپ, توقتاۋسىز قار جاۋدى. وسى ورايدا ماقتاارالدىق جاستار كوپكە ۇلگى بولىپ, جالعىزىلىكتى قارتتاردىڭ ۇيلەرىنە بارىپ, اۋلالارىن قاردان تازارتۋعا كومەكتەستى. اۋداندىق «جاستار رەسۋرستىق ورتالىعى» كمم-ءنىڭ باستاماسىمەن ۇيىمداستىرىلعان قايىرىمدىلىق ءىس-شاراسىنا 2 كەنت پەن 9 اۋىلدىق وكرۋگتەن 100-دەن استام ەرىكتى جاستار قاتىسقان. جالعىزىلىكتى قارتتاردىڭ ءتىزىمىن اۋداننىڭ جۇمىسپەن قامتۋ جانە الەۋمەتتىك باعدارلامالار ءبولىمى جاساقتاپ بەرگەن. سونداي-اق ماقتاارالدىق جاستار قار تازالاۋعا جۇمىلدىرىلعان جۇمىسشىلارعا شاي, كوفە, ءبالىش, قۇيماق, سامسا جانە تاتتىلەر ۇلەستىردى. قار كۇرەۋ جۇمىستارىنا كومەك كورسەتتى.
تۇركىستان وبلىسىنىڭ بارلىق اۋماعىندا دەرلىك قار قالىڭ ءتۇستى. اۋا-رايىنىڭ كۇرت وزگەرۋىنەن تاۋلى ايماقتاردا جەلدىڭ ەكپىنى سەكۋندىنا 30 مەتردەن اسىپ, تاۋلى اۋداندارداعى رەسپۋبليكالىق ماڭىزى بار جولدار جابىلىپ, بىرقاتار ەلدى مەكەندە ەلەكتر جەلىلەرى ىستەن شىققان بولاتىن. رەسپۋبليكالىق ماڭىزى بار اۆتوموبيل جولدارىن قاردان تازالاۋ جۇمىستارى توقتاۋسىز جۇرگىزىلۋدە. وعان ارنايى تەحنيكالار تارتىلعان. اتاپ ايتقاندا, 33 جول تازالايتىن كولىك, 7 اۆتوگرەيدەر, 18 تراكتور جۇمىلدىرىلعان. ال جەتىساي قالاسى مەن اۋدان اۋماعىن قالىڭ قاردان تازالاۋ جۇمىستارىنا 15-كە تارتا ءتۇرلى تەحنيكا مەن 130 ادام جۇمىلدىرىلعان. سونداي-اق وڭىردە قاتتى جەلدەن قۇلاعان ەلەكتر باعانالارى قالپىنا كەلتىرىلىپ, ۇزىلگەن ەلەكتر تاسىمالداۋ جەلىلەرى جوندەلۋدە. سوڭعى اقپاراتتارعا سايكەس, بايدىبەك پەن سوزاق اۋداندارىندا 15 ەلەكتر باعاناسى قالپىنا كەلتىرىلدى. ەكى اۋدانعا «وڭتۇستىكجارىق» مەكەمەسىنىڭ جوندەۋ بريگادالارى جۇمىلدىرىلىپ, 3,5 مىڭنان استام ابونەنتتىڭ 2 مىڭعا جۋىعىنا جارىق بەرىلدى, 27 ارنايى بريگادا مەن 30-دان استام ارنايى تەحنيكا جۇمىس ىستەۋدە. سالا باسشىلارى ۇزىلگەن ەلەكتر جەلىلەرىن جالعاۋ جۇمىستارى بىرنەشە كۇنگە جالعاساتىنىن جەتكىزدى. وبلىس اكىمى دارحان ساتىبالدى بايدىبەك اۋدانىنا ارنايى بارىپ, بوران مەن جەلدىڭ سالدارىنان بولعان جاعدايدىڭ زارداپتارىن جويۋ جۇمىستارىمەن تانىستى. جاۋاپتى باسشىلارعا, ماماندارعا جولداردى قاردان تازالاپ, ەلدى مەكەندەردەگى ەلەكتر جەلىلەرىن جوندەۋ جۇمىستارىن جەدەلدەتۋدى تاپسىردى. تۇرعىندارمەن كەزدەسىپ, قالپىنا كەلتىرۋ جۇمىستارى جونىندە باياندادى. قاتتى جەل مەن قارلى بوراننىڭ سالدارىنان سوزاق, وتىرار, قازىعۇرت, ساۋران, بايدىبەك اۋداندارىندا ەلەكتر جەلىلەرى ۇزىلگەن بولاتىن. بىرقاتار ايماقتا ول قالپىنا كەلتىرىلدى, جۇمىس ءالى دە جالعاسۋدا. بۇل باعىتتاعى جۇمىستارعا «وڭتۇستىكجارىقترانزيت» جشس تاراپىنان 37 بريگادا, 41 تەحنيكا تارتىلعان.
تۇركىستان وبلىسى
