وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, بىلتىر اتىراۋ وڭىرىنە كەلىپ جۇمىس ىستەۋگە 9 پەداگوگ نيەت بىلدىرگەن. جاقىندا ەلىمىزدىڭ ءار وڭىرىنەن كەلگەن مۇعالىمدەردىڭ بەسەۋىنە پاتەر بەرىلدى. ولاردىڭ اراسىندا باتىس قازاقستان وبلىسىنان تاريح ءپانىنىڭ مۇعالىمى ايناگۇل ەرەجەپوۆا, فيزيكا ءپانىنىڭ مۇعالىمى ۆالەنتين كوزلوۆ, شىعىس قازاقستان وبلىسىنان تاريح ءپانىنىڭ مۇعالىمى سىمبات قابىشەۆا, اقتوبە وبلىسىنان قايسار نۇرتانوۆ, باستاۋىش سىنىپ مۇعالىمى گۇلۇزىم امانگەلدى بار. مۇعالىمدەردىڭ الاڭسىز جۇمىس ىستەۋىنە بارلىق جاعداي جاسالعان. ولارعا ارنايى باعدارلاماعا سايكەس لاۋازىمدىق جالاقىسىنا 150 پايىز مولشەرىندەگى قوسىمشا ىنتالاندىرۋ اقىسى تولەنىپ وتىر.
ماسەلەن, ۆالەنتين كوزلوۆ اتىراۋ قالاسىنداعى ج.قاراجىگىتوۆ اتىنداعى №16 مەكتەپ-ليتسەيىنە جۇمىسقا ورنالاسقان. بۇل – مۇنايلى شاھارداعى ارالاس مەكتەپتىڭ ءبىرى.
– ءبىز مۇعالىم ماماندىعىن تاڭداعاندىقتان, سانالى, ءبىلىمدى ۇرپاق تاربيەلەۋدى ماقسات ەتتىك. شاكىرتتەرىمىز ۇزدىك وقۋىمەن تانىلىپ, ءتۇرلى سايىستاردان جۇلدەلى ورىنداردى يەلەنسە, ءبىز ءۇشىن ۇلكەن مارتەبە بولار ەدى. اتىراۋعا وسىنداي ويمەن كەلگەن ەدىك. بىزگە جەرگىلىكتى باسشىلار تاراپىنان باسپانا بەرىلىپ, ۇلكەن قولداۋ كورسەتىلىپ وتىر, – دەيدى ۆالەنتين كوزلوۆ.
اتىراۋ وبلىسى
