كەڭەس توراعاسى, ءماجىلىس دەپۋتاتى امانجول ءالتاي باستاعان قايراتكەرلەر ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مادەنيەت سارايىنداعى «بابادان قالعان مۇرالار» اتتى كورمەنى ارالادى. كوشپەلى وتىرىسقا وڭىرلىك كەڭەستىڭ مۇشەلەرى, وبلىستىڭ زيالى قاۋىم جانە مادەنيەت وكىلدەرى, ەتنومادەني بىرلەستىكتەردىڭ توراعالارى, بەلگىلى پروفەسسورلار, ۇەۇ مۇشەلەرى قاتىستى. سونىمەن قاتار كورشىلەس وزبەكستاننان ارنايى قوناقتار كەلدى.
كۇن تارتىبىندە ەكى ماسەلە قارالدى. ءبىرىنشىسى, پارتيانىڭ سايلاۋالدى باعدارلاماسىنداعى مادەني جانە زياتكەرلىك قوعام, ءبىرتۇتاس, ۇيىمشىل ۇلت جانە ازاماتتىق قوعامدى دامىتۋ ماسەلەلەرى بويىنشا تارماقتاردىڭ تۇركىستان وبلىسىندا جۇزەگە اسىرىلۋى بولسا, ەكىنشىسى تۇركى حالىقتارىنىڭ مادەني-رۋحاني ىقپالداستىعى تۋرالى ويلار ورتاعا سالىندى.
العاشقى ءسوز ساياسي ۇيىمنىڭ ايماقتىق فيليالىنىڭ توراعاسى التىنسارى ۇمبەتاليەۆكە بەرىلدى. ول وزەكتى تاقىرىپتاردى قوزعايتىن جانە ۇلى باستامالارعا ۇيىتقى بولىپ وتىرعان كەڭەس جۇمىسىنا ساتتىلىك تىلەدى. سودان كەيىن وبلىستىق مادەنيەت باسقارماسىنىڭ باسشىسى ءازىمحان قويلىباەۆ جول كارتاسى تارماقتارىنىڭ 2022 جىلى ورىندالۋى بويىنشا اتقارىلعان جۇمىستاردى باياندادى. ونىڭ ايتۋىنشا, باعدارلاما اياسىندا سوڭعى ەكى جىلدا 8 مادەني نىسان سالىنىپ, پايدالانۋعا بەرىلگەن. توزىعى جەتكەن 14 مادەنيەت نىسانعا جوندەۋ جۇمىستارى جۇرگىزىلىپ, قازىرگى تاڭدا قولدانىستا. بۇل جۇمىستار اۋىلدى جەرلەردە جالعاسىن تابادى. ال وڭىرلىك قوعامدىق كەڭەستىڭ توراعاسى قاليما جانتورەەۆا بىلتىرعى ناتيجەلەرىمەن ءبولىستى.
«جۇمىس جوسپارعا سايكەس وبلىستىق كەڭەستىڭ 4 وتىرىسى وتكىزىلدى. جالپى ەسەپتى مەرزىمدە قوعامدىق كەڭەس تاراپىنان مەملەكەتتىك مەكەمەلەرمەن باسقا دا ۇيىمدارعا 41 ۇسىنىس بەرىلىپ, ونىڭ 90%-ى ورىندالدى. دەپۋتاتتىق ساۋال جولداۋىمنىڭ ناتيجەسىندە شاردارا اۋدانىندا «Qazaq radiosy» مەن «شالقار» راديوسىنىڭ, جەتىساي مەن ماقتاارال اۋداندارىندا «Qazaq radiosy» جيىلىگىن تاراتاتىن راديوقوندىرعى ورناتىلدى», دەدى ق.جانتورەەۆا.
وتىرىس بارىسىندا كەڭەس مۇشەلەرىنىڭ ۇسىنىس-پىكىرلەرى تىڭدالدى. بەكجىگىت سەردالى كومپوزيتورلاردىڭ اۆتورلىق قۇقىعى قورعالىپ, شىعارماشىل تۇلعالارعا مەملەكەتتىك ستيپەنديا نەمەسە گرانت قاراستىرۋ تۋرالى ويىن ايتتى. ال تەلمان بەيسەن وڭىردەگى تاريحي-مادەني مۇرالار, جادىگەرلەر, ەسكەرتكىشتەر مەن كيەلى ورىنداردى مەملەكەتتىك قورعاۋ تىزىمىنە الۋعا ىقپال جاسايتىنداي كوميسسيا قۇرىلسا دەگەن تىلەگىن جەتكىزدى. اباي بالاجان كىتاپ وقۋ مادەنيەتىن قالىپتاستىرۋ, بالالاردىڭ ىنتاسىن وياتۋ ءۇشىن شارالار قابىلدانۋ كەرەكتىگىن العا تارتتى.
تۇركىستان مۋزىكالىق دراما تەاترىنىڭ ديرەكتورى ءالىمحان مىرزاحان دا جارىسسوزدە وي الماستى. قولداۋلاردىڭ اياسىندا 2022 جىلى «بورتە» قويىلىمى بويىنشا ونەر سالاسىنداعى تۇڭعىش «Umai» ۇلتتىق سىيلىعىنىڭ جەڭىمپازى اتانعانىن ەرەكشە اتاپ ءوتتى. دەگەنمەن ول مەملەكەتتىك ساتىلىمنىڭ تەاترلارعا قويىلىم قويۋعا ءبىر شاما كەدەرگى جاساپ جاتقاندىعىنا نازار سالۋدى سۇرادى.
اتالعان ءبىلىم ورداسىنىڭ رەكتورى, كەڭەس مۇشەسى جانار تەمىربەكوۆا تۇركى حالىقتارىنىڭ رۋحاني-مادەني ىقپالداستىعىن ارتتىرۋعا بايلانىستى جۇزەگە اسقان ىستەر مەن جوبالار تۋرالى بايانداپ ءوتتى. ۋنيۆەرسيتەتتىڭ تۇركولوگيا-عىلىمي زەرتتەۋ ينستيتۋتىنىڭ ديرەكتورى بۋلەنت بايرام جويىلۋى مۇمكىن تۇركى تىلدەرى بويىنشا جۇرگىزىلگەن زەرتتەۋلەرگە توقتالدى.
وزبەك ەلىنىڭ بەلگىلى حورەوگرافى, فيلولوگيا عىلىمدارىنىڭ دوكتورى حۋلكار حامراەۆا: «ادىلەتتى قازاقستان – 130 ۇلت پەن ۇلىستى باۋىرىنا باسىپ, ونىڭ ىشىندە وزبەك ازاماتتارىنا كورسەتىلىپ جاتقان قولداۋ دەگەن ۇعىمعا سايادى» دەدى. رۋحاني-مادەني قارىم-قاتىناستى نىعايتۋدا «Amanat» پارتياسىنا ارقا سۇيەيتىنىن ءبىلدىرىپ, سىي-سياپاتىن تارتۋ ەتتى.
امانجول دۇيسەنباي ۇلى كوشپەلى وتىرىستىڭ رۋحاني شاھاردا وتكىزىلۋىنىڭ ماڭىزىنا ەرەكشە ءمان بەردى. «تۇركىستان – دالا دانىشپاندارىنىڭ ءىزى قالعان, تۇركى جۇرتىنىڭ قۇتى قونعان, عىلىمىمىز, ءبىلىمىمىز جانە مادەنيەتىمىزدىڭ قاستەرلى قاراشاڭىراعى ءارى ساياسي ورتالىعى. زيالى قاۋىم وكىلدەرىنىڭ ايشىقتى ويلارىن تىڭدادىق. پروبلەمالار اشىق ايتىلدى. ءبىز جيناقتاپ, ورتالىق دەڭگەيدە شەشۋگە ۇلەسىمىزدى قوسامىز. كەڭەستىڭ باستى ماقساتى دا وسىندا. ۇسىنىستارىڭىزدى الداعى ۋاقىتتا كوتەرەمىن. ءوڭىردى ءارى قاراي دامىتۋعا كۇش سالۋ ءبارىمىزدىڭ ورتاق مىندەتىمىز», دەدى ا.ءالتاي.
