الماتىنىڭ «دارحان» شاعىن اۋدانىندا ازاماتتىق نەكەدەگى ايەلىن دۇكەنمەن بىرگە ورتەپ جىبەرمەك بولعان ەر ادام وقيعا ورنىندا كوز جۇمدى. ايەلدى اجالدان اراشالاپ قالعان تاكسي جۇرگىزۋشىسى باۋىرجان اۋەلبەكوۆ سول ماڭنان ءوتىپ بارا جاتىپ دۇكەنگە كىرگەن.
«دۇكەندە تۇرعانىمدا ءبىر ادام كىرىپ كەلىپ دەرەۋ سىرتقا شىعۋىمدى تالاپ ەتتى. باسىندا تۇك تۇسىنبەي ابدىراپ قالدىم. قالتاسىنان تاپانشا شىعارىپ ماعان كەزەدى, ساسقانىمنان دالاعا اتىپ شىقتىم. مەن شىعا سالا دۇكەن ەسىگى ىشىنەن بەكىتىلىپ, ايعايلاعان داۋىستار ەستىلدى. نە ىستەرىمدى بىلمەي دۇكەن جانىنداعى دارىحاناشىعا باردىم. پوليتسيا شاقىردىق», دەيدى باۋىرجان اۋەلبەكوۆ.
قولىنا بەنزين تولتىرىلعان كانيستر الا كىرگەن ەر ادام سۇيىقتىقتى دۇكەن ىشىنە شاشىپ ءورت قويعان. سالدارىنان قاتتى جارىلىس بولىپ تەرەزەدەگى تەمىر قورشاۋلار كوشەنىڭ قارسى بەتىنە دەيىن ۇشقان. كۋاگەرلەردىڭ ايتۋىنشا جارىلىس كەزىندەگى قىسىمنان دۇكەننىڭ تەمىر ەسىگى دە ج ۇلىنىپ كەتكەن. وسى كەزدە باۋىرجان اۋەلبەكوۆ لاپىلداعان وتتىڭ ىشىنە كىرىپ ادامداردى قۇتقارۋعا ارەكەت جاساعان.
«ويلانىپ تۇراتىن ۋاقىت جوق, جۇگىرىپ ىشكە كىردىم. اپ دەگەندە شاتىرلاعان جالىننىڭ قىزۋىنان قاس-كىرپىگىم مەن شاشىم, بەتىم كۇيىپ قالدى. تۇك كورىنبەيدى. دۇكەنشى ايەلدىڭ شىڭعىرعان داۋسىن ەستىپ, كوتەرىپ الدىم دا سىرتقا قاراي جۇگىردىم. ورتەنىپ كەتكەن كيىمدەرىنە قولىم جابىسىپ قالعانىن سەزدىم. جولدىڭ ارعى بەتىندەگى №25 ەمحاناعا دەيىن كوتەرىپ اپاردىم, بەيشارا قاتتى كۇيگەن. دارىگەرلەردىڭ قولىنا تاپسىرىپ, كوڭىلىم ورنىنا ءتۇستى. ءوزىمنىڭ دە وڭباي كۇيىپ قالعانىمدى سول كەزدە ءبىر-اق سەزدىم», دەيدى ول.
اۋىر جاراقات العان كەلىنشەك جانساقتاۋ بولىمىنە تۇسكەن, قازىر جاعدايى وڭالىپ كەلەدى. ال ەر ادام ءوزى قويعان ءورتتىڭ سالدارىنان تىرىدەي جانىپ كەتكەن. بىرەر كۇن بۇرىن جابىرلەنۋشىنىڭ باۋىرى اتالعان جايدىڭ سەبەبىن جەلىگە جاريالاپ, كومەك سۇرادى. ونىڭ ايتۋىنشا, اپكەسى مەن رەسەيلىك ازامات بوبريەۆ بىرنەشە جىل بۇرىن بىرگە تۇرعان. الايدا 2019 جىلدان بەرى جانجالداسىپ كەلەدى. سول كەزدە دە ول ايەلدى ۇرىپ-سوعىپ, قولىن سىندىرعان. ونى ەلدىڭ اۋماعىنان الاستاتۋ بويىنشا سوتتىڭ شەشىمى شىققانىمەن, قازاقستانننان كەتپەگەن.
«41 جاستاعى اپكەم جالعىزباستى, ءبىر قىزى بار. قاراشا ايىندا اكەمنىڭ اتىنان نەسيە الىپ ازىق-ت ۇلىك دۇكەنىن جالعا الدى. قايعىلى جاعدايدان ءبىر كۇن بۇرىن بوبريەۆ ونىڭ تۇراقتا تۇرعان كولىگىن كورىپ, دۇكەنگە كەلىپ, قوقان-لوقى كورسەتكەن. بۇعان دەيىن ول اپكەمنىڭ قىزىن مەكتەپكە كەلىپ قورقىتاتىن. وسىعان بايلانىستى الاتاۋ اۋدانىنىڭ ءىىب-ءنىڭ ۋچاسكەلىك پوليتسياسىنا ارىز جازدىم. بىراق ەشكىم بوبريەۆتى ىزدەگەن جوق. ال 21.12.22 جىلى ساعات 16.30-دا بوبريەۆ دۇكەنگە ەكى كانيستر بەنزينمەن, تاپانشامەن, وتتىقپەن كەلدى. مىلتىقپەن دۇكەندەگى ساتىپ الۋشىنى قۋىپ جىبەردى. دۇكەن ءىشى مەن اپكەمە جانارماي شاشىپ, ءورت قويعان. سالدارىنان جارىلىس تولقىنى تەرەزەلەر مەن ەسىكتەردى جارىپ جىبەردى. دەسە دە بوبريەۆ قۋىپ جىبەرگەن تۇرعىن قايتا دۇكەنگە كىرىپ, ءورتتىڭ ىشىنەن اپكەمدى الىپ شىقتى. وعان شەكسىز العىس بىلدىرەمىز. ەگەر ۋچاسكەلىك پوليتسيا كومەك سۇراعان كۇنى شارا قولدانسا, مۇنداي قايعىلى جاعداي بولماس ەدى. ول ءبىر جىل بۇرىن جەر اۋدارىلعان بولسا, اپكەم زارداپ شەكپەس ەدى جانە قازىر مۇنداي ازاپتى كورمەس ەدى! پوليتسيا سوتتىڭ شەشىمىن ورىنداماعان», دەيدى جابىرلەنۋشىنىڭ باۋىرى گۇلميرا.
وقيعا سالدارىنان دۇكەنگە جاقىن ورنالاسقان ءدارىحانا دا ورتكە ورانعان. پوليتسيا قايعىلى وقيعاعا بايلانىستى قىلمىستىق ءىس قوزعالعانىن جەتكىزدى.
«كىسى ولتىرۋگە وقتالۋ دەرەگى بويىنشا قىلمىستىق ءىس قوزعالدى. وقيعا ورنىنان تابىلعان قارۋدىڭ كىمگە تيەسىلى ەكەنى انىقتالىپ جاتىر. سونداي-اق قىزمەتتىك تەكسەرۋ جۇرگىزىلۋدە. تەرگەۋ بارىسى ءىىم مەن الماتى قالاسى پوليتسيا دەپارتامەنتى باسشىلىعىنىڭ باقىلاۋىندا», دەپ مالىمدەدى الماتى قالالىق پوليتسيا باسقارماسىنىڭ ءباسپاسوز قىزمەتى.
جابىرلەنۋشىنىڭ تۋىستارى جاقىنىنىڭ جانىن امان الىپ قالعان ازاماتقا العىسىن ايتۋدا. وقيعا كۋاگەرلەرى قايسار جىگىتكە جەرگىلىكتى بيلىك تاراپىنان لايىقتى قۇرمەت كورسەتىلسە دەيدى. ءتورت بالاسىمەن ءبىر بولمەنى جالداپ تۇراتىن باۋىرجان اۋەلبەكوۆ ءورت كەزىندە قولدارى كۇيىپ, دەنە جاراقاتىن العاندىقتان جۇمىسقا شىعا الماي قالعان. جانقيارلىق پەن باتىلدىقتى تەك قىزمەت بابىندا عانا ەمەس, كەز كەلگەن ومىرلىك جاعدايدا تانىتۋعا بولاتىنىن پاش ەتكەن ونىڭ ازاماتتىعى كوپكە ۇلگى.
الماتى
