بۋراباي اۋدانىنداعى اقىلباي كەنتىندە ورنالاسقان «بيوسفەرا fish» جشس فورەل شارۋاشىلىعىن ۇيىمداستىرىپ, بۇل وڭىردە بۇرىن-سوڭدى كەزدەسە قويمايتىن باعالى بالىقتى كوبەيتپەك. ءتىپتى تاياۋ ارادا وڭىردە ساۋدا سورەلەرىنە كوپتەپ تۇسەدى دەگەن ءۇمىت تە بار.
– بالىق وسىرەتىن كەشەننىڭ قۇرىلىسى بىلتىر ناۋرىز ايىندا باستالعان بولاتىن. نەگىزىندە بالىق تا باپ تىلەيدى. قىر-سىرىن قاپىسىز مەڭگەرۋ قاجەت. سوندىقتان كەشەندە جۇمىس ىستەيتىن قىزمەتكەرلەر قازان, روستوۆ, سانكت-پەتەربۋرگ قالالارىندا وسى سالانىڭ ەرەكشەلىكتەرىن ەگجەي-تەگجەيلى وقىپ, ۇيرەنىپ قايتتى. تامىز ايىندا شاباقتاردى باسسەينگە جىبەردىك. العاشقى فورەل ۋىلدىرىعى فرانتسيادان جەتكىزىلدى, – دەيدى شارۋاشىلىق ديرەكتورىنىڭ ورىنباسارى پاۆەل ستادنيكوۆ, – تاياۋ ارادا تاۋارلىق سالماققا جەتكەن سوڭ ساتىلىمعا شىعارىلادى. جالپى, بەس توننا فورەل ءوندىرۋدى مەجەلەپ وتىرمىز. ال بيىل باستاپ ءونىم كولەمى 40-45 تونناعا جەتكىزىلەدى.
مۇندا 8 باسسەيننىڭ ارقايسىسىندا شامامەن ءبىر جارىمعا جۋىق بالىق وسىرىلەدى. باسسەيندەگى سۋ ۇنەمى جاڭارتىلىپ وتىرادى. ويتكەنى فورەل بالىعى تازالىقتى سۇيەدى. ءارى سۋ وزونمەن بايىتىلادى. زەرتحانالىق ساراپتامالار كۇنىنە ءۇش رەت وتكىزىلەدى. سۋدىڭ قۇرامى مەن تەمپەراتۋراسى ستاندارتقا ساي بولۋى كەرەك. دەمەك بۇل باعىتتاعى جۇمىس تا وڭاي-وسپاق شارۋا ەمەس.
– مەملەكەتتىك ينۆەستيتسيالاردى تارتا وتىرىپ, ەكىنشى بلوكتى سالۋدى مەجەلەۋدەمىز. «اگرارلىق نەسيە كورپوراتسياسى» اق-عا ءوتىنىم بەردىك. سول كەزدە ءبىر جىلدا ءجۇز تونناعا دەيىن فورەل وندىرە الار ەدىك, – دەيدى پ.ستادنيكوۆ.
بۋرابايدىڭ باۋرايىندا فورەل ءوسىرۋ بۇل باعىتتاعى العاشقى ينۆەستيتسيالىق جوبا. كەشەندى سالىپ شىعۋ ءۇشىن 360 ملن تەڭگە توڭىرەگىندە جەكە ينۆەستيتسيا تارتىلعان. ءبىر جاقسىسى, بالىق ءوسىرۋ تۋرالى باستاما مەملەكەتتىڭ قولداۋىنا يە بولۋدا. ناقتىراق ايتساق, سالىنعان قارجىنىڭ 25 پايىزى قايتارىلادى.
تسەلينوگراد اۋدانىنداعى اققايىڭ اۋىلىندا «پوسەيدون» سەرىكتەستىگى دە ءدال وسىنداي بالىق شارۋاشىلىعىن قولعا الۋدى جوسپارلاپ وتىر. ويعا العان شارۋا وڭىنان وڭعارىلسا, اققايىڭدا دا جىلىنا 100 تونناعا جۋىق فورەل مەن بەكىرە وسىرۋگە مۇمكىندىك تۋىپ وتىر. نەسى بار, وسىنداي ناتيجەلى شارۋالار جۇزەگە اسىرىلسا, استانانى ازىق-ت ۇلىكپەن قامتۋ بەلدەۋىندەگى ءوڭىردىڭ بۇل باعىتتاعى ءوڭى جاقسارىپ, داستارحاننىڭ بەرەكەسى كىرىپ قالار ەدى.
اقمولا وبلىسى,
بۋراباي اۋدانى
