2023 جىلدىڭ 1 قاڭتارىنان باستاپ قازاقستاندا كونستيتۋتسيالىق سوت ءوز جۇمىسىن باستايدى. ءماجىلىس توراعاسى ەرلان قوشانوۆ سۋديالار لاۋازىمىنا قانات مۋسين, ەركىن وڭعارباەۆ, سەرگەي ۋدارتسەۆتىڭ كانديداتۋراسىن ۇسىندى.
ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ توراعاسى ارمان قوجاحمەتوۆ ولاردىڭ زاڭ سالاسىندا مول تاجىريبەسى بار بىلىكتى ءارى تاجىريبەلى ماماندار ەكەنىن اتاپ ءوتتى.
«قانات سەرگەي ۇلى ءمۋسيندى وزدەرىڭىز جاقسى بىلەسىزدەر, قۇقىقتىق قورعاۋ, ادىلەت ورگاندارىندا كوپ جىل ەڭبەك ەتتى, پارلامەنت ءماجىلىسىنىڭ دەپۋتاتى, كوميتەت توراعاسى بولدى. قازىرگى تاڭدا ەلىمىزدىڭ ادىلەت ءمينيسترى», دەدى ارمان قوجاحمەتوۆ.
سونداي-اق ماجىلىسمەن كوميتەت كانديداتتاردى قاراۋ ناتيجەسىندە وڭ قورىتىندى قابىلداعانىن دا ايتىپ, ارىپتەستەرىنەن تاعايىنداۋدى قولداۋدى سۇرادى. دەپۋتاتتار قولداپ داۋىس بەردى.
پالاتا توراعاسى ەرلان قوشانوۆ كونستيتۋتسيالىق سوتتىڭ جاڭا سۋديالارىن قىزمەتكە تاعايىندالۋلارىمەن قۇتتىقتاپ, الداعى جۇمىستارىنا ساتتىلىك تىلەدى. ءماجىلىس توراعاسى ەرلان قوشانوۆ پالاتانىڭ بىرجىلدىق قىزمەتىنە قورىتىندى جاسادى. ول پارلامەنتتىڭ تومەنگى پالاتاسىنىڭ بيىل كوپتەگەن زاڭنامالىق جۇمىس اتقارعانىن ايتتى.
«2022 جىل شىن مانىندە سىندارلى ءارى تاريحي مەزگىل بولدى. وتكەن ءبىر جىل ىشىندەگى وقيعالار مەملەكەتتىڭ, قوعامنىڭ بولمىسى مەن تابيعاتىن تۇبەگەيلى وزگەرتتى دەسەك, ارتىق ايتقاندىق ەمەس. جىل باسىنداعى «قاڭتار وقيعاسى» ءبارىمىز ءۇشىن اۋىر سىناق ءارى ساباق بولدى. سول سىناقتارعا جاۋاپ رەتىندە, مەملەكەت باسشىسى قاسىم-جومارت كەمەل ۇلى توقاەۆ ەلدە كەڭ كولەمدى ءارى باتىل ساياسي رەفورمالاردى قولعا الدى.
بۇل وڭ وزگەرىستەردى جالپىحالىقتىق رەفەرەندۋمدا ازاماتتارىمىزدىڭ قىزۋ قولداعانىنا ءبارىمىز كۋامىز. قاراشادا وتكەن پرەزيدەنت سايلاۋىنداعى قاسىم-جومارت كەمەل ۇلىنىڭ ءادىل, تازا ءارى كۇمانسىز جەڭىسى – حالقىمىزدىڭ سول قولداۋىنىڭ ايقىن دالەلى. سەبەبى بۇكىل قوعام بۇل وزگەرىستەردىڭ ادىلەت ءۇشىن, بولاشاق ءۇشىن اۋاداي قاجەت ەكەنىن جان-جۇرەگىمەن سەزىنىپ وتىر.
وزدەرىڭىز دە بىلەسىزدەر, قازىرگى ۋاقىتتا ەل ازاماتتارىنىڭ ەرتەڭگى كۇنگە دەگەن ءۇمىتى ويانىپ, سەنىمى ارتىپ كەلەدى. ەڭ باستىسى, ءبىز وسى سەنىمدى جوعالتىپ الماۋىمىز كەرەك! حالقىمىزدا «ادىلەتتىڭ جولى – اۋىر» دەگەن ءسوز بار. بىراق ءبىز بەرەكە-بىرلىگىمىزدىڭ ارقاسىندا قانداي قيىن جولدى دا ابىرويمەن ەڭسەرەمىز دەپ سەنەمىن», دەدى ە.قوشانوۆ.
سونداي-اق ءماجىلىس قابىرعاسىندا قاڭتار وقيعالارىن تەرگەۋ بارىسىنىڭ الدىن الا قورىتىندىسىن اشىق تۇردە تىڭدالعانىنا توقتالدى. تاۋەلسىز قازاقستان تاريحىنىڭ ەڭ ءبىر قايعىلى پاراعىنا اينالعان قاندى وقيعانىڭ جاي-جاپسارىن تالداپ-تالقىلاۋ جالعاسا بەرمەك. سپيكەردىڭ ايتۋىنشا, بۇل كۇردەلى ماسەلە دەپۋتاتتاردىڭ ۇدايى نازارىندا بولادى.
«ەڭ الدىمەن, تاريحي دەپ اتاۋعا بولاتىن كونستيتۋتسيالىق تۇزەتۋلەر بلوگى قابىلداندى. ءبىز مەملەكەت باسشىسىنىڭ اۋقىمدى باستامالارىنا ۋاقتىلى جانە ساپالى زاڭنامالىق قولداۋ كورسەتتىك. الەۋمەتتىك ماڭىزى زور بىرقاتار زاڭ قابىلداندى. جالپى, بيىل ءماجىلىس جۇمىسىندا 154 زاڭ جوباسى بولدى. 93 زاڭ جوباسى قارالىپ, سەناتقا جولداندى, ونىڭ 75-ىنە پرەزيدەنت قول قويدى», دەدى سپيكەر.
سونداي-اق ەرلان قوشانوۆ جاڭا جىلدان باستاپ پالاتانىڭ جاڭا كونستيتۋتسيالىق شارتتار بويىنشا جۇمىس ىستەيتىنىن جانە بۇدان بىلاي زاڭدار قابىلدايتىنىن اتاپ ءوتتى. سونداي-اق 2023 جىلى ءماجىلىس سايلاۋى وتەدى.
