امانگەلدى اعامىزدى قالىڭ جۇرتشىلىق ءماجىلىستىڭ دەپۋتاتى رەتىندە جاقسى تانيتىن. ءجۇزدىڭ اتىن بىلسە دە, ءبىردى, بىرەگەيدى بىردەن تانيتىن حالىق كوپتىڭ جاناشىرى ابەكەڭنىڭ قازاققا دەگەن جۇرەگىنىڭ اقتىعىنا, شىنشىلدىعىنا, تۋراشىلدىعىنا سەنەتىن. كەي-كەيدە كوپشىلىكتەن «جوعارى جاقتا, دەپۋتاتتىق كورپۋستا كىمدى بىلەسىز؟» دەپ سۇراپ قالساڭىز, ەلدىڭ اۋزىنا ەڭ الدىمەن ا.ايتالىنىڭ اتى-ءجونى تۇسەتىنىنە تالاي كۋامىز. شىنايى حالىق سەنىمى دەگەن, شىنىندا دا, وسى شىعار.
پروفەسسور ا.ايتالىنىڭ ۇلاعاتتى ۇستازدىعى تۋرالى الدىن كورگەن شاكىرتتەرى تالاي-تالاي سىر دا, شەر دە شەرتەرىنە كۇمان جوق. مارقۇم مۇحتار ارىن مەن ابەكەڭ ەكەۋى كەزەك-كەزەك اقتوبە ۋنيۆەرسيتەتىنىڭ مىنبەرىنە كوتەرىلگەندە, مۇنداي باقىتتى ساتتەردى بىرنەشە رەت باستان كەشىپ ەدىك. ءوزىمىز دە وبلىس ورتالىعىندا ەمەس, ايعا ازۋىن بىلەگەن اتاقتى الەمدىك وقۋ وردالارىنىڭ بىرىندە ءدارىس تىڭداعانداي بولاتىنبىز. ۇرپاق قامى دەسە ۇيقىسى قاشاتىن ابەكەڭ سوڭعى كەزدە ستۋدەنتتەرگە ءىلىم-ءبىلىمدى جاڭاشا جەتكىزۋدىڭ تىڭ فورمالارىن ىزدەپ, ۇلتتىڭ ينتەللەكتۋالدىق الەۋەتىن كوتەرۋدىڭ جولدارىن ويلاستىرىپ, تىڭ تۇجىرىمدارىن ايتىپ تاۋىسا الماۋشى ەدى. وسى جولداعى ەرەن جوسپارى دا ەرەكشە كوپ-ءتىن. سونىڭ باستاماسى رەتىندە شاكىرتتەر ومىرىنەن الىپ, ء«دىن تۋرالى 50 سۇراق-جاۋابىن» بىزگە جازىپ بەرىپ ەدى. ءبىر كەم دۇنيە عوي, وكىنىشكە قاراي, جوبا-جوسپارلارى كەمەل زيالىمەن بىرگە كەتىپ بارادى...
سەڭگىرگە شىققان مەرەيتويىندا سەگىز تومىڭىزدى شىعارايىق دەگەن ءىنى-دوسىنا: «جازعان-سىزعانىم, ايتقان-قايتقانىم ءۇش كىتاپقا جەتسە, ونان اسقان ابىروي بار ما؟» دەپ شىن كوڭىلىمەن, جىميىپ قويىپ, پاتۋالاسقان-دى. وسىلايشا, قازاققا كەرەك, جاڭا قازاقستانعا كەرەك «ۇلتتانۋ» مەن ء«دىنتانۋ» ءھام ء«دىلتانۋ» جاساقتالىپ ەدى. ءبىر شۇكىرلىگى – «ۇلتتانۋىنىڭ» ءسۇيىنشى داناسىن كوزبەن كورىپ, كوڭىلى توعايىپ ەدى.
باقۇل بول, قايران ابەكە! ۇلت رۋحانياتىنىڭ ءۇش ۇستىنىن كوتەرىپ تۇرعان ەڭبەكتەرىڭىزبەن اۋىزدانعان ۇرپاعىڭىز رۋحىڭىزدى نالىتپاي, شىراعىڭىزدى جاعاتىنىنا سەنىڭىز.
عاريفوللا انەس
