ۇلتتىق كوميسسيا توراعاسىنىڭ ورىنباسارى, پارلامەنت سەناتىنىڭ دەپۋتاتى ءلاززات سۇلەيمەننىڭ ايتۋىنشا, ەلدەگى كۇردەلى الەۋمەتتىك ماسەلەلەردى شەشۋدىڭ تيىمدىلىگىن ارتتىرۋعا جانە ازاماتتىق قوعاممەن ءوزارا ءىس-قيمىلدى كەڭەيتۋگە باعىتتالعان ءبىرشاما جۇمىس اتقارىلدى. ءاربىر باسىمدىق بويىنشا ساراپتامالىق توپتار قۇرىلدى, جاڭا تاسىلدەر قابىلداندى, كوميسسيانىڭ جۇمىسىن رەتكە كەلتىرەتىن, سەكتورلاردىڭ جۇمىسىن جانە ونىڭ مۇشەلەرىنىڭ قىزمەتىن باعالاۋدى ايقىندايتىن رەگلامەنت بەكىتىلدى.
«بالالار جىلى بالالاردىڭ قۇقىقتارى مەن مۇددەلەرىن قورعاۋ ماسەلەسى باستى نازاردا بولدى. وسى ماقساتتا ارنايى جوسپار ازىرلەنىپ, وندا 65 جۇيەلى ءىس-شارا قامتىلدى. كۇردەلى الەۋمەتتىك ماسەلەلەر بويىنشا 18 وڭىرگە ۇلتتىق كوميسسيانىڭ مونيتورينگتىك توبىنىڭ ساپارى ۇيىمداستىرىلدى. ولار پەرزەنتحانالارعا, پەريناتالدىق ورتالىقتارعا بارىپ, قاتارداعى دارىگەرلەرمەن جانە بوساناتىن ايەلدەردىڭ وزىمەن تىكەلەي بايلانىس ورناتىپ, وڭىرلەردە انا مەن بالا ءولىمىنىڭ ءوسۋ سەبەپتەرىن ەگجەي-تەگجەيلى زەرتتەدى. بۇل جۇمىسقا اكۋشەرلىك, گينەكولوگيا جانە پەريناتولوگيا سالاسىنداعى ساراپشىلار, ەلىمىزدىڭ مەديتسينالىق جوعارى وقۋ ورىندارىنىڭ بەلگىلى عالىمدارى تارتىلدى», دەدى سپيكەر.
ونىڭ ايتۋىنشا, بالالاردى زورلىق-زومبىلىقتان قورعاۋ ءسۋيتسيدتىڭ الدىن الۋ جانە بالالاردىڭ قۇقىقتارى مەن ءال-اۋقاتىن قامتاماسىز ەتۋدىڭ 2023-2025 جىلدارعا ارنالعان كەشەندى جوسپارى ازىرلەندى. بالالارعا قاتىستى زورلىق-زومبىلىق فاكتىلەرى بويىنشا جەدەل ارەكەت ەتۋ الگوريتمى جاسالدى. الگوريتم نەگىزىندە ۆەدومستۆوارالىق دەن قويۋ جۇيەسىن كۇشەيتۋگە مۇمكىندىك بەرەتىن جانە جەرگىلىكتى جەرلەردە ۋاكىلەتتى ورگانداردىڭ ءتيىمدى جۇمىسىن قامتاماسىز ەتەتىن جۇمىس توبى قۇرىلدى.
«ۇلتتىق كوميسسيانىڭ ازاماتتىق قوعام قۇرىلىمدارىمەن سىندارلى ديالوگى بەلگىلەندى. بۇگىنگى تاڭدا وتباسىلىق-گەندەرلىك پروبلەمامەن اينالىساتىن 500-گە جۋىق ۇەۇ جۇمىس ىستەيدى. ازاماتتىق سەكتورمەن بىرلەسىپ جۇمىس ىستەۋدە تۇرمىستىق زورلىق-زومبىلىقتىڭ الدىن الۋ ماسەلەلەرى ەرەكشە وزەكتى بولىپ وتىر. بۇل باعىتتا «وتباسىندا – زورلىق-زومبىلىقسىز قازاقستان» جوباسى جۇزەگە اسىرىلۋدا. قازاقستان – ىشكى ىستەر ورگاندارى جۇيەسىندە ايەلدەردى زورلىق-زومبىلىقتان قورعاۋ جونىندەگى بولىمشەلەر قۇرىلعان پوستكەڭەستىك ەلدەردىڭ ءبىرى. ايەلدەرگە قارسى جاسالعان زورلىق-زومبىلىق قىلمىستارىن ەڭ تاجىريبەلى ايەل تەرگەۋشىلەر زەرتتەيدى. مۇنداي تاجىريبە قىلمىستاردى تەزىرەك جانە ءتيىمدى اشۋعا ىقپال ەتەدى», دەدى ل.سۇلەيمەن.
سونىمەن قاتار ۇلتتىق كوميسسيا «مەرەيلى وتباسى» ۇلتتىق بايقاۋىن, اكەلەردىڭ رەسپۋبليكالىق فورۋمىن, اۋىلداعى ايەلدەردىڭ رەسپۋبليكالىق فورۋمىن وتكىزدى. ايەلدەر مەن قىزداردىڭ باسقارۋشىلىق الەۋەتى مەن ساياسي مادەنيەتىن دامىتۋ ماقساتىندا «توميريس» جوباسى ىسكە اسىرىلىپ جاتىر.
«قازاقستاننىڭ دامۋىنىڭ جاڭا كەزەڭىندەگى وتباسىلىق-دەموگرافيالىق جانە گەندەرلىك ساياسات» تاقىرىبىنداعى حالىقارالىق عىلىمي كونفەرەنتسيا قازاقستان, چەحيا, شۆەيتساريا, ءۇندىستان جانە اقش عالىمدارى مەن ساراپشىلارىن, سونداي-اق پارلامەنت دەپۋتاتتارىن, ورتالىق جانە جەرگىلىكتى اتقارۋشى ورگاندار, ۇەۇ جانە حالىقارالىق ۇيىمدار وكىلدەرىن, جالپى 300-گە جۋىق قاتىسۋشىنىڭ باسىن قوستى. كونفەرەنتسيا قورىتىندىسى بويىنشا ۇكىمەت پەن جەرگىلىكتى اتقارۋشى ورگانداردىڭ قۇرىلىمدارى پايدالاناتىن عىلىمي نەگىزدەلگەن ساراپتامالىق تالداۋ ازىرلەندى.
بيىل جۇرگىزىلگەن جۇمىستاردىڭ ناتيجەسىندە قازاقستان دۇنيەجۇزىلىك ەكونوميكالىق فورۋمنىڭ گەندەرلىك تەڭدىك بويىنشا كورسەتكىشتەرىن جاقسارتتى, دالىرەك ايتقاندا, 80-ورىننان (2021 جىل) بيىل 65-ورىنعا دەيىن كوتەرىلدى.
