بۇعان دەيىن قالامگەردىڭ « ۇلى دالا ارۋلارى» سەرياسىمەن شىققان «سۇيىنبيكە», «بوزوق ارۋى», «ۇرپاعىنا ۇران بولعان انالار» اتتى كىتاپتارى وقىرماندارىنا جول تارتقانىن بىلەمىز. اتالعان ەڭبەكتەردىڭ جالعاسىنداي كەزەكتى كىتابىنىڭ تۇساۋكەسەر ءراسىمى مەن تانىستىرىلىمى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كىتاپحاناسىندا ءوتتى. كوپشىلىككە تانىستىرىلعان «ايىمدار جوقشىسى» كىتابىنىڭ اۆتورى ءشاربانۋ قوناقبايقىزى – قازاق حالقىنىڭ عانا ەمەس, تۇتاس تۇركى الەمى تاريحىندا ايرىقشا ورنى بار ۇلى انالارىمىز بەن قايراتكەر حانىمدار تۇلعاسىن تاسقا قاشاپ كەلە جاتقان قالامگەر. ۇلى دالا توسىندە ۇلاعاتتى تۋ ەتكەن ايەل-انالار ەسىمدەرىن تاريحقا التىن ارىپپەن جازۋشى بيىل مەرەيلى 75 جاسقا تولىپ وتىرعانى جانە بار.
اۆتوردىڭ قوس بىردەي قۋانىشىن القالاپ كەلگەن مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى, بەلگىلى ايتىسكەر اقىن ەگەۋحان مۇقاماديقىزى, مەملەكەتتىك سىيلىقتىڭ لاۋرەاتى, جازۋشى-دراماتۋرگ روزا مۇقانوۆا, بەلگىلى جازۋشى اسقار التاي جانە تاعى باسقا زيالى قاۋىم وكىلدەرى مەن ۋنيۆەرسيتەتتىڭ باسشىلىق قۇرامى, عالىمدار قاتىسقان ءىس-شارانى بەلگىلى جازۋشى الىبەك اسقاروۆ جۇرگىزىپ وتىردى. ەسىمدەرى اتالعان اقىن-جازۋشىلار ءسوز سويلەپ, جۇرەكجاردى لەبىزدەرىمەن ءبولىسىپ, اۆتورعا ىقىلاس تانىتتى. كەشتى ۇيىمداستىرۋشى ۋنيۆەرسيتەتتىڭ فيلولوگيا فاكۋلتەتىندە وقيتىن ءبىر توپ ستۋدەنت ءشاربانۋ بەيسەنوۆا شىعارماشىلىعىنان ۇزىندىلەر وقىدى.
كوشىم حانعا جار بولعان سۇزگەنىڭ, ساپاگەرەيدى جەبەگەن سۇيىنبيكەنىڭ ءومىرى مەن ونەگەسىن سۋرەتتەگەن ءشاربانۋ قوناقبايقىزىنىڭ ءبىر كەيىپكەرى, اكادەميك مۇحامەدجان قاراتاەۆتىڭ جارى مارحۋما اپاي: «كيىم سىرتىنان ەمەس, ىشىنەن توزادى», دەپتى. «ايەل – كيىمنىڭ ءىشى. ول سىرتىنان دا مىقتى بولۋى كەرەك, توزباۋعا ءتيىس». بۇگىنگى ۇرپاق ءبىلىپ وسۋگە ءتيىس ءبىر ءسوز وسى دەپ بىلەمىز.
