– «وزگەرىستەر جولى: ءار ازاماتقا لايىقتى ءومىر!» دەپ اتالاتىن پارتيالىق باعدارلامانىڭ باسىمدىعى – حالىقتىڭ ءومىر ءسۇرۋ ساپاسىن ارتتىرۋ, الەۋمەتتىك ادىلەتتىلىكتى قامتاماسىز ەتۋ, ەسەپ بەرەتىن جانە حالىق ۇنىنە قۇلاق اساتىن مەملەكەت قۇرۋ. باعدارلامانى ىسكە اسىرۋعا بارلىعى 21 ترلن تەڭگە تارتۋ جوسپارلانعان. ونىڭ قارجىلىق جانە ادامي رەسۋرستارمەن قامتاماسىز ەتىلگەن بيىك ماقساتى, بايىپتى باعدارى بار, – دەدى ا.پلاتونوۆ.
بۇگىندە سايلاۋالدى باعدارلامانى ىسكە اسىرۋ شەڭبەرىندە ەل اۋماعىندا 90 مەكتەپ پايدالانۋعا بەرىلدى. سونىمەن قاتار 259 بالاباقشا اشىلىپ, 180 كوللەدجدە جاڭعىرتۋ جۇمىسى جۇرگىزىلگەن. بۇعان قوسا 11,7 ملن شارشى مەتر تۇرعىن ءۇي (100 مىڭعا جۋىق باسپانا) سالىنىپ, 500 مىڭعا جۋىق جۇمىس ورنى قۇرىلدى.
جۋىردا مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا بيىل 11 ايدا ەكونوميكا ءوسىمى 4,6%-دان 2,7%-عا دەيىن باياۋلاعانىن, ال ينفلياتسيا سوڭعى 14 جىلدا بولماعان دەڭگەيگە جەتىپ, 19,6%-دى قۇراعانىن مالىمدەگەن ەدى. ەل ەكونوميكاسىنداعى وسىنداي جاعىمسىز جاعداي پارتيانىڭ سايلاۋالدى باعدارلاماسىن ىسكە اسىرۋ ساپاسىنا تىكەلەي اسەر ەتەدى.
ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا, بيىل جوسپارلانعان 18 ملن شارشى مەتر تۇرعىن ءۇيدىڭ جىل سوڭىنا دەيىن 15,1 ملن شارشى مەترى (137,7 مىڭ باسپانا) سالىنادى.
«شامامەن 3 ملن شارشى مەتردى سالىپ ۇلگەرە الماي جاتىرمىز. بۇعان جۇمىس كەستەسىنەن ارتتا قالۋ, قارجىلاندىرۋدىڭ جەتكىلىكسىزدىگى سەبەپ بولىپ وتىر. الايدا ەڭ باستى كەدەرگى – قۇرىلىس ماتەريالدارىنىڭ قىمباتتاۋى. بەلگىلى ءبىر دەڭگەيدە يمپورتقا تاۋەلدىلىك بولعاندىقتان, ەلگە قۇرىلىس ماتەريالدارىن جەتكىزۋ كەزىندە قيىندىقتار ورىن الدى», دەدى مينيستر.
2022 جىلى اتقارىلعان جۇمىستى قورىتىندىلاي كەلە, ارتۋر پلاتونوۆ بيىل كوميتەت ورتالىق جانە جەرگىلىكتى اتقارۋشى ورگاندارعا 200-دەن اسا ناقتى ۇسىنىس بەرگەنىن اتاپ ءوتتى. جەرگىلىكتى جەرلەردە پارتيالىق باقىلاۋ كوميسسيالارىمەن بىرلەسىپ ەڭبەك ۇجىمدارىمەن, تۇرعىندارمەن, قوعام قايراتكەرلەرىمەن جانە تاعى باسقالارمەن 600-دەن اسا دوڭگەلەك ۇستەل, 1 100-دەن اسا كەزدەسۋ, سونداي-اق 5 مىڭنان اسا كوشپەلى وتىرىس پەن رەيد وتكىزىلگەن.
«ازىق-ت ۇلىك تاۋارلارى, دارىلىك زاتتار جانە جانار-جاعارماي باعاسىنىڭ وزگەرۋىنە باقىلاۋ جۇرگىزۋ بويىنشا 216 مونيتورينگ توبىنىڭ جۇمىسىن ەرەكشە اتاپ وتكىم كەلەدى. بۇل جۇمىس تۇرعىنداردىڭ وڭ باعاسىن الدى. سونداي-اق پارتيالىق باقىلاۋ بەكەتىن قۇرۋ جۇمىسى قولعا الىندى», دەدى ا.پلاتونوۆ.
بيىل ادەپ كودەكسىن بۇزعانى ءۇشىن 104 پارتيا مۇشەسى, ونىڭ ىشىندە قالا جانە اۋدان اكىمدەرى, ولاردىڭ ورىنباسارلارى, ورتالىق جانە جەرگىلىكتى مەملەكەتتىك ورگانداردىڭ دەپارتامەنت جانە باسقارما باسشىلارى, ءتۇرلى دەڭگەيدەگى ءماسليحاتتاردىڭ 22 دەپۋتاتى جاۋاپكەرشىلىككە تارتىلعانىن اتاپ وتكەن ءجون.
