باسپانا الەۋمەتتىك وسال توپتار ساناتىنداعى وتباسىلار مەن اتا-اناسىنىڭ قامقورلىعىنسىز قالعان بالالارعا بەرىلدى. جاڭا قونىس يەلەرىن قۇتتىقتاۋعا كەلگەن تۇركىستان وبلىسىنىڭ اكىمى دارحان ساتىبالدى تاۋەلسىزدىك جىلدارى ءبىر عانا تولەبي اۋدانىندا مەملەكەت ەسەبىنەن 30-عا جۋىق كوپقاباتتى تۇرعىن ءۇيدىڭ قۇرىلىسى جۇرگىزىلىپ, 1 500 وتباسى قونىس تويىن تويلاعانىن اتاپ ءوتتى. سونداي-اق اۋداننىڭ قۇرىلعانىنا 90 جىل تولۋىنا وراي اۋدان ورتالىعىندا تولەبي بابانىڭ ەڭسەلى ەسكەرتكىشى اشىلدى. «تولەبي بابا» ساياباعىندا ورنالاسقان بيىكتىگى 23 مەتر بولاتىن مىس ەسكەرتكىش كاسىپكەر اسەت قايىپبەكوۆتىڭ دەمەۋشىلىگىمەن جاسالعان. ءمۇسىن سالماعى – 25 توننا. مەرەكەلىك جيىندا تولەبي اۋدانىنىڭ تاريحى دارىپتەلىپ, تاريحي تۇلعا تۋرالى دەرەكتەر ايتىلدى. اقسۋ, سايرامسۋ, بادام وزەندەرى اعىپ وتەتىن تولەبي اۋدانى تاريحي مۇرالارىمىزعا وتە باي. تۇركىستان وبلىسىنداعى ەڭ بيىك نۇكتە – سايرام شىڭى وسى اۋداندا ورنالاسقان. ولكەدە 100-دەن اسا ارحەولوگيالىق, ارحيتەكتۋرالىق جانە تاريحي ەسكەرتكىشتەردىڭ ورنى بەلگىلەنگەن. اۋداننان تابىلعان مادەني وشاقتار اشىق اسپان استىنداعى مۇراجايعا اينالىپ وتىر.
تۇركىستان وبلىسى
