سۋرەتتى تۇسىرگەن اۆتور
قولايسىز اۋا رايىنا بايلانىستى 14 جەلتوقسان كۇنى وسكەمەن قالاسى مەن گلۋبوكوە اۋدانىنداعى ورتا مەكتەپتەردەگى بارلىق سىنىپتا ساباقتار قاشىقتان وقىتۋعا كوشىرىلدى. ءتىپتى ەرەسەكتەردىڭ ءوزى جۇمىسقا كەشىگىپ جەتكەن. ايتىپ وتكەندەي, ونسىز دا سيرەك جۇرەتىن قوعامدىق كولىكتەر بۇل كۇندەرى قاتىناۋىن مۇلدەم سيرەتكەن. ال ايالدامالاردىڭ كوبىن قار باسىپ جاتتى. جولداعى قار تولىق تازالانباعاندىقتان, كەيبىر اۆتوبۋس جۇرگىزۋشىلەرى رەيسكە شىعۋدان دا باس تارتقان.
– بۇگىن بىزدە قانشاما اۆتوبۋس جۇرگىزۋشىلەرى جۇمىسقا شىققان جوق. ويتكەنى جولدار كۇرەلمەگەن, جاسقانامىز. كۇرەلمەگەنىمەن قويماي, جولدار تار. ايالدامادا اينالا المايسىڭ. قار دەگەن تاۋ توبە, – دەيدى اۆتوبۋس جۇرگىزۋشىسى بولات مۇسەكەنوۆ.
«تازا وسكەمەن» كمك ديرەكتورى اسحات تاجەنوۆتىڭ ايتۋىنشا, كەيىنگى ەكى اپتادان بەرى قار كۇن ارا تولاسسىز جاۋعان. ال سوڭعى ەكى-ءۇش كۇندە قالىڭدىعى ءبىر مەترگە جەتتى.
– مۇنداي قالىڭ قار بەس-التى جىل بۇرىن جاۋعان. سوندىقتان ءتورت-بەس جىلدا ءبىر تۇسەتىن قار ءۇشىن تەحنيكانىڭ سانىن كوبەيتۋ ءتيىمسىز. تۇرعىندار ءسال شىدامدىلىق تانىتسا, ءبارى رەتتەلەدى, – دەيدى ا.تاجەنوۆ.
سونداي-اق بۇل كۇندەرى وسكەمەن – التاي باعىتىنداعى كۇرە جولعا شەكتەۋلەر ەنگىزىلدى. قارلى بوراننان سوڭ اياز ءتۇستى. سينوپتيكتەردىڭ بولجاۋىنشا, بيىل قىس قاتتى بولاتىن سەكىلدى.
شىعىس قازاقستان وبلىسى
