جالپى, اتالعان كوميسسيا وكىلدەرى ادام ساۋداسىنا قارسى كۇرەس ءىس-شارالارىن جۇيەلى جۇرگىزىپ كەلەدى. ەلىمىزدە العاش رەت ادام ساۋداسىنا قارسى كۇرەس تۋرالى زاڭ جوباسى ازىرلەنىپ جاتقانىن ەسكەرسەك, بۇعان كوميسسيا مۇشەلەرىنىڭ قوسقان ۇلەسى زور. 2023 جىلدىڭ ءساۋىر ايىندا زاڭ جوباسى ءماجىلىستىڭ تالقىلاۋىنا ۇسىنىلماق.
ەلىمىزدە ادام ساۋداسىنىڭ ەڭ كوپ تارالعان ءتۇرى – ايەلدەردى جىنىستىق قاناۋ, سونداي-اق پريتوندار ۇيىمداستىرۋ مەن جەڭگەتايلىق جاساۋ. ەر ادامدار ادەتتە, ەڭبەك نارىعىندا جاپا شەگەدى. سونىمەن قاتار جاڭا تۋعان نارەستەلەر مەن جاس بالالاردى ساتۋ فاكتىلەرى دە ازايماي تۇر. پرەزيدەنت جانىنداعى ادام قۇقىقتارى جونىندەگى كوميسسيانىڭ حاتشىسى تاستەمىر ابىشەۆتىڭ ايتۋىنشا, زاڭ جوباسىندا شەتەلدىك ميگرانتتاردىڭ ەڭبەك قاتىناستارىن رەتتەۋ ماسەلەسى قاراستىرىلىپ, وزگە دە ماڭىزدى باعىتتار قامتىلعان. زاڭ قولدانىسقا ەنگىزىلسە, ادام قۇقىعى تۋرالى ەرەجەلەر حالىقارالىق ستاندارتتارعا ساي بولماق. ادام ساۋداسىنىڭ الدىن الۋ جانە اتالعان قىلمىسقا قارسى ىمىراسىز كۇرەستە الەمدىك تاجىريبەنىڭ ماڭىزى زور.
ەلىمىزدە 2016 جىلدان بەرى ادام ساۋداسىنىڭ قۇرباندارىنا اتاۋلى الەۋمەتتىك كومەك كورسەتىلەدى. الايدا بۇل كومەكتى تەك قازاقستان ازاماتتارى, ەلىمىزدە تۇرعىلىقتى تۇرىپ جاتقان شەتەلدىك ازاماتتار مەن قانداستار الا الادى. ال ءتۇرلى سەبەپتەرمەن قازاقستانعا ۋاقىتشا كەلگەن ەڭبەك ميگرانتتارى ادام ساۋداسىنىڭ قۇربانى بولعاندا بۇل كومەكتەن قاعىلادى. حالىقارالىق ساراپشىلار بۇل ماسەلەنى ءجيى كوتەرىپ ءجۇر. جالپى, بۇل باعىتتاعى زاڭنامالىق قۇجاتتاردىڭ بولماۋى قازاقستاننىڭ كەيبىر حالىقارالىق رەيتينگتەردە تومەنگى ساتىدان كورىنۋىنە تۇرتكى بولعانى راس. بىلىكتى مامانداردىڭ قاتىسۋىمەن ازىرلەنىپ جاتقان زاڭ جوباسى وسى سياقتى تۇيتكىلدەردىڭ ءتۇيىنىن تارقاتادى دەگەن سەنىم مول.
دوڭگەلەك ۇستەلگە ادام قۇقىعىن قورعاۋ ءىس-شارالاردا بەلسەندىلىك تانىتىپ جۇرگەن ساراپشىلار شاقىرىلىپ, ولار ءوز ويلارىن ورتاعا سالدى. جيىندا ەلىمىزدە زاڭ ۇستەمدىگىن قالىپتاستىرۋ مەن قۇقىق قورعاۋ ينستيتۋتتارىن جەتىلدىرۋگە باسىمدىق بەرىلىپ وتىرعانى ايتىلدى. قۇقىقتىق مەملەكەتتىڭ قالىپتاسۋى ادام بوستاندىعىن ساقتاۋمەن تىكەلەي بايلانىستى. جينالعاندار ادام قۇقىقتارىن حالىقارالىق ستاندارتتارعا سايكەس قورعاۋدىڭ ۇلتتىق تەتىكتەرىن جەتىلدىرۋ, سالادا قولعا الىنىپ جاتقان رەفورمالار توڭىرەگىندە پىكىر الماستى.
تاستەمىر ابىشەۆتىڭ ايتۋىنشا, مۇنداي كەزدەسۋلەر جىل سايىن وتكىزىلىپ تۇرادى. بۇل جاستاردىڭ وي-ءورىسىن كەڭەيتۋمەن بىرگە بولاشاقتا زاڭ سالاسىندا جۇمىس ىستەۋدە قاجەتتى داعدىلاردى مەڭگەرۋگە مۇمكىندىك بەرەدى. «ەندى قازاقستاننىڭ ازاماتتارى عانا ەمەس, ەلىمىزدە تۇراقتى نەمەسە ۋاقىتشا تۇرىپ جاتقان شەتەلدىكتەر, ازاماتتىعى جوق ادامدار, بوسقىندار, قانداستار, ازاماتتىقتى الىپ ۇلگەرمەگەندەر دە كونستيتۋتسيالىق سوتقا جۇگىنۋگە قۇقىلى. مىسالى, مەنىڭ قۇقىقتارىم بار بولعانىمەن, مەملەكەت پەن قوعام الدىندا مىندەتتەرىمدى دە ۇمىتپاۋىم كەرەك», دەدى ت.ابىشەۆ.
