بۇگىنگى تاڭدا «قازاقانيماتسيا» شىعارماشىلىق بىرلەستىگى كونكۋرستىق نەگىزدە رەسپۋبليكانىڭ ءىرى قالالارىنان مالىمدەلگەن 167 ستسەناري ىشىنەن ۇزدىك جيىرماسىن تاڭداپ, 5 مينۋتتىق انيماتسيالىق كارتينالاردان تۇراتىن 20 جوبانى اياقتاپ ۇلگەردى. وسىعان وراي قازاقستاننىڭ مادەنيەت جانە سپورت ءمينيسترى داۋرەن اباەۆ «قازاقانيماتسيا» شىعارماشىلىق بىرلەستىگىنىڭ جۇمىسىمەن تانىسىپ, انيماتسيا ونەرىن وركەندەتۋگە اتسالىسقان بىرقاتار ارداگەردى ماراپاتتادى.
– 2022 جىل ۇلتتىق انيماتسيالىق كينو ونەرى ءۇشىن ايتۋلى جىل بولدى. سەبەبى بيىل قازاق انيماتسيالىق كينو ونەرىنە 55 جىل تولدى. 1967 جىلى قازاق مۋلتيپليكاتسياسىنىڭ نەگىزىن قالاعان ۇلى رەجيسسەر امەن قايداردىڭ «قارلىعاشتىڭ قۇيرىعى نەگە ايىر؟» اتتى تۇڭعىش فيلمىنەن باستاۋ العان قازاق انيماتسيالىق كينو ونەرى جاس ۇرپاققا جارتى عاسىردان استام ۋاقىت بويى تولاسسىز قىزمەت ەتۋمەن كەلەدى. وسى جارتى عاسىردان استام ۋاقىت ىشىندە 200-دەن استام مۋلتفيلم ءتۇسىرىلىپ, 30-دان اسا انيماتسيالىق ستۋديا ومىرگە كەلگەن ەكەن. بۇل ۇلت بولاشاعى ءۇشىن جاسالعان تەڭدەسسىز جۇمىس, اۋقىمدى ەڭبەك دەپ ەسەپتەيمىز. 2018 جىلى انيماتسيالىق كينوستۋديالار قاۋىمداستىعى قۇرىلىپ, ءوز كەزەگىندە رۋحاني مادەني ماڭىزى بار كوپتەگەن ءىس-شارانى اتقارىپ كەلەدى, – دەدى مادەنيەت جانە سپورت ءمينيسترى داۋرەن اباەۆ قۇتتىقتاۋ سوزىندە.
سونداي-اق بيىل قازاق انيماتسيالىق شىعارماشىلىق بىرلەستىگىنىڭ ۇيىتقى بولۋىمەن الماتى, استانا, شىمكەنت, تۇركىستان, پەتروپاۆل قالالارىندا ورنالاسقان 20 ستۋديانىڭ ارقايسىسى 20 انيماتسيالىق جوباعا يە بولدى. مۇنىڭ بارلىعى ۇلتتىق انيماتسيانى قولداۋ جولىندا قولعا الىنعان ءىرى جوبالار-تۇعىن. «ۇلت بولاشاعى – ۇرپاق تاربيەسىندە», انيماتسيالىق فيلمدەردى مەملەكەت مۇددەسىمەن ۇشتاستىرا وتىرىپ وسكەلەڭ ۇرپاققا ۇلتتىق رۋح پەن رۋحاني قۇندىلىقتاردى دارىپتەۋ ءىسى تولاسسىز اتقارىلا بەرمەك. داۋرەن اسكەربەك ۇلى انيماتسيانىڭ وبراز قالىپتاستىراتىنىن ايرىقشا اتاپ ءوتتى. بالا بويىنا ەل تاريحىنىڭ, ۇلتتىق ءداستۇر مەن ءتول مادەنيەتتىڭ وبرازى انيماتسيا ارقىلى سىڭەدى. تاربيە وسىلاي باستاۋ الادى. سول سەبەپتى انيماتسيانى مەملەكەت تاراپىنان قولداۋ جىل سايىن كۇشەيە ءتۇسۋى كەرەك.
ءىس-شارا بارىسىندا مادەنيەت ءمينيسترى انيماتسيا ارداگەرلەرىنە ماراپاتتار مەن العىسحاتتار تابىس ەتتى. «ەڭبەك ارداگەرى» مەدالىمەن كينورەجيسسەر-مۋلتيپليكاتورلار گۇلميرا سادىقوۆا مەن گالينا دۋسەنكو جانە سۋرەتشى-مۋلتيپليكاتور ەرنست بەيسەيتوۆ ماراپاتتالدى.
بۇدان باسقا, وسى جىلدىڭ 19 قىركۇيەگى مەن 4 قاراشاسى ارالىعىندا «قازاقانيماتسيا» شەڭبەرىندە وتكىزىلگەن شەبەرلىك سىنىپتارىنىڭ تىڭداۋشىلارى جانە پولشا, فرانتسيا, تۇركيا, يسپانيا سەكىلدى الىس شەتەلدەردە شەبەرلىك سىنىپتارى مەن پراكتيكالىق ساباقتاردان وتكەن تىڭداۋشىلارعا ارنايى سەرتيفيكاتتار تابىستالدى. مادەنيەت مينيسترىنە «قازاقانيماتسيا» شىعارماشىلىق بىرلەستىگى اياسىندا جاسالعان 20 جوبا تانىستىرىلدى. سونىمەن قاتار قازاقستاندىق مۋلتيپليكاتورلار انيماتسيا سالاسىنداعى حالىقارالىق ارىپتەستەرىمەن مەموراندۋمدارعا قول قويدى.
الداعى جىلى ۇلتتىق انيماتسيا ونەرىنىڭ اتاسى امەن قايداردىڭ تۋعانىنا 100 جىل تولماق. سونىڭ ايعاعىنداي وسىناۋ عاسىرلىق مەرەيتوي قارساڭىندا «قازاقانيماتسيا» شىعارماشىلىق بىرلەستىگىندە ۇلتتىق كينونى قولداۋ مەملەكەتتىك ورتالىعىنىڭ تاپسىرىسىمەن «امەن اعانىڭ عاجايىپ بايتەرەگى» اتتى قىسقامەتراجدى مۋلتفيلم ءتۇسىرىلدى.
