الاياقتارمەن كۇرەس ماقساتىندا اۋىسپالى ابونەنتتىك نومىرلەردەن تۇسەتىن قوڭىراۋلاردى بۇعاتتاۋ تەتىكتەرى پىسىقتالۋدا. وسى رەتتە ازاماتتاردىڭ الاياقتارعا قارسى ساۋاتتىلىعىن ارتتىرۋ ماقساتىندا, اقپاراتتىق ءتۇسىندىرۋ جۇمىستارى قولعا الىنعان.
سونداي-اق ىشكى ىستەر مينيسترلىگى مەملەكەت باسشىسىنىڭ شەتەلدىك اۆتوموبيلدەردى زاڭداستىرۋ تاپسىرماسىن ىسكە اسىرۋ بويىنشا شارالار قابىلداۋدا. بۇل جۇمىس 2 كەزەڭگە ءبولىندى: ءبىرىنشى – زاڭناماعا ءتيىستى تۇزەتۋلەردى ەنگىزۋ; ەكىنشى – زاڭداستىرۋ ۇشىن تىكەلەي ءىس-شارالار ۇيىمداستىرۋ.
سونىمەن قاتار پارلامەنت سالىق كودەكسىنە تۇزەتۋلەردى قابىلدادى. ول زاڭداستىرۋعا جاتاتىن اۆتوكولىكتەردى باستاپقى تىركەۋ ءۇشىن تولەنەتىن الىمدى 200 مىڭ تەڭگە كولەمىندە بەلگىلەدى.
سونداي-اق تولەم باسقا زاڭ جوباسى شەڭبەرىندە ەكولوگيالىق كودەكسكە ۋتيليزاتسيالىق تولەمدى الىپ تاستاۋ بولىگىندە تۇزەتۋلەر ەنگىزەدى. ىشكى ىستەر مينيسترلىگى زاڭداستىرۋدى جۇرگىزۋدىڭ ءتارتىبىن, شارتتارى مەن مەرزىمدەرىن بەلگىلەيتىن ۇكىمەت قاۋلىسىنىڭ جوباسىن ازىرلەۋدە.
مينيسترلىك بيىلعى قىركۇيەكتەن باستاپ بۇقارالىق اقپارات قۇرالدارىندا جانە الەۋمەتتىك جەلىلەردە, سونداي-اق شەتەلدىك اۆتوكولىك يەلەرىمەن ءتيىستى ءتۇسىندىرۋ جۇمىستارىن جۇرگىزۋدە.
«سونىمەن قاتار ىشكى ىستەر مينيسترلىگىمەن بىرگە قارجى مينيسترلىگى كەدەندىك دەكلاراتسيالاۋ ماسەلەلەرى بويىنشا, سونداي-اق يندۋستريا جانە ينفراقۇرىلىمدىق دامۋ مينيسترلىگى كولىك قۇرالدارىنا تەحنيكالىق تالاپتار بويىنشا ءتۇسىندىرۋ جۇمىستارىن جۇرگىزۋى قاجەت», دەدى ىشكى ىستەر ءمينيسترى مارات احمەتجانوۆ.
