– قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ تاتارستان رەسپۋبليكاسىمەن جان-جاقتى ىنتىماقتاستىق ورناتۋعا ەرەكشە ءمان بەرۋدە. ون جەتى جىل بۇرىن كوكشەتاۋدا تاتارستانمەن بىرلەسكەن العاشقى «كاماز» كاسىپورنى ىسكە قوسىلعان بولاتىن. قازىرگى كۇنى ول جۇك كولىكتەرىن, ارنايى تەحنيكالاردى شىعارادى. بۇل ىنتىماقتاستىق كەڭەيىپ كەلەدى. قوستاناي قالاسىندا بىلىكتەردى, رەدۋكتورلاردى شويىننان قۇيۋ بويىنشا بىرلەسكەن زاۋىت اشىلدى. بۇگىن شينا شىعاراتىن «تاتنەفت» كومپانياسىمەن بىرلەسكەن جوبانى ىسكە قوسامىز. بۇل – ءبىز ءۇشىن بىرەگەي جوبا. شينا شىعاراتىن تۇڭعىش ونەركاسىپ ەكەنىن اتاپ وتكەن ءجون. بۇل ءوندىرىس كولىك ونەركاسىبىنىڭ سۇرانىسىمەن قاتار, جەكەلەگەن كولىكقۇمارلاردىڭ سۇرانىسىن وتەيتىن بولادى. كاسىپورىن زاماناۋي بارلىق تالاپقا تولىق جاۋاپ بەرەدى, – دەدى رومان سكليار.
اتالعان زاۋىت ونەركاسىپ وركەندەۋى ءۇشىن قانداي ماڭىزدى بولسا, مونوقالالاردى دامىتۋدا دا سونداي مانگە يە. ويتكەنى ءوندىرىستىڭ تولىق جەلىسى ىسكە قوسىلعاندا ساران قالاسىنىڭ مىڭنان اسا ادامى جۇمىسپەن قامتىلادى. 171 ملرد تەڭگە ينۆەستيتسيا قۇيىلعان زاۋىت ساراننىڭ يندۋستريالىق ايماعىندا ورنالاسقان.
تاتارستان پرەزيدەنتى رۋستام ميننيحانوۆ زاۋىتتىڭ مەجەسى جىلىنا 3 500 ملن دانا دوڭعالاقپەن شەكتەلىپ قالمايتىنىن جەتكىزدى. ونىڭ ايتۋىنشا, ءالى دە زور الەۋەت بار.
– ۇسىنىلاتىن جۇمىستاردىڭ ەڭبەكاقىسى جوعارى جانە ماماندار كاسىبي تۇرعىدان بىلىكتى. قازاقستاننىڭ نارىقتاعى ىشكى سۇرانىسىن قامتىپ, ورتالىق ازيا جانە الىس شەتەلگە ەكسپورتقا شىعارۋعا مۇمكىندىگى بار. قازاقستان ءبىزدىڭ شەتەلدىك سەرىكتەسىمىز رەتىندە قالا بەرەدى. ىنتىماقتاستىق اياسىنىڭ كەڭدىگى قۋانتادى. ءبىزدىڭ ءالى دە اۋقىمدى جوبالارىمىز بار, – دەدى رۋستام ميننيحانوۆ.
قىسقا مەرزىمدە بوي كوتەرگەن زاۋىت ماماندارىن نيجنەكامسك قالاسىنداعى كاسىپورىنداردا ارنايى وقىتىپ الدى. بىلىكتى ماماندار قاتارى تولىعا تۇسپەك.
«تاتنەفت» جاق باس ديرەكتورى نايل ماگانوۆ ادەتتە مۇنداي زاۋىتتاردىڭ 50-60 اي بويى سالىناتىنىن ايتادى. ال قاراعاندى زاۋىتى 16 ايدا تۇرعىزىلدى.
– بۇل ءبىرىنشى كەزەڭ عانا. جوسپاردا جەلىلىك وندىرىستەر بار. ءىرى كولەمدى شينالار شىعارۋ مىندەتى تۇر. مۇنىڭ ءبارى قازاقستاننىڭ ينۆەستيتسيالىق كليماتى مەن قازاقستان باسشىلىعىنىڭ قولداۋىنىڭ ارقاسىندا ىسكە استى. ءبىز ءتيىمدى ىنتىماقتاستىق ورناتقان قاراعاندى وبلىسى, ساران قالاسى اكىمدىكتەرىنە ريزاشىلىق بىلدىرەمىز, – دەدى نايل ماگانوۆ.
ينۆەستور ءونىمنىڭ الەمدىك برەندتەرمەن تەرەزەسى تەڭ ءتۇسىپ, ساپا جاعىنان سۇرىنبەيتىنىنە كەپىلدىك بەرىپ وتىر.
زاۋىت ديرەكتورى الەكساندر سمىشلياەۆ العاشقى شينا الۋ ارقىلى تەحنولوگيالىق ءۇردىس باقىلانىپ, ءونىمنىڭ سىناقتان وتكەنىن مالىمدەدى. ياعني قۇرىلعىلاردىڭ جولعا قويىلىپ, تەحنولوگيالاردىڭ دايىندىعىنا, قۇرال-جابدىقتاردىڭ تولىق ىسكە قوسىلۋىنا ءبىرشاما ۋاقىت كەرەك.
– سەريالى ءونىم الۋعا بارلىق ءۇردىس ىسكە قوسىلعاندا قول جەتكىزۋگە بولادى. ال بۇل – 2023 جىلدىڭ ءۇشىنشى توقسانى. سول كەزەڭدە زاۋىت 3 500 ملن شينا شىعارادى, – دەيدى ديرەكتور.
زاۋىت باسشىسىنىڭ ايتۋىنشا, ءار دوڭعالاق ءۇش كەزەڭدى تەكسەرىستەن وتەدى. بىردە-ءبىر دوڭعالاق ساپا ينسپەكتسياسىنان وتپەيىنشە تۇتىنۋشىعا جىبەرىلمەيدى.
بۇگىنگى تاڭدا كەلىسىمشارتتار جاسالعان. ءونىمنىڭ قانشاسى ىشكى نارىققا, قانشاسى ەكسپورتقا شىعاتىنى دا ەسەپتەۋلى. زاۋىتقا ەۋروپا, ازيا ەلدەرىنىڭ وزىق قۇرال-جابدىقتارى جەتكىزىلگەن. 9 شەتەلدىك جەتكىزۋشى بار. قۇرىلعىلاردى ورناتۋ كەزەڭ-كەزەڭىمەن جۇزەگە اسىپ وتىر.
قاراعاندى وبلىسى,
ساران قالاسى
