سالتاناتتى بەزەندىرىلگەن تەاتردىڭ باس زالىندا فەستيۆال پرەزيدەنتى ارداق امىرقۇلوۆ پەن باعدارلاما ديرەكتورى گۇلنار ابىكەەۆا قۇتتىقتاۋ سوزىمەن حالىقارالىق ءىس-شارانىڭ شىمىلدىعىن ءتۇردى. مادەنيەت جانە سپورت ءمينيسترى داۋرەن اباەۆتىڭ قاتىسۋشىلارعا شىعارماشىلىق جەتىستىك پەن جەمىستى جيىن, جاقسى كوڭىل كۇي تىلەگەن كىرىسپە سوزىنەن سوڭ «ەۋرازيا» بايقاۋ باعدارلامالارىنا قاتىساتىن بارلىق ءفيلمدى قامتيتىن ترەيلەر كورسەتىلدى.
سونداي-اق كورەرمەندەر قازىلار القاسىنىڭ مۇشەلەرىمەن تانىستى. ءبىر قىزىعى, ساحناعا شىققان شەتەلدىك قوناقتار الدىمەن قازاق تىلىندە كەم دەگەندە ەكى اۋىز ءسوز ايتىپ, ۇلتقا دەگەن ءوز قۇرمەتىن بىلدىرۋگە تىرىسىپ جاتتى.
سالتاناتتى ءىس-شارانىڭ باستى توسىنسىيى – فەستيۆالدىڭ ارنايى جۇلدەلەرىنىڭ تابىستالعانى. «ورتالىق ازيا كينەماتوگرافىنىڭ دامۋىنا قوسقان ۇلەسى ءۇشىن» جۇلدەسىن اتاقتى وزبەك رەجيسسەرى ءالي حامراەۆ يەلەندى, ول وسى فەستيۆالدە حالىقارالىق بايقاۋدىڭ قازىلار القاسىن باسقارادى. 85 جاستاعى وزبەك كينوسى شەبەرىنىڭ ساحنادا تولقىپ تۇرىپ ايتقان لەبىزى كوپشىلىكتى تەبىرەنتپەي قويمادى: «بۇگىن قازاقستان جەرىنە مەرەكە كەلدى – الەمدىك كينو وكىلدەرى سىزدەردىڭ شاڭىراعىڭىزدا قوناقتا. مەنىڭشە, قيىن كەزەڭدە باسقا حالىقتاردى قۇشاعىن اشىپ قارسى الاتىن ادامدار كەرەمەت! ەڭ باستىسى, «ەۋرازيا» فەستيۆالى ءومىر سۇرەدى. ءبىز ونى ساعىندىق. فەستيۆالگە جانە قازاقستانعا ساتتىلىك!»
تاعى ءبىر ارنايى سىيلىق – «قازاق كينەماتوگرافىنا قوسقان ۇلەسى ءۇشىن» – مادەنيەتتانۋشى جانە قوعام قايراتكەرى مۇرات اۋەزوۆكە تابىستالدى.
فەستيۆالدىڭ اشىلۋ سالتاناتىنا دەيىن العاشقى ءباسپاسوز ءماسليحاتى ءوتىپ, بيىلعى اۋقىمدى مادەني ءىس-شارانىڭ جاڭالىقتارى اتالىپ ءوتتى. گۇلنار ابىكەەۆانىڭ ايتۋىنشا, بيىلعى فەستيۆالگە بەلگىلى كينو ساڭلاقتارىنان تۇزىلگەن قازىلار القاسى تورەلىك ەتەدى. وتكەن جىلدارمەن سالىستىرعاندا باعدارلاما مازمۇنى دا بايىتىلىپ, جان-جاقتى سيپات الا باستادى. «ەگەر وتكەن كەزەڭدە «ديناميكالى دامىپ كەلە جاتقان قازاق كينوسى», سودان كەيىن «ديناميكالىق قازاق كينوسى» باعدارلامالارى بولسا, قازىر ءبىزدىڭ كينەماتوگراف حالىقارالىق بايقاۋمەن تەڭ جەكە ۇلتتىق كونكۋرس وتكىزۋگە مۇمكىندىك بەرەتىن دەڭگەيگە جەتتى. XVI «ەۋرازيا» كينوفەستيۆالىنىڭ باستى ەرەكشەلىگى مەن جاڭالىعى – وسى».
بايقاۋ باعدارلامالارى دەڭگەيىنىڭ وسكەنىنىڭ ءبىر دالەلى – بايگەگە قاتىساتىن ءتورت كارتينانىڭ ءوز ەلدەرىنەن «وسكار» سىيلىعىنا ۇسىنىلعاندىعى. سونىمەن قاتار فەستيۆالدە بىردەن ءتورت الەمدىك پرەمەرا وتەدى.
نەگىزگى ءىس-شارامەن قاتار كينوپارك, Forum كينوتەاترىندا فيلم كورسەتىلىمدەرى باستالدى. حالىقارالىق بايقاۋدان «يل بوەمو» (چەحيا – يتاليا – سلوۆاكيا; رەجيسسەر پەتر ۆاتسلاۆ) جانە «ايەل» (قىتاي; رەجيسسەر ۆان چاو) فيلمدەرى كورسەتىلدى. ۇلتتىق بايقاۋدان – «تاۋ پيازى» (رەجيسسەر ەلدار شيبانوۆ), «زەرە» (رەجيسسەر داۋرەن قامشىباەۆ) جانە «وت» (رەجيسسەر ايجان قاسىمبەك). ال «ەرەكشە وقيعا» كونكۋرستان تىس باعدارلاماسى بولگار رەجيسسەرى, ۇلتتىق بايقاۋدىڭ قازىلار القاسىنىڭ مۇشەسى ميلكو لازاروۆتىڭ «اگا» كارتيناسىمەن اشىلدى.
الماتى
