سۋرەتتى تۇسىرگەن ەرلان ومار, «ەQ»
بيىل 15 شىلدە مەن 15 قازان ارالىعىندا ۇيىمداستىرىلعان بايقاۋعا بارلىعى 405 ءوتىنىم كەلىپ تۇسكەن. جوبانىڭ نەگىزگى ماقساتى – بالالارعا ارنالعان وتاندىق شىعارمالاردى دارىپتەۋ, بالالار اندەرى مەن ولەڭدەرىنىڭ رەپەرتۋارىن تولىقتىرۋ. سونداي-اق ەلىمىزدەگى بالالار كومپوزيتورلارى مەن اقىندارىنىڭ شىعارمالارىن ناسيحاتتاۋ. ولاردى بالاباقشالار مەن مەكتەپتەرگە, بالالارعا ارنالعان مۋزىكا مەكەمەلەردە, مەكتەپكە دەيىنگى جانە مەكتەپ ۇيىمدارىنا, شالعايداعى اۋىلدىق كىتاپحانالارعا قولجەتىمدى ەتۋ.
تارتىستى باسەكەدە قۇرمانعازى اتىنداعى قازاق ۇلتتىق كونسەرۆاتورياسى حور ديريجەرلەۋ ءبولىمىنىڭ تۇلەگى, «تانداۋ» كومپانياسىنىڭ مۋزىكالىق پروديۋسەرى, كومپوزيتور ەلميرا دەحگاني ۇزدىك تانىلىپ گران-ءپريدى جەڭىپ الدى.
«بايقاۋ ۇيىمداستىرۋشىلارىنا العىسىمدى بىلدىرەمىن. بالالار اندەرى, جالپى, شىعارماشىلىعى ەندى تانىلا باستاعان اقىن-كومپوزيتورلار ارقىلى ودان ءارى قاناتىن كەڭگە جايادى. وسىلايشا, بۇل باعىت جاڭاشا سەرپىنمەن داميدى دەپ ويلايمىن», دەيدى ە.دەحگاني.
«بالالارعا ارنالعان ءان» نوميناتسياسى بويىنشا ءالىبي ءابدىنۇروۆ ءبىرىنشى ورىندى يەلەندى. جۇلدەلى ەكىنشى ورىن سامات رىسپانبەتوۆ پەن بەكجان قايرات ۇلىنا بۇيىردى. باۋىرجان ەسەباەۆ پەن نۇريسلام دوسپاي ءۇشىنشى ورىننان كورىندى.
«بالالار پوەزياسى» نوميناتسياسى بويىنشا جادىرا بايبۇلانوۆا ءبىرىنشى ورىندى قانجىعاسىنا بايلادى. ەكىنشى ورىندى سەرىكبول حاسانوۆ پەن دوستىق تىلەۋبەرگەنوۆ يەلەندى. بايانعالي ءالىمجانوۆ پەن نازيرا بەردالى ءۇشىنشى ورىنعا تابان تىرەدى.
بايقاۋعا قاتىسۋشىلاردىڭ كاسىبي بىلىگى مەن جاس ەرەكشەلىكتەرىنە شەكتەۋ قويىلماعان. جەڭىمپازداردى ماراپاتتاۋ گالا-كونتسەرتى ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرت زالىندا ءوتتى. جيىنعا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسى توراعاسىنىڭ ورىنباسارى سالتانات تۇرسىنبەكوۆا ۇزدىك تانىلعانداردى قۇتتىقتاپ, ءىس-شارانىڭ ماڭىزىنا توقتالدى.
«بۇل بايقاۋدى مەملەكەت باسشىسى جاريالاعان بالالار جىلىندا وتكىزۋدىڭ ءمانى ەرەكشە. وتانعا دەگەن سۇيىسپەنشىلىككە, جوعارى پاتريوتتىق نيەتكە وڭ كوزقاراستى قالىپتاستىراتىن مادەني ونىمدەردى قۇرۋ كەرەك. بۇل ىسكە ونەر تۋىندىلارى ارقىلى ۇلەس قوسقىسى كەلەتىن وتاندىق اۆتورلاردى قولداۋدىڭ دا ماڭىزى زور. كونكۋرسقا 400-دەن اسا ءوتىنىشتىڭ ءتۇسۋى قوعامدا رۋحاني-ادامگەرشىلىك جاعىنان وسۋگە جانە ءوزىن-ءوزى جۇزەگە اسىرۋعا سۇرانىستىڭ ارتىپ كەلە جاتقانىن كورسەتەدى», دەدى س.تۇرسىنبەكوۆا.
ايتا كەتەيىك, بايقاۋدىڭ قازىلار القاسى قۇرامىنا بەلگىلى ەڭبەك سىڭىرگەن مادەنيەت جانە ونەر قايراتكەرلەرى, قوعام قايراتكەرلەرى, مەملەكەتتىك ۇيىمداردىڭ وكىلدەرى كىردى.
