وتىرىستى اشقان سەنات توراعاسى ماۋلەن اشىمباەۆ ەكى ەل اراسىنداعى ىنتىماقتاستىقتى ودان ءارى نىعايتۋ ءۇشىن پارلامەنتتەردىڭ ءوزارا جۇمىسىن ودان ءارى جانداندىرۋ ماڭىزدى ەكەنىن ايتتى.
كەزدەسۋ بارىسىندا دەپۋتاتتار قازاقستان-رەسەي ىنتىماقتاستىعىن نەگىزگى باعىتتار بويىنشا دامىتۋ پەرسپەكتيۆالارىن تالقىلادى. ونىڭ ىشىندە ءبىلىم, ترانزيتتىك-كولىكتىك الەۋەت, وڭىرارالىق جانە شەكارا ماڭىنداعى ىنتىماقتاستىق ماسەلەلەرى بار. كوميسسيا مۇشەلەرى اۆتوجول ينفراقۇرىلىمىن بىرلەسىپ دامىتۋ ىسىنە دە ەرەكشە نازار اۋداردى. سونداي-اق شەكاراداعى وتكىزۋ پۋنكتتەرىن دامىتۋ, ولاردى زاماناۋي ينسپەكتسيالىق-تەكسەرۋ كەشەندەرىمەن جابدىقتاۋ جانە شەكارا ماڭىنداعى ينفراقۇرىلىمدى جاقسارتۋ ماسەلەلەرى دە نازاردان تىس قالعان جوق.
كوميسسيانىڭ قازاقستان تاراپىنان تەڭ توراعاسى, سەنات ۆيتسە-سپيكەرى اسقار شاكىروۆ الدا تۇرعان مىندەتتەردى ساپالى پىسىقتاۋ ءۇشىن پارلامەنتارالىق ءوزارا ءىس-قيمىلدى جان-جاقتى دامىتۋدىڭ ماڭىزدى ەكەنىن تىلگە تيەك ەتتى. ءوز كەزەگىندە فەدەراتسيا كەڭەسى توراعاسىنىڭ ءبىرىنشى ورىنباسارى, كوميسسيانىڭ رەسەي تاراپىنان تەڭ توراعاسى اندرەي ياتسكين ارىپتەستەرىنە بىرقاتار وزەكتى ماسەلەنى جان-جاقتى تالقىلاعانى ءۇشىن العىسىن ءبىلدىرىپ, بارلىق سالاداعى ەكىجاقتى ىنتىماقتاستىقتى ءارى قاراي دامىتۋ ءۇشىن بەلسەندى جۇمىس ىستەۋگە دايىن ەكەنىن جەتكىزدى.
