اۋىل شارۋاشىلىعى مينيسترلىگى تاراتقان رەسمي مالىمەتكە سۇيەنسەك, 2022 جىلعى قاڭتار-قىركۇيەك ارالىعىندا قاراقۇمىق جارماسى ءوندىرىسىنىڭ كولەمى وتكەن جىلدىڭ ۇقساس كەزەڭىمەن سالىستىرعاندا 66,9 پايىزعا ۇلعايعان.
بۇل رەتتە وتاندىق 11 كاسىپورىن 30 مىڭ تونناعا جۋىق قاراقۇمىق شىعارعان. اتالعان جارمانىڭ ورتاشا جىلدىق تۇتىنۋ كولەمى 29,1 مىڭ توننانى قۇرايدى. وسىلايشا, ءبىر جىلعا تولمايتىن ۋاقىت ىشىندە وتاندىق وندىرۋشىلەر ىشكى نارىقتى قاراقۇمىقپەن تولىق قامتاماسىز ەتتى.
قاراقۇمىقتىڭ نەگىزگى وندىرۋشىلەرى پاۆلودار, شىعىس قازاقستان جانە قوستاناي وبلىستارىندا شوعىرلانعانىن اتاپ ءوتۋ كەرەك.
سونداي-اق جۇيەلى جۇمىستىڭ ناتيجەسىندە قاراقۇمىق يمپورتى بيىل 80 پايىزعا تومەندەپ, 600 توننانى قۇرادى. مىسال رەتىندە ايتار بولساق, 2021 جىلدىڭ قاڭتارىنان قىركۇيەگىنە دەيىن ەلگە 3 مىڭ تونناعا جۋىق قاراقۇمىق جارماسى اكەلىنگەن.
