ءبىر قايتا جۇكتەۋ كولەمىندەگى (30 توننادان استام تومەن بايىتىلعان ۋران) جىلۋ بولەتىن قۇرامالار ورنالاستىرىلعان 34 كولىكتىك-وراۋ كونتەينەرى بار تەمىرجول پلاتفورمالارى مامانداندىرىلعان كۇزەتپەن بىرگە قىتايداعى اتوم ەلەكتر ستانساسىنا جەتكىزىلدى. تۇپكىلىكتى تۇتىنۋشى – قىتايدىڭ CGNPC-URC يادرولىق كورپوراتسياسى ءونىمدى ويداعىداي قابىلداپ الدى.
– اتوم ەلەكتر ستانساسى ءۇشىن يادرولىق وتىن ءوندىرۋ جونىندەگى يننوۆاتسيالىق جوبانى ىسكە اسىرۋ – «قازاتومونەركاسىپتىڭ» الەمدىك كليماتتىڭ وزگەرۋىنىڭ سالدارىن جۇمسارتۋعا جانە تومەن كومىرتەكتى دامۋ جونىندەگى جاھاندىق ماقساتقا قول جەتكىزۋگە قوسقان ۇلەسى. ء«ۇلبى-جبق» زاۋىتى «قازاتومونەركاسىپكە» ءوندىرىستى ارتاراپتاندىرۋعا, جەلىنى كەڭەيتۋگە جانە قوسىلعان قۇنى جوعارى تەحنولوگيالىق, ەكسپورتقا باعدارلانعان ۋران ونىمدەرىن شىعارۋعا مۇمكىندىك بەردى. قىتايلىق سەرىكتەستەرگە ءونىمدى ءساتتى جەتكىزۋ «قازاتومونەركاسىپتىڭ» الەمدىك يادرولىق وتىن نارىعىندا سەنىمدى ءارى ارتىقشىلىققا يە جەتكىزۋشى رەتىندەگى بەدەلىن راستادى, – دەدى «قازاتومونەركاسىپ» ۇلتتىق اتوم كومپانياسى» اق باسقارما توراعاسى ەرجان مۇقانوۆ.
جوبا اتوم ونەركاسىبى سالاسىنداعى الەمنىڭ جەتەكشى كومپانيالارىنىڭ تابىستى كوپجاقتى ىنتىماقتاستىعىنىڭ جاقسى ۇلگىسى بولىپ سانالادى. جىلۋ بولەتىن قۇرامالاردىڭ وندىرىسىندە ءۇلبى مەتاللۋرگيا زاۋىتىندا قايتا وڭدەلگەن قازاقستاندا وندىرىلگەن ۋران شيكىزاتى پايدالانىلادى.
– ء«ۇلبى-جبق» زاۋىتىنىڭ ۇجىمىن جانە قىتايدان كەلگەن سەرىكتەستەرىمىزدى وسى ءبىر ۇلكەن وقيعامەن قۇتتىقتايمىن. دايىن ءونىمدى العاشقى جونەلتۋ جىلۋ بولەتىن قۇرامالاردىڭ تۇراقتى جەتكىزىلىمدەرىنىڭ باستالۋىن بەلگىلەدى. بۇل ءبىزدىڭ كاسىپورىندار ءۇشىن عانا ەمەس, سونىمەن قاتار قازاقستان مەن قىتاي ءۇشىن بەيبىت اتومدى يگەرۋدە وتە ماڭىزدى, – دەدى ء«ۇلبى مەتاللۋرگيا زاۋىتى» اق باسقارما توراعاسى سەرگەي بەجەتسكي.
ء«ۇلبى-جبق» زاۋىتىنىڭ باس ديرەكتورى ارمان سۇلەيمەنوۆ دايىن ءونىمدى وندىرۋگە جانە تۇتىنۋشى – قىتاي حالىق رەسپۋبليكاسىنا العاشقى پارتيانى جەتكىزۋگە قاتىسقان ارىپتەستەرىنە العىس ايتتى. ول تۇپكىلىكتى تۇتىنۋشى وكىلدەرىنىڭ قاتىسۋىمەن ء«ۇلبى-جبق» زاۋىتى, ءۇلبى مەتاللۋرگيا زاۋىتى جانە URC-Logistics قىزمەتكەرلەرى كومانداسىنىڭ ۇيلەسىمدى جۇمىسى تاريحي وقيعانى جۇزەگە اسىرۋعا كومەكتەسكەنىن اتاپ ءوتتى.
ء«ۇلبى-جبق» زاۋىتى 2021 جىلدىڭ قاراشا ايىندا Framatome فرانتسۋز كومپانياسىنىڭ AFA 3G ديزاينىنداعى جىلۋ بولەتىن قۇرامالاردى ءوندىرۋ تەحنولوگياسىنىڭ يەسى تاراپىنان سەرتيفيكاتتاۋدان ءوتىپ, ءونىمنىڭ تۇپكىلىكتى تۇتىنۋشىسى – CGNPC-URC قىتاي يادرولىق كورپوراتسياسى تاراپىنان سەرتيفيكاتتالعان يادرولىق وتىن جەتكىزۋشىسى رەتىندە تانىلعاننان كەيىن ىسكە قوسىلدى. بۇل اتوم ەلەكتر ستانسالارى ءۇشىن يادرولىق وتىن شىعارۋ بويىنشا قازاقستانداعى جالعىز ءوندىرىس جانە 20 جىل كەپىلدى وتكىزۋ نارىعى بار. زاۋىتتىڭ قۋاتى – تومەن بايىتىلعان ۋرانعا ەسەپتەگەندە جىلىنا – 200 توننا.
«قازاتومونەركاسىپ» يننوۆاتسيالىق ءوندىرىسىنىڭ ىسكە قوسىلۋى قازاقستانعا اتوم ستانسالارى ءۇشىن يادرولىق وتىن ءوندىرۋشى جانە جەتكىزۋشى مەملەكەتتەردىڭ شەكتەۋلى شەڭبەرىنە كىرۋگە مۇمكىندىك بەرىپ, ەلىمىزدىڭ اتوم سالاسىن دامىتۋ جانە وسى باعىتتا باسقا ەلدەرمەن ىنتىماقتاستىق پەرسپەكتيۆالارى بويىنشا جاڭا مۇمكىندىكتەر اشتى.
جىلۋ بولەتىن قۇرامالار – ينجەنەرلىك قۇرىلىم. ونىڭ جاقتاۋىنا جىلۋ بولەتىن ەلەمەنتتەر (تۆەلدەر) – ۋران تابلەتكالارىمەن تولتىرىلعان تۇتىكتەر ورنالاستىرىلادى. بۇل قۇرامالار اتوم ەلەكتر ستانساسى ءۇشىن وتىن بولىپ سانالادى. تۆەلدەرگە ارنالعان ۋران تابلەتكالارىن ءۇلبى مەتاللۋرگيا زاۋىتى دايىندايدى.
