سارىوزەكتەگى شابۋىلداۋشىلار قۇراماسىنىڭ باتالون سەرجانتى ەربول 2019-2020 جىلدارى بۇۇ ليۆانداعى ۋاقىتشا كۇشتەرىنىڭ شىعىس سەكتورىندا بىتىمگەرلىك قىزمەت اتقارعان ەكەن.
جالپى, قازاق بىتىمگەرلەرى 2018 جىلعى قازان ايىنان بەرى يزرايل مەن وڭتۇستىك ليۆان شەكاراسىندا ورنالاسقان UNIFIL ميسسياسىنا قاتىسىپ كەلەدى. اتاپ ايتقاندا, وندا ءبىزدىڭ جىگىتتەر ءۇندى بىتىمگەرلەرىمەن بىرلەسىپ, جەرگىلىكتى جەردى جاياۋ جانە ءموبيلدى پاترۋلدەۋدى, توسقاۋىل بەكەتتەرىنىڭ جۇمىسىن ۇيىمداستىرۋدى, بازالاردى كۇزەتۋ مەن ءتۇرلى وپەراتسيانى جۇرگىزۋدى جۇزەگە اسىرادى.
بەيبىتشىلىك پەن قاۋىپسىزدىكتى قولداۋشى قازاقستاندىق «كوگىلدىر كاسكالاردىڭ» ليۆانداعى ءۇشىنشى قۇرامى ساپىندا قىزمەت ەتكەن ەربول باۋىرىمىزدىڭ جەرگىلىكتى اسكەريلەرگە جاساعان ەرەكشە تارتۋى جايلى ميسسياعا قاتىسۋشىلار ريزاشىلىقپەن ايتادى.
– كوپۇلتتى كۇشتەر قولباسشىلىعىنان بىتىمگەرلەر تۇراتىن كازارما قابىرعاسىنا مۋرال سالۋ تۋرالى ۇسىنىس ءتۇستى. بۇل جاۋاپتى تاپسىرمانى قۋانا قابىلدادىم, – دەيدى ءىى سىنىپتى سەرجانت ەربول راباتوۆ. – ميسسياداعى نەگىزگى مىندەتتەرىمدى اتقارۋدان قولىم بوساعان كەزدە جۇمىسقا بار ىنتا-جىگەرمەن كىرىستىم.
ەكى اپتادا دايىن بولعان بىتىمگەرلەردىڭ بىرلەسكەن قيمىلى بەينەلەنگەن مۋرال كوپ-ۇلتتى كۇشتەردىڭ كوڭىلىنەن شىقتى. سونادايدان ەرەكشە كوز تارتاتىن تۋىندى, ءتىپتى بۇۇ باسشىلىعىنىڭ دا قىزىعۋشىلىعىن تۋعىزعان. ەربولدىڭ قۇرمەتىنە ليۆاندا شاعىن سۋرەت كورمەسى ۇيىمداستىرىلىپ, ميسسيا قولباسشىلىعى جەرلەسىمىزگە العىسحات تاپسىرىپ, باعالى سىيلىقپەن ماراپاتتاعان.
ۇندىستاندىق بولىمشە كومانديرى پولكوۆنيك نارايان سينح اميت «سۋرەتتىڭ كوشىرمەسىن سالىپ بەرىڭىز» دەپ قولقالاپتى. بۇل ءوتىنىشتى دە قۇپ العان جەرلەسىمىزگە تاعى ەكى اپتا ۋاقىتىن شىعارماشىلىققا ارناۋعا تۋرا كەلگەن. كەنەپكە مايلى بوياۋمەن سالىنعان كارتينانى پولكوۆنيك ەلىنە جەتكەن سوڭ ءۇندىستان قارۋلى كۇشتەرىنىڭ اسكەري مۇراجايىنا وتكىزىپتى. قازاق ساربازى سالعان سۋرەتتىڭ مۋزەيدەن تابىلۋ تاريحى وسىنداي.
ەربول بالا كۇنىنەن سۋرەت سالۋعا بەيىم بولىپ وسكەن. ءتىپتى ءۇيدىڭ قابىرعالارىن قيالىنداعى كەيىپكەرلەرىمەن تولتىرىپ تاستايتىن كۇندەرى كوپ بولاتىن. بالاسىنىڭ ونەرگە قۇشتارلىقتان تۋعان بۇل قىلىعىنا اناسى دا قاباق شىتقان ەمەس. مەكتەپتە وقىپ جۇرگەنىندە سۋرەت پانىنەن ساباق بەرەتىن مۇعالىمى امانجول بەكسۇلتانوۆ ونى كوركەمسۋرەت ۇيىرمەسىنە قابىلداپ, تالانتىن اشۋعا سەپ بولدى. جەتىنشى سىنىپتا جاس سۋرەتشىلەر اراسىندا وتكەن بايقاۋدا ءبىرىنشى ورىن الىپ, جاقىندارىن قۋانتقانى بار. سول جولى جەڭىمپاز بالاعا اسەم الماتىنى كورۋ باقىتى بۇيىردى.
بۇگىندە اسكەري ءوتىلى 20 جىلدان اساتىن ەربول راباتوۆ قولى قالت ەتكەندە شەبەرحاناسىنان تابىلادى. تۋعان جەرىنىڭ تابيعاتىن قالاي سۇيسە, قىلقالامىن دا سولاي قاستەرلەي بىلگەن سۋرەتشىنىڭ تاقىرىبى ءار الۋان. كارتينالارى ۇلتتىق بوياۋعا قانىق.
ەربول – سپورت شەبەرىنە كانديدات. كەزىندە جاركەنتتەگى داۋلەت تۇرلىحانوۆ اتىنداعى گرەك-ريم كۇرەسى كلۋبىندا جاتتىعىپ, بىرقاتار دودادا توپ جارعانى بار.
سپورت پەن ونەردى جانىنا سەرىك ەتكەن سەگىز قىرلى, ءبىر سىرلى جىگىتتىڭ ۇنەمى شىعارماشىلىق ىزدەنىس ۇستىندە جۇرەتىنى بايقالادى. ولاي بولسا, ماقساتى ايقىن ەربولدىڭ بولاشاعى دا جارقىن بولارىنا ءبىز دە سەنىمدىمىز.
مۇحاربەك ماحامبەت,
اسكەري جۋرناليست
