جوعارىداعى جاعداي جالىنداپ ءوسىپ كەلە جاتقان جاستارمەن قاتار, بۇعان دەيىن كوبىنە-كوپ كولەڭكەدە قالىپ قويىپ جۇرگەن ساقا سپورتشىلارعا دا وسى جولى وزدەرىن تۇبەگەيلى مويىنداتۋعا جاقسى مۇمكىندىك تۋدىردى.
48 كيلو سالماق دارەجەسىندە تەمىرتاس ءجۇسىپوۆتىڭ فينالعا شىعۋى ەشكىمدى تاڭداندىرا قويماعانى انىق. كەلەسى ايدىڭ بەل ورتاسىندا 35 جاسقا تولعالى وتىرعان ءجۇسىپوۆ بۇعان دەيىن تەك قۇرلىقتىق دەڭگەيدەگى دودالاردا دارالانسا, بىلتىر بەلگرادتا الەم چەمپيونى اتاندى. وسى ورايدا, 33 جاستان اسقان شاعىندا وسىنداي بيىك بەلەستى باعىندىرعان بوكسشىلار تەك ءبىزدىڭ ەلدە عانا ەمەس, كۇللى الەمدە كەمدە-كەم ەكەنىن دە ايتا كەتكەن ابزال. ءوزىنىڭ مول تاجىريبەسى مەن جەڭىسكە دەگەن ەرەكشە جىگەرىنىڭ ارقاسىندا ءجۇسىپوۆ پاۆلوداردا بۇل بەلەستى التىنشى مارتە باعىندىردى. فينالدا ول وزىنەن 14 جاس كىشى الماتىلىق ەرنۇر قايراتتى قاپى قالدىردى.
51 كيلو سالماقتىڭ ءفاۆوريتى ورالدىق دانيال ءسابيت ەكەنى ءسوزسىز. 2020 جىلى نەبارى 18 جاسىندا ەرەسەكتەر اراسىندا ەل چەمپيونى اتانىپ, بىلتىر ازيا بىرىنشىلىگىندە كۇمىس مەدالدى يەلەنگەن دارىندى جاس اقتىق سايىستا دامير ابدىقادىرمەن قولعاپ ءتۇيىستىردى. الماتى وبلىسىنىڭ وكىلى دە وسال ەمەس-ءتى. بۇرىندارى اۋىز تولتىرىپ ايتارلىقتاي تابىستارعا قول جەتكىزە الماسا دا, ءدال وسى جارىستىڭ جارتىلاي فينالىندا ول الەم چەمپيوناتى مەن دۇنيەجۇزىلىك ۋنيۆەرسيادانىڭ قولا جۇلدەگەرى جومارت ەرجاندى جولىنان ىعىستىرىپ, جانكۇيەرلەر نازارىن بىردەن وزىنە اۋداردى. بويى مەن قولىنىڭ ۇزىندىعىن ۇتىمدى پايدالانىپ, وتە ساۋاتتى تاكتيكا ۇستانعان دامير دانيالدان ايلاسىن اسىرىپ, باس جۇلدەنى قانجىعاسىنا بايلادى.
54 كيلو سالماقتىڭ شەشۋشى تۇسىندا نۇرسۇلتان التىنبەك (قىزىلوردا) پەن بەكزات الدامجاروۆ (اقتوبە) قولعاپ ءتۇيىستىردى. 19 جاستاعى جاس ورەندەردىڭ ونەرى «بايانتاۋ» سپورت كەشەنىنە جينالعان جانكۇيەرلەردىڭ كوڭىلىنەن شىقتى. وتە تارتىستى وتكەن باسەكە سىر بويى سايىپقىرانىنىڭ پايداسىنا شەشىلدى.
ەربولات سابىر (پاۆلودار) مەن ورازبەك اسىلقۇلوۆ (اقمولا) اراسىنداعى جەكپە-جەكتە 57 كيلونىڭ ۇزدىگى انىقتالدى. بىلتىر سابىر جاستار اراسىنداعى الەم بىرىنشىلىگىنىڭ كۇمىس جۇلدەگەرى اتانسا, ورازبەك ەل چەمپيوناتىندا توپ جاردى. باسىنان اياعىنا دەيىن دامىلسىز شابۋىلمەن وتكەن باسەكەدە رينگتەگى تورەشى جەرگىلىكتى بىلعارى قولعاپ شەبەرىنىڭ قولىن كوتەردى. 60 كيلو سالماقتا قاراعاندىلىق تالعات سىرىمبەتوۆ الماتى وبلىسىنىڭ سپورتشىسى ەراسىل تاڭقايدى تىزە بۇكتىردى.
63,5 كيلو سالماق دارەجەسىندەگى ماڭعىستاۋلىق ءساناتالى تولتاەۆ پەن تۇركىستاندىق مۇحامەدسابىر بازارباي ۇلى اراسىنداعى ايقاستى كورۋگە ىنتالى كورەرمەندەردىڭ قاتارى كوپ بولدى. ونىڭ وزىندىك سەبەبى دە بار. وسىدان ءبىر اي بۇرىن عانا ازيا چەمپيوناتىندا كۇش سىناسقان 13 جەرلەسىمىزدىڭ تەك بىرەۋى عانا جەڭىس تۇعىرىنا كوتەرىلە الماعانىن جوعارىدا ايتتىق. ول ءداپ وسى ءساناتالى ەدى. جانە دە وسىدان بىرەر اي بۇرىن استانادا وتكەن ەلوردا كۋبوگىندە بازارباي ۇلى تولتاەۆتى ۇتقان. رينگتە بازارباي ۇلى قانشا جانتالاسقانىمەن, تاجىريبەلى تولتاەۆتىڭ وسال تۇسىن تابا المادى. بۇل تارتىستا كاسپي جالعالاۋىنان كەلگەن جىگىتتىڭ باسىمدىعى بايقالدى. كورشىلەس ءوڭىردىڭ وكىلدەرى – شىمكەنتتىك ابزال سەرىك پەن تۇركىستاندىق تەمىرحان تەزەك 67 كيلو سالماقتىڭ باس جۇلدەسىن ساراپقا سالدى. بۇل ايقاستا ابزالدىڭ اسىعى الشىسىنان ءتۇستى.
كوپشىلىك تاعاتسىزدانا كۇتكەن تاعى ءبىر قىزىقتى جەكپە-جەك 71 كيلو سالماق دارەجەسىندە ءوتتى. فينالدا سابىرجان اقحالىقوۆ (باتىس قازاقستان) پەن ەرماحان جاقپەكوۆ (اباي) كۇش سىناستى. ەكەۋىنىڭ دە ەسىمى جانكۇيەرلەرگە جاقسى تانىس. كەزىندە ولار جاستار رينگىندە جاسىنداي جارقىلداعان. جايىق جاعالاۋىنان كەلگەن جىگىت بىلتىر پولشانىڭ كەلتس قالاسىندا الەم چەمپيونى اتانسا, سەمەي ءوڭىرىنىڭ ورەنى وسىدان ءتورت جىل بۇرىن ماجارستاننىڭ باس شاھارى – بۋداپەشتتە وتكەن دۇنيەجۇزىلىك دودانىڭ كۇمىس مەدالىن يەلەندى. ايتقانداي-اق, باسەكە وتە شيەلەنىستى ءوتتى. دەسەك تە سابىرجانعا ەرەسەكتەر رينگىنە ءالى دە ءبىراز بەيىمدەلۋ كەرەكتىگى بايقالدى. بۇل باسەكەدە باسىمدىق ەرماحان جاعىندا بولدى.
75 كيلودا دياس مولجىگىتوۆتىڭ (جامبىل) مەرەيى ۇستەم بولدى. فينالدا ول اياتوللا تاكەجانوۆتى (پاۆلودار) ۇتتى. 80 كيلو ەراسىل جاقپەكوۆ (اباي) پەن جانىبەك قارتباەۆ (اقتوبە) كۇش سىناستى. فۋنكتسيونالدىق جاعىنان جاقسى دايارلىقپەن كەلىپ, تاكتيكالىق تۇرعىدان ساۋاتتى قيمىلداعان ەراسىل جەڭىسكە جەتتى. وسىلايشا, جاقپەكوۆتەر وتباسىنان ەكى چەمپيون شىقتى. وسىعان دەيىن باس جۇلدەنى ولجالاعان ەرماحاننىڭ جەڭىستى جولىن ارادا تۋرا جارتى ساعات وتكەننەن سوڭ ونىڭ تۋعان ءىنىسى ەراسىل قايتالادى.
86 كيلو سالماقتاعى شايمۇرات قۇسايىنوۆ ەل چەمپيونى اتانىپ, جەرگىلىكتى جانكۇيەرلەردى ءبىر جەلپىندىرىپ تاستادى. شەشۋشى سايىستا ول تۇركىستاندىق ساعىندىق توعامباەۆتى سان سوقتىردى. 92 كيلوداعى ابزال قۇتتىبەكوۆ (تۇركىستان) وسىعان دەيىنگى ەكى جەكپە-جەگىن نوكاۋتپەن اياقتاپ, ءوزىن وتە جاقسى قىرىنان كورسەتكەن ەدى. الايدا كوپتەگەن حالىقارالىق جارىستا جۇلدە الىپ جۇرگەن ابزال «سپورت شەبەرلىگىنەن ۇمىتكەر» دەگەن عانا اتاعى بار دانيل راقىمبەردينوۆتى (الماتى وبلىسى) اۋپىرىمدەپ ءجۇرىپ, ازەر ۇتتى. +92 كيلو سالماقتاعى شەشۋشى كەزدەسۋ دامير تويباي (الماتى) مەن امانات سابىرعالي (اتىراۋ) اراسىندا ءوتتى. بۇل جەكپە-جەكتە دامير جەڭىس تويىن تويلادى.
جالپىكوماندالىق ەسەپتە پاۆلودار وبلىسى وزدى. رينگ قوجايىندارى 5 (2 التىن+1 كۇمىس+1 قولا) جۇلدە جەڭىپ الدى. اعايىندى جاقپەكوۆتەردىڭ جارقىن جەڭىستەرىنىڭ ارقاسىندا اباي وبلىسى (2+0+2) ەكىنشى ورىندى ولجالادى. ۇزدىك ۇشتىكتى تۇركىستان وبلىسى (1+3+2) تۇيىندەدى. سونداي-اق الماتى وبلىسى (1+2+3), الماتى قالاسى (1+1+4), اقمولا (1+1+0), شىمكەنت (1+0+3), جامبىل (1+0+3), قاراعاندى (1+0+2), قىزىلوردا (1+0+0) جانە ماڭعىستاۋ (1+0+0) قۇرامالارىنا باس جۇلدە بۇيىردى.
