قازىر رەتروسالوندا قىرىق شاقتى كولىك بار. ەسكى اۆتوموبيلدەردىڭ ءبارىن سالوننىڭ يەسى, ايماققا بەلگىلى كاسىپكەر, مەتسەنات مۇرات سىرگەباەۆ قالپىنا كەلتىرىپ, وڭدەگەن كورىنەدى.
– كونە جادىگەرلەردى جانىم سۇيەدى. ەسكى كولىكتەر سالونىن اشقانعا دەيىن اتامزامانعى راديوقۇرىلعىلاردى, گراممافونداردى, پلاستينكالاردى, ىدىستاردى جينادىم. بىردە قالادان ەسكىرگەن گازدى سۋ ساتاتىن اپپارات كورىپ قالىپ, الگىنى ساتىپ الدىم. ەسكىرگەن دەمەسەڭ, قالىپتى جۇمىس ىستەپ تۇر ەكەن. ءوزىم كولىكقۇمارمىن. وسىدان كەيىن نەگە اۆتوسالون اشىپ, وعان ەسكى كولىكتەردى قويماسقا دەپ ويلادىم. «تۇلپاردىڭ» تۇساۋى وسىلاي كەسىلدى, – دەيدى كاسىپكەر, مەتسەنات مۇرات سىرگەباەۆ.
بۇگىندە رەتروسالونداعى ەڭ قىمبات جادىگەردىڭ ءبىرى – دىنمۇحاممەد قوناەۆتىڭ قىزمەتتىك كولىگى. كەڭەس وداعىنداعى ءاۆتووندىرىستىڭ ماقتانىشى بولعان «گاز-14» جەڭىل كولىگى ۇكىمەت قىزمەتىندەگى ادامدارعا مىنۋگە ارنالىپ جاسالعان ەدى. جالپاق جۇرتقا «چايكا» اتاۋىمەن تانىلعان كولىكتىڭ ءبىرىن كەزىندە قوناەۆ تاقىمداعان. كەيىننەن ەسكىرىپ, ەسەپتەن شىققان سول «چايكا» مەتالل سىنىعىنا ءوتىپ كەتە جازداپتى. 2014 جىلى كولىكتىڭ حابارىن كەزدەيسوق ەستىپ قالعان مۇرات سىرگەباەۆ ونى تاۋىپ, تولىقتاي وڭدەپ شىققان.
– قوناەۆ اقساقال مىنگەن كولىكتى جوندەپ, تولىقتاي ارلەۋگە 8 اي ۋاقىت كەتتى. بۇل ءوزى سيرەك كەزدەسەتىن مودەل بولاتىن. 1977 جىلدان 1988 جىلعا دەيىن سوۆەتتىك ءاۆتووندىرىس 1 114 «چايكا» شىعارعان. ونىڭ كوبىن باسشىلار مىنگەن. ۇزىندىعى 6 مەتر 30 سانتيمەر بولاتىن الىپ كولىك ءوز زامانىندا قول جەتپەس ارمان بولعان. ءارى ديماش اتامىزدىڭ ءىزى قالعان كولىك بولعان سوڭ ءبىزدىڭ سالونداعى قىمبات جادىگەرلەردىڭ قاتارىندا تۇر. بۇدان بولەك سول كەزەڭنىڭ كۋاسىندەي بولعان 40 اۆتوموبيل تاعى بار, ولاردىڭ ءبارىن كولىكقۇمار, ءوز ءىسىن سۇيەتىن جىگىتتەر قايتا قالپىنا كەلتىرىپ شىقتى, – دەيدى قوناەۆ قالاسىنداعى ەرەكشە اۆتوسالوننىڭ يەسى.
الماتى وبلىسى
