بايحانوۆ اسايىن قۋاندىق ۇلى 1978 جىلى پاۆلودار وبلىسىنىڭ باياناۋىل اۋدانىندا دۇنيەگە كەلگەن.
اسايىن بايحانوۆ ەڭبەك جولىن قازاقستانداعى ەۋروپالىق قايتا قۇرۋ جانە دامۋ بانكىنىڭ (ەقدب) باعدارلاماسى بويىنشا بانك سەكتورىندا جۇمىس ىستەي باستادى. الدىمەن ەكىباستۇزدا نەسيە ساراپشىسى بولدى, كەيىن الماتىدا ەقدب باعدارلاماسىنىڭ باس ءوفيسىنىڭ ءبولىم باستىعىنا دەيىن ءوستى. كەيىن بايحانوۆ Procredit Holding AG نەمىس حالىقارالىق بانك حولدينگىندە جۇمىس ىستەدى, سونىڭ ىشىندە ونىڭ ۋكراينالىق قارجى مەكەمەسىنىڭ (كيەۆ) اتقارۋشى ديرەكتورى بولدى. قازاقستانعا ورالعاننان كەيىن اسايىن بايحانوۆ «نۇربانك» باسقارما توراعاسىنىڭ ورىنباسارى لاۋازىمىنا تاعايىندالدى.
توعىز جىل جۇمىس ىستەگەننەن كەيىن بانك سەكتورىنان شىعىپ, اۋىل شارۋاشىلىعىندا كاسىپكەرلىك قىزمەتپەن اينالىستى. التى جىلىن اوك بيزنەسىنە ارنادى. كەيىن كۆازيمەملەكەتتىك سەكتوردا بولىپ, «قازاگرونىڭ» ەنشىلەس كومپانيالارىنىڭ ءبىرى توراعاسىنىڭ ورىنباسارى بولدى. وسى قىزمەتتە بەس جىل ەڭبەك ەتكەننەن كەيىن تۋعان جەرىنە ورالىپ, پاۆلودار وبلىسى اكىمىنىڭ ورىنباسارى بولىپ تاعايىندالدى. ايماق باسشىسىنىڭ ورىنباسارى بولا وتىرىپ, اۋىل شارۋاشىلىعى مەن جەر قاتىناستارىنا جاۋاپتى بولدى.
