ءا.كەكىلباي ۇلى اتىنداعى ماڭعىستاۋ وبلىستىق تاريحي-ولكەتانۋ مۋزەيىندە «ەجەلگى تەتيس قۇپيالارى» پالەونتولوگيالىق كورمەسى اشىلىپ, كوز تارتىپ, كوڭىل تامساندىراتىن نەبىر كەرەمەت جادىگەرلەر كوپشىلىك نازارىنا ۇسىنىلدى. ميلليونداعان جىلدار بۇرىن تىرشىلىك ەتكەن پلەزيوزاۆردىڭ جاق سۇيەگى, يحتيوزاۆر, قازبا تاسباقا قاڭقاسىنىڭ بولشەكتەرى, ەجەلگى دەلفين سۇيەكتەرى مەن اكۋلالاردىڭ تىستەرى, وزگە دە قىزىقتى ەكسپوناتتار قويىلعان كورمەدە ەجەلگى تەتيس مۇحيتىنىڭ تۇبىندە ءومىر سۇرگەن الىپ باۋىرمەن جورعالاۋشى – ەلاسموزاۆردىڭ قايتا قۇراستىرىلعان قاڭقا سۇيەگى باستى جادىگەر بولدى.
مۋزەيدە سۋرەتشى-قالپىنا كەلتىرۋشى بولىپ ءۇش جىلدان بەرى قىزمەت ەتىپ جۇرگەن قىزمەتكەر ا.بيسەمباەۆانىڭ ايتۋىنشا, پالەونتولوگتەر الدىمەن 850 ميلليون جىل بۇرىن تىرشىلىك ەتكەن جانۋاردىڭ مويىن ومىرتقاسىن عانا تاپقان, ۇزىندىعى 6 مەترگە سوزىلاتىن ەللاسموزاۆردىڭ تولىق قاڭقاسىن قايتا قالپىنا كەلتىرۋ جۇمىستارى 5 ايعا جۋىق ۋاقىت العان. مگۋ اسپيرانتى, پالەونتولوگ ن.زۆەركوۆتىڭ باعامداۋىنشا, 2017 جىلى شەتپە ماڭىنان تابىلعان ەلاسموزاۆر قاڭقاسىنىڭ ءبىر بولشەگى دۇنيە جۇزىندە ساقتالۋى بويىنشا ءتورتىنشى ورىندا تۇرعان قۇندى جادىگەر. 2019 جىلى رەسەيلىك پالەونتولوگتەردىڭ قازبا جۇمىستارى ناتيجەسىندە سۋلى قاپى ماڭىنان يحتيوزاۆر قاڭقاسى تابىلعان ەدى. كورمەدە قازبا ناتيجەسى – پالەونتولوگيا جاڭالىقتارى كورەرمەن نازارىنا ۇسىنىلدى.
كورمەنى تاماشالاۋشىلار ءوز تاڭدانىستارىن جاسىرا المادى. ال ءالى داڭعىل جولعا ءتۇسىپ كەتە الماعان, بىراق بولاشاعى زور عىلىم سالاسى سانالاتىن پالەونتولوگياعا قىزىعاتىن جاستار دا از ەمەس ەكەن. مەكتەپتە ءجۇرىپ-اق, ماڭعىستاۋ دالاسىنا ەكسكۋرسياعا شىعىپ, جەتەكشىلەرىمەن بىرگە قازبا جۇمىستارىنا قاتىساتىن, ءوز جەكە قورىنا بىرنەشە جادىگەرلەردى توپتاستىرىپ ۇلگەرگەن وقۋشىلار دا بار. ماڭعىستاۋ وبلىستىق تاريحي-ولكەتانۋ مۋزەيى اتالعان كورمە ارقىلى ءوز كەلۋشىلەرىنە تاعىلىمدى شارا, كوتەرىڭكى كوڭىل, رۋحاني كەش سىيلاي الدى.
ماڭعىستاۋ وبلىسى
