ءبىرىنشى بولىپ 125 بالل جينادى

2 ماۋسىمدا وتكەن ۇلتتىق بىرىڭعاي تەستىلەۋدىڭ ءبىرىنشى كۇنىنىڭ قورىتىندىسى بويىنشا الماتى كوش باستاپ تۇر. مۇنداعى  فيزيكا-ماتەماتيكا پاندەرىن تەرەڭدەتە وقىتاتىن №178 ليتسەي تۇلەگى, «التىن بەلگى» ۇمىتكەرى ايعا­نىم ءابدىجاپپار  ۇلتتىق تەستىلەۋ ورتالىعى تاراتقان اقپارات بويىنشا  ەڭ جوعارى كورسەتكىش – 125 بالدى يە­لەندى.  2012 جىلدىڭ 1 جەلتوقسانىندا – قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي اشىلعان ليتسەيدىڭ ديرەكتورى, «قۇرمەت» وردەنىنىڭ يەگەرى ءابدىماجيت وتەش: «بيىلعى وقۋ جىلىندا وسى ءبىلىم ۇياسىن بىتىرگەن 109 تۇلەكتىڭ ىشىندە 22 حالىقارالىق عىلىمي جوبالار جارىستارىنىڭ, حالىقارالىق كونكۋرستاردىڭ قاتىسۋشىلارى مەن جەڭىمپازدارى, 21 «التىن بەلگى» يەگەرى, 15 ەرەكشە ۇلگىدەگى اتتەستات يەگەرلەرى وزدەرىنە ارتقان سەنىمدى اقتاي ءبىلدى. مەكتەپتىڭ ۇبت قورىتىندىسى بويىنشا ورتا بالل 105,8 بولدى», – دەدى. تەست تاپسىرۋشىلاردىڭ اراسىندا العاشقى بولىپ «التىن بەل­گىسىن» ەڭ جوعارى باللمەن اياق­تاعان ا.ءابدىجاپپاردى قۇت­تىقتاپ, بىرنەشە ساۋال قويدىق. – ۇبت سۇراقتارى قيىن بولدى ما؟ – ءارتۇرلى, كۇردەلى دە, قارا­پايىم دا سۇراقتار بولدى. – تاڭداعان ءپانىڭ؟ – گەوگرافيا – قاي پانگە كوپ ۋاقىت كەتتى؟ – ماتەماتيكاعا – بولاشاقتا كىم بولعىڭ كەلەدى؟ – قارجى سالاسىنىڭ مامانى بولسام دەيمىن. – شەتەلگە وقۋعا باراسىڭ با؟ – جوق. قازاقستان ۋنيۆەر­سيتەت­تەرىندە-اق ءبىلىم العىم كەلەدى. – 125 بالل العانىڭا تاڭعالدىڭ با؟ – قالاي دەسەم ەكەن... مەن وزىمە ءوزىم سەنىمدى بولدىم. ويتكەنى, ال­دىن الا وتكەن سىناقتاردا جوعا­رى كورسەتكىشكە قول جەتكىزىپ جۇرگەنمىن. – ءبىلىم العان مەكتەبىڭە ريزا شىعارسىڭ؟ – ءيا, ءبىزدىڭ ليتسەي فيزيكا-ماتەماتيكا پاندەرىن تەرەڭدەتە وقىتادى عوي. وسىندا وقيمىن دەگەن ۇمىتكەرلەر وتە كوپ. ايناش ەسالي, «ەگەمەن قازاقستان». الماتى.