اقپاراتتار اعىنى

*اقتوبە قالاسىندا بالالاردىڭ جازعى دەمالىسىنا 51,7 ملن. تەڭگە ءبولىندى. بۇل قاراجات وبلىس ورتالىعىنداعى مەكتەپتەردىڭ 42 مىڭنان استام وقۋشىسىنا جاراتىلادى. سونداي-اق, 7 مىڭ وقۋشىنى قامتيتىن سپورتتىق-اۋلالىق كلۋبتار جۇمىسى ۇيىمداستىرىلادى. * وڭتۇستىك قازاقستان وبلىسىندا «جىل شەبەرى» بايقاۋى مارەسىنە جەتتى. ايماق باسشىسى اسقار مىرزاحمەتوۆتىڭ  باستاماسىمەن  قولعا الىنعان بۇل شاراعا شىمكەنت قالاسىنداعى تەحنيكالىق جانە كاسىپتىك ءبىلىم بەرەتىن مەكەمەلەردىڭ ارنايى ءپان وقىتۋشىلارى, وندىرىستىك وقىتۋ شەبەرلەرى مەن وقۋشىلارى قاتىسىپ, شەبەرلىكتى سىنعا سالدى. ● شىعىس قازاقستان وبلىسىنىڭ اكىمى دارىندى بالالارمەن ارنايى كەزدەسۋ وتكىزدى. وسى باسقوسۋ بارىسىندا بەردىبەك ساپارباەۆ تۇلەكتەرگە ايماقتا قانداي ماماندىقتار بويىنشا سۇرانىستىڭ جوعارى ەكەنىن ايتتى. ونىڭ مالىمەتىنشە, ءوندىرىستى وڭىرگە ءتۇستى مەتاللۋرگيا, اقپاراتتىق تەحنولوگيا, قۇرىلىس, ەنەرگەتيكا سەكىلدى سالالار ءۇشىن  ماماندار اۋاداي قاجەت. * اقمولا وبلىسىندا بارلىق الەۋ­مەتتىك نىسان 15 تامىزعا دەيىن دايىن بولادى. مۇنى ايتقان ايماقتىڭ جاڭا باسشىسى سەرگەي كۋلاگين اپپارات كەڭەسىندە وڭىردەگى كوكتەمگى دالا جۇمىستارىنا بۇرىنعىسىنشا ايرىقشا ءمان بەرىلەتىنىنە دە توقتالدى. * سوڭعى كۇندەرى قىزىلوردالىق 5 جاسار ۆۋندەركيند ەلدىڭ اۋزىندا ءجۇر. شىنىندا, قالانىڭ 5 جاسار تۇرعىنى ەرحان يسلامبەكتىڭ ماتەماتيكاعا ىنتاسى مەن ەستە ساقتاۋ قابىلەتى ەرەكشە تاڭعالدىرادى. ول ميلليونعا دەيىنگى ەسەپتەردى اۋىزشا شەكىلدەۋىكشە شاعىپ, شىعارا بەرەدى. * تالدىقورعاندا سەرىك ساپيەۆ تۋرالى دەرەكتى ءفيلمنىڭ تۇساۋى كەسىلدى. ءىلياس جانسۇگىروۆ اتىنداعى سارايدا وتكەن شاراعا اتاقتى بوكسشىنىڭ ءوزى دە قاتىستى. ال 30 مينۋتتىق لەنتانى ونىڭ اۆتورى ءارى پروديۋسەرى ولگا ساپوجنيكوۆا ءوز قارجىسىنا ءتۇسىردى.  «قازاقپارات», 24.kz, اltaynews.kz, Alau.kz, Egemen.kz اگەنتتىكتەرى مەن وبلىستىق اكىمدىكتەر سايتتارى اقپاراتتارى بويىنشا دايىندالدى.