ادام ءومىرى مەن بوستاندىعى – ەڭ قىمبات قازىنا

ەلىمىزدە قۇقىقتىق مەملەكەتتىڭ ۇستانىمدارىن ءارى قاراي دامىتۋ ماقساتىندا ونىڭ بار كۇش-جىگەرى ادامنىڭ كونستيتۋتسيالىق قۇقىعى مەن بوستاندىعىن جۇزەگە اسىرۋدىڭ مۇمكىندىگىنە كەپىلدىك بەرۋگە, بارلىق مەملەكەتتىك ورگانداردىڭ, لاۋازىمدى تۇلعالاردىڭ, ازاماتتار مەن جەكە تۇلعالاردىڭ كونستيتۋتسيالىق مىندەتتەرىن تولىق ورىنداۋىنا باعىتتالعان. قازاقستاندا زايىرلى مەملەكەتتەگى سەكىلدى تاتۋلىق پەن كەلىسىم بەكىتىلگەن, بارلىق ازاماتتاردىڭ قۇقىعى بىردەي دەڭگەيدە ساقتالادى. سوندىقتان دا ءبىزدىڭ اتا زاڭىمىزدا: «قا­زاق­ستان رەسپۋبليكاسى ءوزىن دەمو­كراتيالىق, زايىرلى, قۇقىقتىق جانە الەۋمەتتىك مەملەكەت رەتىن­دە ورنىقتىردى, ونىڭ ەڭ قىم­بات قازىناسى – ادام جانە ادام­نىڭ ءومىرى, قۇقىقتارى مەن بوستاندىقتارى» دەپ اتاپ كورسەتىلدى. ال ءبىزدىڭ مەملەكەتتىڭ ادامدى جانە ادامنىڭ ءومىرىن, قۇقىقتارى مەن بوستاندىقتارىن ەڭ قىمبات قازىناسى دەپ تانۋى مەملەكەتتىڭ ادامعا ۇنەمى قامقورلىق كورسەتىپ, ادام جاقسى ءومىر ءسۇرۋى ءۇشىن وعان قاجەتتى بارلىق جاعدايدى جاسايتىنىن, ونىڭ دەنساۋلىعىن قورعاۋ ءۇشىن شارالار قابىلدايتىنىن, مەملەكەت ادامنىڭ ءومىرىن قولسۇعۋشىلىقتان قورعايتىنىن بىلدىرەدى. مىنە, وسى ورايدا كەشە ادام قۇقىقتارى جونىندەگى ۋاكىلدىڭ 2013 جىلعى قىزمەتى تۋرالى ەسەپتىڭ تۇساۋكەسەرى ءوتتى. ءىس-شارانى ادام قۇقىقتارى جونىندەگى ۋاكىلدىڭ مەكەمەسى جانە قارجى پوليتسياسى مەن استاناداعى ەقىۇ ورتالىعى بىرلەسىپ ۇيىمداستىردى. اتالعان ءىس-شارا بارىسىندا ادام قۇقىقتارى جونىندەگى ۋاكىل اسقار شاكىروۆ قاتىسۋشىلارعا ەسەپتى جىلى قول جەتكىزىلگەن وڭ ناتيجەلەردى ەگجەي-تەگجەيلى بايانداپ, ۇلتتىق قۇقىق قورعاۋ مەكەمەسى جۇمىسىنىڭ نەگىزگى باعىتتارىمەن تانىستىردى. جوعارىدا ايتقانىمىزداي, ادام قۇقىقتارى جونىندەگى ۋاكىل مەكەمەسىنىڭ 2013 جىلعى جۇمىسىندا بىرنەشە نەگىزگى باعىتتارعا, ونىڭ ىشىندە بالالاردىڭ, مۇمكىندىگى شەكتەۋلى جانداردىڭ قۇقىقتارىن قورعاۋعا, قۇقىق قورعاۋ ورگاندارىنىڭ قىزمەتىنە, حالىققا مەملەكەتتىك قىزمەت كورسەتۋدىڭ ساپاسىنا, الەۋمەتتىك, ەڭبەك, جەر, تۇرعىن ءۇي قۇقىقتارىنىڭ ساقتالۋىنا ەرەكشە ءمان بەرىلگەن ەكەن. بۇل ورايدا ا. شاكىروۆتىڭ ءوزى دە: «2013 جىلى ادام قۇقىقتارى جونىندەگى ۋاكىلدىڭ مارتەبەسى ومبۋدسمەننىڭ ۇيلەستىرۋشى ءرولى رەتىندە جابىق مەكەمەلەردە ادام قۇقىقتارىنىڭ ساقتالۋىنا ازاماتتىق قوعامنىڭ مونيتورينگ جۇرگىزۋ جۇيەسىن قۇرعان ۇلتتىق الدىن الۋ تەتىگى تۋرالى زاڭىن قابىلداۋمەن كۇشەيتىلگەنىن»,  اتاپ ءوتتى. ومبۋدسمەننىڭ بۇل ەسەبى زاڭمەن بەلگىلەنگەن ۇدەرىستەرگە سايكەس ەلباسىعا ۇسىنىلىپ, ماقۇلدانعاننان كەيىن, قاراۋ ناتيجەلەرى بويىنشا ورىندالۋ ءۇشىن جەرگىلىكتى جانە ورتالىق مەملەكەتتىك ورگاندارعا جولدانعان ەدى. قالىپتاسقان ءداستۇر بويىنشا اتالعان قۇجاتتىڭ كوپشىلىك الدىنداعى تۇساۋكەسەر شاراسى جەرگىلىكتى جانە ورتالىق مەملەكەتتىك ورگانداردا, جوعارى وقۋ مەكەمەلەرىندە ومبۋدسمەننىڭ قىزمەتى, ونىڭ ىشىندە ونىڭ نەگىزگى باعىتتارى تۋرالى اقپاراتتاندىرۋ ماقساتىندا وتكىزىلەدى, ال بۇل دا ءوز كەزەگىندە ادام قۇقىقتارى مەن ولاردى قورعاۋ تاسىلدەرى تۋرالى ءبىلىمدى تاراتۋعا ىقپالىن جاسايدى. تۇساۋكەسەرگە پارلامەنت ءماجىلىسىنىڭ دەپۋتاتتارى, ديپلوماتتار, ورتالىق جانە جەرگىلىكتى مەملەكەتتىك ورگانداردىڭ, حالىقارالىق جانە قازاقستاندىق ۇكىمەتتىك ەمەس ۇيىمداردىڭ وكىلدەرى, ومبۋدسمەن جانىنداعى ازاپتاۋعا قارسى ۇلتتىق الدىن الۋ تەتىگىنىڭ ۇيلەستىرۋ كەڭەسىنىڭ جانە ساراپتامالىق كەڭەس ءمۇ­شەلەرى, سونداي-اق عالىمدار, پروفەسسورلىق-وقىتۋشىلىق قۇ­رام جانە ستۋدەنتتەر قاتىستى. كەزدەسۋ بارىسىندا قاتىسۋشىلار اراسىندا ورىندى پىكىرلەر ايتىلىپ, قۇقىق قورعاۋ ماسەلەلەرى دە تالقىعا سالىندى. الەكساندر تاسبولاتوۆ, «ەگەمەن قازاقستان».