كوميتەتتىڭ كوشپەلى وتىرىسى

ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ توراعاسى سەيىتسۇلتان ايىمبەتوۆ باستاعان ءبىر توپ دەپۋتات قىزىلوردا وبلىسىنا ارنايى ساپارمەن كەلىپ, ەلدىڭ تىنىس-تىرشىلىگىمەن تانىسىپ, كوشپەلى وتىرىس وتكىزدى. ولاردىڭ قاتارىندا اسحات بەكەنوۆ, تالعات ەرعاليەۆ, سەرىكجان قاناەۆ, نادەجدا نەستەروۆا, ءامىرحان راحىمجانوۆ, ايگۇل سولوۆەۆا سىندى ەل سەنىمىنە يە بولعان دەپۋتاتتار بار. استانادان ارنايى كەلگەن مەيماندار الدىمەن قالاعا قاراستى اقسۋات ەلدى مەكەنىندە بولىپ, اۋىلدىڭ بۇگىنگى جاي-كۇيىمەن تانىستى. جۇمىستارىن جاڭادان اشىلعان اۋىل­دىق كلۋبتىڭ كۇيىمەن تانىسۋدان باستادى. مۇنان سوڭ وتكەن جىلى ىسكە قوسىلعان جول توسەندىلەرىن شىعاراتىن شاعىن زاۋىتتا بولدى. مۇندا بەس ادام تۇراقتى جۇمىسپەن قامتىلعان. «شىعارعان ونىمگە سۇرانىس جوعارى»,– دەيدى زاۋىت باسشىسى اسحات نۇرسەيىتوۆ. حالىق قالاۋلىلارى «Smart Rubber» جاۋاپكەرشىلىگى شەكتەۋلى سەرىكتەستىگىندە دە بولدى. اتالعان مەكەمە جارامسىز شينانى وڭدەۋمەن اينالىسادى. يننوۆاتسيالىق جوبانىڭ ەكولوگيالىق تۇرعىدان تيگىزەر پايداسى كوپ. قازاقستان مەن گەرمانيانىڭ بىرلەسكەن كاسىپورنى جىلىنا 2,5 مىڭ توننا دوڭگەلەك قابىلداپ, ودان 1,5 مىڭ توننا رەزەڭكە ۇنتاعىن شىعارادى. ءونىم تەرەڭ وڭدەلىپ, جاساندى فۋتبول الاڭدارىنىڭ بەتكى قاباتى وندىرىلەدى. الداعى ۋاقىتتا وڭىردە سالىناتىن ويىن الاڭدارىندا وسى ءونىم قولدانىلادى. سونداي-اق, جول قۇرىلىسىنا قاجەتتى بەلسەندى ۇنتاق شىعارىلادى. بيتۋممەن ارالاسقان بۇل ۇنتاق اسفالتتىڭ ساپاسىن جاقسارتادى. ال «قازروسسيننوۆاتسيا» مەكەمەسى اۋىز سۋدى سۇزگىدەن وتكىزەتىن قوندىرعىنى قۇراستىرۋمەن اينالىسۋدا. دەپۋتاتتار يننوۆاتسيالىق جوبالاردىڭ اۋىلدىق جەردە كوبەيىپ جاتقاندىعى قۋانتادى دەيدى. – ءوزىن ءوزىن باسقارۋ تۋرالى زاڭناما وتكەن جىلى قابىلدانعانىن بىلەسىزدەر. سونىڭ وڭىرلەردە جۇزەگە اسۋ بارىسىمەن تانىسىپ جاتىرمىز. تاعى ءبىر ايتا كەتەرلىگى, قىزىلوردادا وبلىس ورتالىعىنان بولەك, شالعايداعى اۋىلداردا كاسىپكەرلىك سالاسى جاندانىپ كەلەدى ەكەن. بۇل جۇمىسسىزدىق­تىڭ جويىلىپ, حالىقتىڭ جاعدايى جاقسارىپ كەلە جاتقاندىعىنىڭ ايقىن كورىنىسى,– دەيدى پارلامەنت ءماجىلىسىنىڭ دەپۋتاتى سەيىتسۇلتان ايىمبەتوۆ. سونداي-اق, حالىق قالاۋلىلارى كەشە عانا ءۇش ەلدىڭ باسشىلارى قول قويعان ەۋرازيالىق ەكونوميكالىق وداق تۋرالى كەلىسىم وتاندىق ءونىمدى وزگەلەرگە وتكىزۋگە مۇمكىندىك تۋعىزاتىنىن اتاپ ءوتتى. ساپار بارىسىندا ءماجىلىستىڭ ەكو­نوميكالىق رەفورما جانە وڭىرلىك دامۋ كوميتەتىنىڭ كوشپەلى وتىرىسى ءوتتى. جيىنعا اتالعان كوميتەتتىڭ مۇشەلەرى مەن وبلىس اكىمى قىرىمبەك كوشەرباەۆ قاتىستى. كوشپەلى وتىرىستى اشقان ەكو­نو­ميكالىق رەفورما جانە وڭىرلىك دامۋ كومي­تەتىنىڭ توراعاسى سەيىتسۇلتان ايىم­بەتوۆ قىزىلوردا وبلىسىندا اۋىلدىق جەرلەردە جەرگىلىكتى ءوزىن ءوزى باسقارۋدا ۇل­كەن تاجىريبەسى بار ەكەنىن جانە ەكونو­ميكانىڭ تۇراقتى دامۋ ءۇردىسى ساقتالىپ وتىرعاندىعىن ايتتى. ايماق باسشىسى قىرىمبەك كوشەرباەۆ ءوزىن ءوزى باسقارۋ باعىتىندا اتقارىلىپ جاتقان جۇمىستارعا توقتالدى. – مۇنايلى ايماقتىڭ مۇڭى از بولۋى كەرەك. باستىسى, سالىق بازاسىن كەڭەيتۋ باعى­تىندا جۇمىس جاساپ جاتىرمىز. ءوندىرىس ورىندارىن ۋاقىت وتكەن سايىن كو­بەي­تۋدەمىز. وتكەن جىلى اۋىل اكىمدەرىن كۋرستاردان وتكىزدىك. بىراق بۇنىڭ ءوزى ازدىق ەتەدى. كادر ماسەلەسىندە قيىندىق كوپ. اۋىلدىق جەرلەرگە اكىمدىككە بىرنەشە ۇمىتكەر بولۋى قاجەت. ءبىزدىڭ باس­تى مىندەتىمىز بيلىكتى بارىنشا حالىققا جاقىنداتۋ, – دەدى ول. مۇنان كەيىن ءسوز العان حالىق قالاۋلى­لارى بىلتىر قابىلدانعان زاڭنىڭ ەلگە ءتيىمدى تۇستارىن باسا ايتتى. ال وڭىرلىك دامۋ مينيسترلىگىنىڭ وكىلدەرى ايماقتاردىڭ دامۋى تۋراسىندا تۇششىمدى بايانداما جاسادى. حالىق قالاۋلىلارى كوشپەلى جيىندى وتكىزۋ ءۇشىن قىزىلوردانىڭ بەكەر تاڭدالماعانىن تىلگە تيەك ەتتى. – كەيبىر ايماقتاردا قالانىڭ وزىندە باسقارۋ جۇيەسى ءبىر جولعا قويىلماعان. ال سىر ەلىندە اۋىلدىق جەرلەردە بۇل ماسەلە شەشىمىن تاپقان. ەندى ونى جانداندىرا ءتۇسۋ كەرەك. كەشە بىرنەشە اۋىلدا بولدىق. بارلىعىندا ءوسۋ, وركەندەۋ بار. ءتىپتى, يننوۆاتسيالىق جوبالار جۇزەگە اسىپ جاتىر,– دەدى سەيىتسۇلتان سۇلەيمەن ۇلى. كوشپەلى وتىرىس بارىسىندا كوپتەگەن ۇسىنىستار ايتىلدى. دەپۋتاتتار جاسال­عان ۇسىنىستاردى ءتيىستى دارەجەسىندە كو­تەرەتىندەرىن مالىمدەدى. ەرجان بايتىلەس, «ەگەمەن قازاقستان». قىزىلوردا وبلىسى.