اتىراۋ مۇنايشىلارى بالالار شىعارماشىلىعىنا قولداۋ ءبىلدىردى
ءار بالا اشىلماعان ءبىر الەم سەكىلدى. ولاردىڭ ارقايسىسىنىڭ وزىندىك تالانتى بار. «بۇلاق كورسەڭ, كوزىن اش» دەگەندى حالقىمىز تالانتتى بالالاردى قولداۋعا بايلانىستى ايتقان-اۋ, ءسىرا. اتىراۋداعى وتاندىق مۇناي-گاز ونەركاسىبىنىڭ قاراشاڭىراعى – «ەمبىمۇنايگاز» اكتسيونەرلىك قوعامى بيىل العاش رەت مۇنايشىلار بالالارى اراسىندا «مەنىڭ باقىتتى بالالىق شاعىم» اتتى شىعارماشىلىق بايقاۋ ۇيىمداستىردى. بۇل بايقاۋعا جەتى مەن ون جاس ارالىعىنداعى 36 بالعىن قاتىسىپ, ارقايسىسى وزدەرىنىڭ تالانتىن ءار قىرىنان كورسەتتى.
«ەمبىمۇنايگاز» اق باس ديرەكتورىنىڭ ءوندىرىس ءجونىندەگى ورىنباسارى سۇلەيمەن شوتىقباەۆتىڭ ايتۋىنشا, بالالاردىڭ شىعارماشىلىق بايقاۋىن ۇيىمداستىرۋداعى باستى ماقسات – جاس تالانتتاردى تاۋىپ, ولاردىڭ تاۋداي تالابىن ۇشتاۋعا قولداۋ ءبىلدىرۋ. وسى يگى ماقساتتى كوزدەگەن كاسىپورىن باسشىلىعى تاراپىنان قۇرىلعان قازىلار القاسىنا بالالار ءوز ەڭبەكتەرىن «مەنىڭ تۋعان جەرىم», «مەنىڭ دوسىم», «مەن تۇراتىن كوشە» تاقىرىپتارىندا كوركەم شىعارما, ولەڭ جانە فوتوونەر جانرى تۇرىندە ۇسىنىپتى. ماسەلەن, يساتاي اۋدانىنىڭ اققىستاۋ اۋىلىنداعى اباي ورتا مەكتەبىنىڭ ءبىرىنشى سىنىبىن ۇزدىك اياقتاعان امانەر ارون «تۋعان جەرىم مەن ەلىم, دوستىق تۋرالى ويىمدى ءۇش شۋماق ولەڭگە سىيعىزدىم. بۇل مەنىڭ تىرناقالدى شىعارمام بولسا دا قازىلار القاسى جوعارى باعالادى. بالكىم, بولاشاقتا وسى تالابىمدى ءارى جالعاستىراتىن شىعارمىن», دەيدى. امانەردىڭ اكەسى دە, اناسى مۇناي سالاسىندا ەڭبەك ەتەدى. ءوزى دە بولاشاقتا مۇنايشى ماماندىعىن يگەرىپ, ەلدىڭ وركەندەۋىنە ۇلەس قوسۋدى ماقسات تۇتادى ەكەن.
امانەردىڭ اۋىلداسى جانەركە كۇنشىعار دا ەل ەكونوميكاسىنا «قارا التىنداي» تابيعي بايلىقتى يگەرۋمەن لايىقتى ۇلەس قوسىپ جۇرگەن مۇنايشى اۋلەتىندە دۇنيەگە كەلگەنىن ماقتان ەتەدى. اتاسىنىڭ مۇنايشىلىق جولىن جالعاستىرعان اكەسى مەن شەشەسىنىڭ ەڭبەكقورلىعىن ۇلگى تۇتاتىن جانەركە ءوز شىعارماسىنا قازاقتىڭ ۇلان-عايىر دالاسىن اق بىلەكتىڭ كۇشىمەن, اق نايزانىڭ ۇشىمەن قورعاعان بابالار اماناتىنا ادالدىق تانىتىپ, تابيعي بايلىقتى ەل يگىلىگىنە جاراتۋدىڭ ماڭىزىن اشىپ كورسەتكەن. تاعى ءبىر تالاپتى ورەن جادىرا قۋاندىق ءوزىنىڭ ءمولدىر ەسىمدى دوسى تۋرالى ويىن مولدىرەتىپ قاعازعا ءتۇسىرىپتى. بالا كۇننەن شىنايى دوستىقتىڭ قادىرىن تۇسىنگەن جادىرا مولدىردەي قۇربىسىنىڭ بيازى مىنەزىنە, قينالعان جانعا قولۇشىن سوزۋعا ۇمتىلىپ تۇراتىن مەيىرباندىعىن كوپكە ۇلگى ەتكىسى كەلەدى. ال اقەركە ابىشقىزى ءوزى تۇراتىن اۋىلدىڭ جاسىل جەلەككە كومكەرىلگەنىن قالايدى. ول بۇل ارمانىن كوپشىلىككە ورتاق پروبلەما رەتىندە كوتەرىپ, تابيعاتتى ايالاۋعا, قورعاۋعا شاقىرادى.
بايقاۋعا قاتىسقان بالالاردىڭ ءبىر توبى جاس ەرەكشەلىكتەرىنە قاراماستان, مۇنايلى اتىراۋدىڭ كۇندەلىكتى تىنىس-تىرشىلىگى مەن تابيعاتىن قىلقالامىنان تۋىنداعان ەڭبەكتەرىنە ارقاۋ ەتىپتى. مۇنايلى ءوڭىردىڭ بۇگىنگى كەلبەتىن قاس-قاعىم ساتتە فوتواپپارات وبەكتيۆىنە ىلگەن بالالار جانە بار. مۇنىڭ ءبارى ارينە, قازىلار القاسىنىڭ نازارىنان تىس قالعان جوق. بالالاردىڭ شىعارمالارىن سارالاعان قازىلار القاسى «ۇزدىك تۋىندى» نوميناتسياسىن بالالاردىڭ جاس ەرەكشەلىكتەرىنە وراي ءۇش توپتا انىقتادى. ناتيجەسىندە «ءۇزدىك تۋىندىنىڭ» ءبىرىنشى ءجۇلدەسى جادىرا قۋاندىقوۆا, دۋمان ەرنازار ۇلى مەن ايدىن كىتاپقاليعا بەرىلىپ, ولارعا نوۋتبۋك سىيعا تارتىلدى. ال ەكىنشى جۇلدەگە يە بولعان ايان راحمەتقالي, اقەركە ابىشقىزى مەن نۇرسۇلتان مۇساعا فوتواپپارات بەرىلدى. ءۇشىنشى جۇلدەنىڭ يەلەرى امانەر ارون مەن دينارا ءمۇسىلىم جانە مەيىربەك تورەعاليەۆتار پلانشەتتىڭ يەسى اتاندى. بۇلاردان بولەك جانەركە كۇنشىعار, اسەم ءانۋاروۆا, التىنبەك جايناربەكوۆ, ديناز جاقانوۆا جانە جۇلدىز اسەموۆانىڭ شىعارماشىلىق قابىلەتتەرى «جاقسى جۇمىس» نوميناتسياسىندا ارنايى جۇلدەمەن اتالىپ ءوتتى.
بالالاردىڭ ەركىن شىعارماشىلىققا تالپىنىسىنا كاسىپورىن باسشىلارى بەيجاي قاراعان جوق. سول سەبەپتەن بولار, «ەمبىمۇنايگاز» بۇل بايقاۋدى ەندى جىل سايىن وتكىزۋگە ۇيعارىم جاساپ وتىر. ءسويتىپ, الداعى جىلدان باستاپ, شىعارماشىلىق بايقاۋعا تەك مۇنايشىلاردىڭ عانا ەمەس, وزگە كاسىپ يەلەرىنىڭ تالانتتى بالالارىن قاتىستىرۋ دا قاراستىرىلماق. كاسىپورىن باس ديرەكتورىنىڭ ورىنباسارى رىستى تاسماعامبەتوۆا شىعارماشىل بالالاردىڭ تاۋداي تالابىن «بالالاردىڭ ءوز ويلارىن ەركىن ءبىلدىرۋى, جان-جاعىندا بولىپ جاتقان قۇبىلىستارعا باعا بەرۋگە تالپىنۋى, وتانسۇيگىشتىك, دوستىق پەن ىنتىماقتى شىعارمالارىنا ارقاۋ ەتۋى قۋانتادى. كەيبىرى وڭىردەگى وتكىر پروبلەمالارعا كوپشىلىك نازارىن اۋدارۋعا تىرىستى. بۇل – ءبىزدىڭ ورتامىزدا وتانشىل, بەلسەندى بۋىن ءوسىپ كەلە جاتقانىنىڭ ايعاعى», دەپ باعالادى.
وتاندىق مۇناي ءوندىرۋشى كاسىپورىن جىل سايىن بالالاردىڭ جازعى دەمالىسىن ۇيىمداستىرۋعا قولداۋ ءبىلدىرىپ كەلەدى. ماسەلەن, جاقىن ارادا مۇنايشى وتباسىلارىنىڭ 1000-نان استام بالاسىن الماتى جانە كوكشەتاۋ وڭىرلەرىندەگى جازعى لاگەرلەردە دەمالدىرۋ كوزدەلىپ وتىر. سونىمەن قاتار, 1200 بالانى كورشىلەس رەسەي مەن تۇركياداعى ساۋىقتىرۋ ورىندارىنا جىبەرۋدى ويلاستىرعان «ەمبىمۇنايگازدىڭ» بۇل قادامىنان وزگە كاسىپورىندار ۇلگى السا دەيمىز.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
