كيىم تىگىپ, قولونەرمەن اينالىسادى

ەلباسى ن.ءا. نازارباەۆتىڭ بيىلعى جولداۋى مۇمكىندىگى شەكتەۋلى جاندارعا ۇلكەن سەرپىلىس الىپ كەلدى. «ءبىز ولاردى بەلسەندى ومىرگە تارتامىز, ولار تەك جاردەماقى الىپ قانا قويمايدى, سونىمەن بىرگە, وزدەرىن قوعامنىڭ مۇشەسى, پايدالى ەڭبەككەر رەتىندە سەزىنەتىن بولادى. ءبىزدىڭ بارلىق الەۋمەتتىك ينستيتۋتتار, ۇكىمەتتىك ەمەس ۇيىمدار, «نۇر وتان» پارتياسى وسى جۇمىستى قولعا العاندارى ءجون», دەگەن بولاتىن مەملەكەت باسشىسى ءوز جولداۋىندا. جولداۋدى باسشىلىققا العان قوعامدا بۇگىندە كوپتەگەن يگى باستامالار جۇزەگە اسا باستادى. سونىڭ ءبىرى جۋىردا كەنتاۋ قالاسىندا ءوتتى. شاعىن شاھاردا مۇمكىندىگى شەكتەۋلى جاندارعا ارنالعان تىگىن تسەحى ىسكە قوسىلدى. مۇندا الدىمەن مۇمكىندىگى شەكتەۋلى جاندار ءدارىس الىپ, تىگىنشى ماماندىعىنىڭ قىر-سىرىن ۇيرەنۋدە. ماماندار ءۇش ايدا 30 مۇگەدەك جانعا وقۋدى اياقتاعاندىعى جونىندە سەرتيفيكات بەرمەك. ال كاسىبي مامان اتانعاندارى وسى جەردە تۇراقتى جۇمىسقا ورنالاسادى. سونداي-اق, تىگىن تسەحىنىڭ جۇمىسى تولىق جۇيەگە قويىلعان كەزدە ارنايى تاپسىرىستار ارقىلى كەز كەلگەن كيىم تۇرلەرىن تىگۋدى جوس­پارلاپ وتىر. جوبانىڭ نەگىزگى ۇيلەستىرۋشىسى «اسار» وقو مۇگەدەكتەر قوعامدىق بىرلەستىگى. – ەلباسىمىز ءوز جولداۋىندا مۇمكىندىگى شەكتەۋلى ادامدارعا قامقورلىق كورسەتىلۋى كەرەكتىگىن, بۇل ءوزىمىزدىڭ جانە قوعام الدىنداعى پارىزىمىز ەكەندىگىن ايتىپ وتكەن بولاتىن. جولداۋدا كورسەتىلگەن ايقىن باسىمدىقتاردى جەرگىلىكتى جەردە جۇزەگە اسىرۋ ماقساتىندا جۇمىس ىستەپ جاتىرمىز. مۇگەدەك جانداردى تۇراقتى جۇمىسپەن قامتۋ بويىنشا دا اتقارىپ جاتقان ىستەرىمىز بار. الەۋمەتتىك نىساندارعا پاندۋستار ورناتۋعا مەكەمە باسشىلارى كوڭىل بولە باستادى. ولار تۇرمىستىق قىزمەت كورسەتۋ, تاعام ونەركاسىبى, اۋىلشارۋاشىلىق كاسىپورىندارىندا جۇمىس ىستەي الادى. ءبىز ولارعا وسىنداي جۇمىستاردى ۇسىنۋ ارقىلى بەلسەندى ومىرگە تارتا الامىز. سوندا عانا ولار وزدەرىن قوعامنىڭ مۇشەسى, ەڭبەككەر رەتىندە سەزىنەتىن بولادى. ءبىز تەك مۇمكىندىك بەرۋىمىز قاجەت, – دەيدى «اسار» وقو قوعامدىق بىرلەستىكتىڭ توراعاسى جوراحودجا تاسحودجاەۆ. بۇگىندە ۇكىمەتتىك ەمەس ۇيىمنىڭ وبلىستا 20 مىڭنان استام مۇشەسى بار. سونىڭ 800-گە جۋىعى كەنتاۋ قالاسىندا تۇرادى. «ءسابي» قايىرىمدىلىق قورى سىيعا تارتقان ەكىينۆاتاكسي دە تۇركىستان, كەنتاۋ قالالارىنداعى جارىمجان جاندارعا قىزمەت كورسەتۋدە. حالىققا قىزمەت كورسەتۋ ورتالىعىنىڭ ماماندارى دا ءجۇرىپ-تۇرۋى قيىن جانداردىڭ ۇيلەرىنە بارىپ, ءوز كومەكتەرىن بەرۋدە. قوعامدىق بىرلەستىككە مۇشە ازاماتتاردىڭ ىشىندە ونەرلى جاستار وتە كوپ. ولار اسەم ءان ايتىپ, قولونەرمەن دە اينالىسادى. تۇركىستاندىقتار وتكەن جىلى ەل كولەمىندە وتكەن «ءبارىمىز بىردەيمىز – كەمسىتۋدى بىلمەيمىز» اتتى رەسپۋبليكالىق اكتسيادا ۇلكەن ساحناعا شىعىپ, جۇلدەمەن ورالعان. مۇندا مۇمكىندىگى شەكتەۋلى جانداردىڭ سالاماتتى ءومىر سالتىن ۇستانىپ, بۇقارالىق سپورتپەن اينالىسۋلارىنا دا تولىعىمەن جاعداي جاسالعان. ءتىپتى, ءوز ارالارىنان جاساقتالعان ۆولەيبول كومانداسى مەن تەننيسشىلەر اتىراۋ, شىمكەنت قالالارىندا وتكەن جارىستارعا قاتىسىپ, جۇلدەلى ورىندارمەن ورالىپتى. قوعامدىق بىرلەستىك جەرگىلىكتى اكىمدىكپەن بىرلەسىپ ءار اي سايىن 10 مۇگەدەك جاندى رەسپۋبليكاداعى وڭالتۋ ورتالىقتارىنا, دەمالىس ورىندارىنا جىبەرىپ وتىرادى. قايرات زاينيشەۆ. وڭتۇستىك قازاقستان وبلىسى.