تۋ عاسىر قانشا ءوز ەركىڭ جوق دەگىزگەن, ساباق الدىق تاريحي وتكەن ىزدەن! كوك تۋىمىز بوياۋىن العان ەكەن اشىق اسپان, كەڭ دالا, كوك تەڭىزدەن! تۇسپەسىن دەپ ەشكىمنىڭ كوزىنە مۇڭ, تاقپاسىن دەپ ەشكىم دە سوزىڭە ءمىن ادامزاتقا ارايىن شاشىپ تۇرعان وتان-كۇننىڭ جىلۋىن سەزىنەمىن! امانات بوپ ماڭگىلىك قالاتىن دا, جۇرەكتەردىڭ الاۋىن جاعاتىن دا, قازاعىمنىڭ ارمان مەن مۇراتى بار قالىقتاعان قىراننىڭ قاناتىندا! دالەلدەگەن مۇرانىڭ مىڭ جىلدىعىن سالت-ءداستۇرىم الەمگە ۇلگى بۇگىن! التىن ءتۇستى ورىلگەن ويۋ-ورنەك كورسەتەدى ۇلتىمنىڭ قۇندىلىعىن! شۋاق شاشىپ تۇرعاندا شۇعىلا كۇن, الىستارعا تارايدى تۇنىق ءانىم. ازات ەلدى الەمگە ايگىلەگەن كوك بايراقتىڭ قادىرىن ۇعىنامىن! بەيبىت كۇندى ءاردايىم ەل تىلەسىن! تەك شاتتىقپەن جۇرەكتەر ەلجىرەسىن! ابىرويىن كوتەرىپ اسقاق ەلدىڭ جەلبىرەسىن كوك تۋىم, جەلبىرەسىن! ايباتىر سەيتاق. استانا.
