ۇبت

العاشقى كۇننىڭ قورىتىندىسىندا دايىندالعاندار دارا شىعىپ,

وتە شىعامىن دەگەندەر وكىنىپ قالدى

التىن ۇيا مەكتەپكە تارىداي بولىپ كەلىپ, تاۋداي بولىپ شىققان مەكتەپ تۇلەكتەرىنىڭ العان ءبىلىمىن ساراپقا سالعان بيىلعى ۇلتتىق بىرىڭعاي تەستىلەۋدىڭ العاشقى كۇنگى قورىتىندىسى تومەندەگىدەي بولىپ وتىر. ەمتيحانعا ەلىمىز بويىنشا العاشقى كۇنى ءوتىنىش بەرگەن 27 670 تۇلەكتىڭ 26 134-ءى, ياعني 94,5 پايىزى قاتىسقان. تەستىلەۋ قالالار مەن اۋدان ورتالىقتارىنداعى جان-جاقتى جابدىقتالعان 61 پۋنكت بازاسىندا وتكىزىلگەن. ءتۇرلى جولدارمەن سىناقتان مۇدىرمەي «ءوتۋدىڭ» جولىن الدىن الا ويلاستىرعان ۇمىتكەرلەردىڭ 5962-سىنەن ۇيالى تەلەفون, 1783-ىنەن شپارگالكا, 121-ىنەن كالكۋلياتور, 6-ىنان فوتواپپارات, 2-ۋىنەن راتسيا تابىلعان. ءسويتىپ, ولار ەسكەرتۋ العان. ال ون ءبىر جىل بويى توپ جارىپ, ۇبت-عا  ءوزىنىڭ بىلىمىنە, بىلىگىنە, دايىندىعىنا سەنىپ كەلگەن الماتى قالاسىنداعى № 178 ليتسەيدىڭ تۇلەگى ايعانىم باقىتقىزى ءابدىجاپپار مىڭداردىڭ ىشىنەن توپ جارىپ, الامان بايگەدە ەڭ جوعارى 125 بالدى قانجىعاسىنا بايلاپ, ماڭدايى جارقىرادى. سول سەكىلدى 3797 تۇلەك (14,5 پايىز) 100-دەن استام بالل جيناپتى. بۇل كورسەتكىش وتكەن جىلى 14 پايىزدى قۇراعانىن ەسكە سالا كەتەلىك. ءبىرىنشى كۇنگى سىناقتىڭ ورتا بالى – 76,6 بولسا, 2013 جىلى 75,5 ەكەن. جوعارىداعىداي جەتىستىكپەن قاتار, ەڭ تومەنگى كورسەتكىش قانداي بولدى دەگەنگە كەلەتىن بولساق,  اعىمداعى جىلى جوعارى وقۋ ورىندارىنا ءتۇسۋ ءۇشىن بەلگىلەنگەن 50 بالدى دا جيا الماعاندار – 6 233 (23,8 پايىز) بولعان. وتكەن جىلى ونداي تومەنگى كورسەتكىش – 6 368, ياعني 26,4 پايىز ەدى. سونىمەن, مىقتىلاردىڭ مەرەيىن وسىرگەن, كوپپەن كورگەن ۇلى توي, وتە شىعامىز دەگەندەردى وكىندىرگەن ۇبت-نىڭ العاشقى كۇنگى ناتيجەسى وسىلاي اياقتالدى. سۇلەيمەن مامەت, «ەگەمەن قازاقستان».