– قاراعاندى وبلىسىنىڭ تاريحىندا ءبىزدىڭ سپورتشىلارىمىزدىڭ التىن مەدالدى كوپتەپ جەڭىپ العانى ءبىرىنشى رەت. ءيا, جارىسقا دايىندىق كۇشتى بولدى. بالالاردىڭ جەڭىسكە دەگەن قۇلشىنىسى زور ەدى. الەمنىڭ بارلىق ەلىنەن بالۋاندار قاتىسىپ, 11 كىلەمنىڭ ۇستىندە وتكەن جەكپە-جەكتە ەڭ كىشكەنتاي سپورتشىلارىمىز دا كەم دەگەندە 2-3 جەكپە-جەككە شىقتى, – دەيدى قاراعاندى وبلىسى دجيۋ-دجيتسۋ فەدەراتسياسىنىڭ پرەزيدەنتى ايان شەرماعامبەتوۆ.
حالىقارالىق دودادا بابى مەن باعىن سىناعان سپورتشى 5 جاستا ەكەن. بەستەگى سپورتشى – نيكولاي شكۋروپات كۇمىس يەلەنىپ كەلىپتى. ونىڭ اپكەسى ۆارۆارا التىن, اعاسى يوانن مەن اپكەسى ماترونا كۇمىس مەدال العان. بالالاردىڭ اكەلەرى ۆياچاسلاۆ شكۋروپات كۇمىس جۇلدەگەر اتاندى.
– وتباسىمىزبەن دجيۋ-دجيتسۋعا بارامىز. بۇل – قىزىقتى جانە جاراقات الۋ قاۋپى از سپورت. انامىز دجيۋ-دجيتسۋدان ازيا چەمپيونى, – دەيدى ۆارۆارا. سونىمەن قاتار ايماقتا برازيليالىق دجيۋ-دجيتسۋدان العاشقى قارا بەلبەۋ يەگەرلەرى دە انىقتالدى.
الەم چەمپيوناتىنان سوڭ پروفەسسور ۆيكتور موراەس قاراعاندىلىق سپورتشىلار مەن جاتتىقتىرۋشىلار مارات قۇتجانوۆ پەن ولجاس نۇرتاقانوۆتى اتتەستاتتاۋدان وتكىزىپ, قارا بەلبەۋ تابىس ەتىپتى.
– برازيليالىق پروفەسسور ۆيكتور موراەسپەن ءۇش اي جاتتىعۋ وتكىزدى. ولجاس ەكەۋمىزدىڭ ناتيجەلەرىمىزدى باعالاي وتىرىپ, قارا بەلبەۋ تابىس ەتتى. ەندى قارا بەلبەۋ ماعان وقۋشىلاردى سەرتيفيكاتتاۋعا مۇمكىندىك بەرەدى. بۇرىن مامانداردى شاقىرتاتىنبىز, – دەيدى Mario Bros كلۋبىنىڭ نەگىزىن قالاۋشى مارات قۇتجانوۆ.
دەرەكتەرگە سۇيەنسەك, سوڭعى ەكى جىلدا قاراعاندى وبلىسىندا دجيۋ-دجيتسۋ بويىنشا 11 سەكتسيا اشىلعان. بۇل سەكتسيالاردا مىڭنان استام ادام بار.
– سپورتشىلاردىڭ دامۋى ءۇشىن كوپتەگەن جارىس وتكىزىلەدى. جەلتوقسان ايىنا بىرنەشە بايقاۋ جوسپارلانعان. مىسالى, 10-11 جەلتوقساندا ەرەسەك سپورتشىلار قازاقستان چەمپيوناتى مەن قازاقستان كۋبوگىنە, كەلەسى جىلعا ىرىكتەۋگە قاتىسادى. بالالار 1-2 جەلتوقساندا الماتىدا ءوتىپ جاتقان تۋرنيرگە قاتىسسا, ال 3-4 جەلتوقساندا استاناعا تۋرنيرگە بارادى. 2023 جىلدىڭ قاڭتار ايىنىڭ سوڭىندا قاراعاندىدا جىل سايىنعى Karaganda BJJ Open ءتۋرنيرى ۇيىمداستىرىلادى, – دەدى ايان شەرماعامبەتوۆ.
قاراعاندى وبلىسى
