ەۋرازيالىق ەكونوميكالىق وداق اياسىندا الىپ كاسىپورىن جۇمىسى جاندانباق

استانا. 3 ماۋسىم. ءتۇرلى قيىندىقتار كەزدەسسە دە جۇمىسىن قوجىراتپاعان قوستاناي وبلىسىنداعى  «سوكولوۆ-سارىباي» كومبيناتى ەندى ەۋرازيالىق ەكونوميكالىق وداق اياسىندا ەڭبەك ونىمدىلىگىن ارتتىرا تۇسپەك. بۇل تۋرالى «24kz» حابارلادى. «سوكولوۆ-سارىباي» بىرلەستىگى جىلىنا شامامەن 16 ملن. توننا تەمىر كەنى شيكىزاتىن جانە دايىن تەمىر جەنتەكتەرىن وندىرەدى. سونىڭ باسىم بولىگى رەسەي مەن قىتايعا ەكسپورتتالادى. دەگەنمەن, الەمدىك داعدارىسقا بايلانىستى كەيىنگى ۋاقىتتا سىرتقا ساتىلاتىن ءونىم ءبىرشاما كەمىگەن. الايدا, ەۋرازيالىق ەكونوميكالىق وداقتىڭ قۇرىلۋى بۇل ولقىلىقتىڭ ورىنىن تولتىراتىنىنا سەنىم مول. «سوكولوۆ-سارىباي» اكتسيونەرلىك قوعامىنىڭ پرەزيدەنتى مۇحامەدجان تۇرداحۋنوۆ: «مەملەكەت باسشىسىنىڭ تاپسىرماسى بويىنشا ءبىز ەۋرازيالىق ينتەگراتسيانىڭ ءمان-ماڭىزىن حالىققا ءتۇسىندىرىپ, جەتكىزۋىمىز قاجەت. بۇل ەلىمىزدىڭ, ءبىزدىڭ كاسىپورىننىڭ, جالپى ونەركاسىپ سالاسىنىڭ دامۋىنا سەرپىن بەرەدى. نەگىزگى تۇتىنۋشىمىز ماگنيتوگورسك مەتاللۋرگيالىق كومبيناتىمەن بايلانىمىز نىعايا تۇسەتىن بولدى. ءبىز ءۇشىن رەسەي نارىعىنا كەڭ جول اشىلادى. قازىر كاسىپورىن كەن ءوندىرۋ ورىندارىن كەڭەيتۋدى كوزدەپ وتىر. اسىرەسە, تەمىر شيكىزاتىنىڭ ساپالى جانە باي قورى بار «قاشار» كەنىش ورنىنا ۇلكەن ماڭىز بەرىلۋدە. «سوكولوۆ-سارىباي» بىرلەستىگىنە قاراستى «قاشار» كەنىشىنىڭ قورى ءبىر عاسىرعا جەتەدى. قازىرگى ونىڭ تەرەڭدىگى – 420 مەتر. جوبا بويىنشا 800 مەترگە دەيىن قازىلادى. بۇل كەنىش ورىنىنا تەمىرجول ۆاگوندارى جانە اۋىر جۇك كولىكتەرى تارتىلعان. بولاشاقتا كونۆەيەرمەن كەن شىعارۋ جۇيەسى ىسكە قوسىلماق. كەنىش ورىنىنداعى تەحنيكالاردىڭ بارلىعى جاڭا. جاقىندا تاۋ-كەن جۇمىسىنا ارنالعان Hitachi ەكسكاۆتورلارى الىندى. الەمدە مۇنداي تەحنيكالار ساناۋلى. 180 توننالىق الىپ جۇك ماشيناسى قاتارى تاياۋدا 12 كولىككە تولىقتى», – دەدى. قازىرگى تاڭدا «سوكولوۆ-سارىباي» بىرلەستىگىنىڭ جۇمىسشىلارى ەۋرازيالىق ەكونوميكالىق وداق اياسىندا كوپتەگەن يگىلىكتەرگە قول جەتكىزىلەتىن بولدى دەپ سانايدى. جولدىباي بازار. دەرەككوز: «24kz». فوتو: kostanay.kz.