قوعام • 30 قاراشا، 2022

ءدىن مەن دىنشىلدىك – ەكى بولەك ۇعىم

2019-2022 جىلعى زەرتتەۋ مالىمەتتەرىنە زەر سالساق، شىمكەنتتە جاستار اراسىنداعى دىندارلىق 2 پايىزعا وسكەن، ال دەسترۋكتيۆتى ءدىني اعىمداردىڭ جەتەگىندە كەتكەن جاستار سانى تومەندەگەن. مۇنداي دەرەكتەر قالالىق ءدىن ىستەرى باسقارماسىنىڭ ۇيىمداستىرۋىمەن وتكەن «جاستار اراسىنداعى ءدىن مەن دىنشىلدىك» تاقىرىبىنداعى رەسپۋبليكالىق عىلىمي-تاجىريبەلىك فورۋمدا ايتىلدى.

ءانۋار جۇماشباەۆ

فورۋمعا اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ وكىلدەرى، ايماقتىق ءدىن ىستەرى جانە قوعامدىق دامۋ باسقارماسى باسشىلارى، يمامدار، قاجد وكىلدەرى، جوعارى جانە ورتا وقۋ ورىندارىنىڭ ستۋدەنتتەرى، مەكتەپ مۇعالىمدەرى مەن وقۋشىلارى قاتىستى. باسقوسۋدىڭ نەگىزگى ماقساتى – جاستاردى دەسترۋكتيۆتى ءدىني يدەولوگيالاردىڭ ىقپالىنان ساقتاۋ، قاۋىپتىڭ الدىن الۋ، جاستار اراسىنداعى ءدىن مەن دىنشىلدىك تاقىرىپتارىن تالقىلاۋ.

جيىندى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان اشىپ، ءىس-شارانىڭ ماڭىزدىلىعىنا توقتالدى. فورۋم بارىسىندا ءدىن ىستەرى كوميتەتىنىڭ توراعاسى ەرجان نۇكەجانوۆ، قازاقستان مۇسىلماندارى ءدىني باسقارماسى توراعاسىنىڭ ورىنباسارى، نايب ءمۇفتي كەنجالى قاجى مىرزاباەۆ، وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ رەكتورى گۇلجان سۇگىرباەۆا، فيلولوگيا عىلىمدارىنىڭ كانديداتى، ابايتانۋشى ومار تەمىربەكوۆ جانە قمدب «بالابي قاري» قۇران جاتتاۋ ورتالىعىنىڭ ديرەكتورى ارمان قۋانىشباەۆ، «اقنيەت» اقپاراتتىق-ناسيحاتتاۋ جانە وڭالتۋ ورتالىعى» قوعامدىق قورىنىڭ كەڭەسشىسى اليم شاۋمەتوۆ بايانداما جاسادى.

بايانداماشىلار تاۋەلسىزدىكپەن بىرگە جەتپىس جىل بويى كەڭەس وداعى تىيىم سالعان اسىل ءدىنىمىزدىڭ قايتا ورالعانىن، 90-جىلداردىڭ باسى «وشكەنىمىز جانىپ، ولگەنىمىز ءتىرىلدى» دەپ ايدار تاققان، تاۋەلسىزدىككە تاۋبە ايتقان، ۇلتتىڭ رۋحاني جاڭعىرعان، قايتا تۇلەگەن كەزەڭى بولعانىن اتاپ ءوتتى. سپيكەرلەر ەلىمىزدە وسى جىلداردان باستاپ مەشىتتەردىڭ سانى كوبەيىپ، ءدىندى ۇستانۋشىلاردىڭ سانى ارتقانىن العا تارتتى. «دەگەنمەن وسى ءۇردىستى سىرتقى كۇشتەردىڭ، كەيبىر تەرىس پيعىلدى توپتاردىڭ ءوز ماقساتتارىنا پايدالانعانى راس. اسىرەسە ءالى وڭ-سولىن تانىماعان جاستاردىڭ تەرىس اعىمداردىڭ جەتەگىندە كەتكەنى جاسىرىن ەمەس. مۇنىڭ سالدارى جەڭىل بولعان جوق. ءتىپتى قاسىرەتكە اپارىپ سوقتى دەسەك قاتەلەسپەيمىز. بۇعان الماتى، تاراز، اقتوبە سياقتى قازاقستاننىڭ بىرنەشە قالاسىندا «ساقالدىلاردىڭ» سالعان سويقانى، تەرىس اعىمداردىڭ تەرروريستىك اكتىلەرى كۋا. كوپتەگەن قانداس باۋىرلارىمىز تەرىس تۇسىنىكتەردىڭ جەتەگىنە ەرىپ، تاياۋ شىعىس ەلدەرىنە كەتتى»، دەيدى ماماندار.

وسى جانە وزگە دە وتكىر ماسەلەلەر تالقىعا سالىنعان فورۋم سوڭىندا جاستاردى تەرىس اعىمداردىڭ قاۋپىنەن ساقتاندىرۋ ءۇشىن الدىن الۋ جۇمىسى ايقىندالىپ، ونىڭ ورىندالۋ ءتارتىبى شەشىلدى.

فورۋمدى وتكىزۋگە جك «نۇرماش»، «اق-نيەت» اقپاراتتىق-ناسيحاتتاۋ جانە وڭالتۋ قوعامدىق قورى»، قازاقستان مۇسىلماندارى ءدىني باسقارماسى، وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى، م.اۋەزوۆ اتىنداعى وڭتۇستىك قازاقستان ۋنيۆەرسيتەتى قولداۋ كورسەتتى.

شىمكەنت