پوليتسياعا 9-سىنىپ وقۋشىسىنىڭ اناسى حابارلاسىپ, قىزىنىڭ مەكتەپتە «iPhone 10» ماركالى تەلەفونىن جوعالتىپ العانىن ايتقان. وقيعا ورنىنا قۇرامىندا ارنايى ۇيرەتىلگەن يتتەردى ەرتكەن كينولوگتەر, پوليتسيا قىزمەتكەرلەرى جىبەرىلدى. «گراف» اتتى قىزمەتتىك يت ءيىس ارقىلى تەلەفوندى قار استىندا جاتقان جەرىنەن تاۋىپ الدى. مەكتەپ وقۋشىسى گادجەتىن قالتاسىنا سالىپ, جولدا بايقاۋسىزدا ءتۇسىرىپ العان ەكەن. وسىلايشا, 6 جىلدان استام قىزمەت ەتەتىن قىزمەتتىك-ىزدەستىرۋ ءيتىنىڭ كومەگىمەن قىسقا مەرزىمدە تەلەفون تابىلىپ, يەسىنە قايتارىلدى.
جىل سايىن قولدانىسقا زاماناۋي تەحنولوگيالاردىڭ ەنۋىنە قاراماستان, قىزمەتتىك يت ءالى دە پوليتسيا جۇمىسىندا سۇرانىسقا يە. جانۋاردىڭ سەزىم مۇشەلەرى (تۇمسىعى مەن قۇلاعى) ەشبىر تەحنيكانىڭ كۇشى جەتپەيتىن زاتتاردى يىسكەپ, ەستي الادى. استانا قالاسى پوليتسيا دەپارتامەنتىنىڭ كينولوگيالىق قىزمەتى ورتالىعىندا 50-دەن استام ءيىسشىل يت بار. شاھاردىڭ ءار اۋدانىندا تاۋلىك سايىن كينولوگ ماماندار كەزەكشىلىك ەتەدى. ولار ءىز كەسۋ باعىتى بويىنشا ادام ءولتىرۋ, ۇرلىق, ازاماتتاردىڭ جوعالۋى سياقتى جۇمىستارعا تارتىلادى. كەيدە شۇعىل شاقىرتۋلار ءتۇسىپ, كينولوگتەر ەسىرتكى قىلمىسىنا قاتىستى وقيعالاردىڭ باسى-قاسىندا جۇرەدى. «جارىلعىش زات قويىلعان» دەگەن اقپارات تۇسسە, سول جاقتان تابىلادى. بارلىق جاعدايدا اقپارات جالعان بولىپ شىعادى. بىراق عيماراتتى تولىق تەكسەرىپ شىعۋ – كينولوگتەردىڭ مىندەتى. بۇدان بولەك, اۋقىمدى مادەني-سپورتتىق ءىس-شارالار وتكىزىلمەس بۇرىن نىسان ءجىتى تەكسەرىلەدى. كۇندىز-ءتۇنى, دەمالىس كۇندەرى دە اياقتارىنان تىك تۇرىپ, ءوز مىندەتتەرىن ءمىنسىز ورىنداۋعا اتسالىسىپ ءجۇر.
كينولوگيالىق قىزمەتى ورتالىعىنداعى يتتەر نەگىزگى 4 باعىتقا جۇمىلدىرىلادى. بۇدان بولەك, شابۋىلداۋشى, كۇزەتشى, پاترۋلدىك باعىتتاعى يتتەر دە بار. سايكەسىنشە, كينولوگتەر سول باعىتتا دايىندايدى, ۇيرەتەدى. نەگىزگىلەرى – جارىلعىش زاتتى انىقتايتىن, ەسىرتكىنى ىزدەيتىن, ءىز كەسۋ جانە ودرولوگيا باعىتى.
يتتەردىڭ نەگىزگى قىزمەتتىك تۇقىمى – وۆچاركا. بۇل وڭاي ۇيرەتىلەتىن امبەباپ يتتەر, ولار كەز كەلگەن تاپسىرمانى ورىنداي الادى. قىزمەتكە كىرىسپەس بۇرىن ولار ادامنان دا, جانۋاردان دا شىدامدىلىق پەن جوعارى زەيىندى قاجەت ەتەتىن كۇندەلىكتى جاتتىعۋلاردى بىرگە ورىندايدى.
