الەمدىك ءتارتىپ پەن حالىقارالىق تەڭگەرىم تۇبەگەيلى وزگەرىسكە ۇشىراۋدا. جەر-جاھان مۇزداي قۇرسانىپ, جاپپاي قارۋلانۋدان جارىس ءجۇرىپ جاتقان جايى بار. كۇنى كەشەگى ۇيرەنشىكتى ۇيلەسىمدەرىمىز بەن قالاۋلى قۇندىلىقتارىمىز قاتىگەز سىناقتاردىڭ قۇرساۋىندا قالدى. تەلەديدارلاردىڭ كوگىلدىر اينالارى مەن كومپيۋتەرلەردىڭ ءمولدىر مونيتورلارى كۇننەن-كۇنگە تۇنەرە ءتۇسىپ, ورتكە ورانعان ۇشاقتار مەن تانك قاڭقالارىن, تاس-تالقانى شىققان ءۇي-جايلار مەن عيماراتتاردىڭ ۇيىندىلەرىن, اجال قۇشقان ۋكراينا جانە رەسەي جاۋىنگەرلەرىن كورسەتۋدە. البەتتە, بۇل بۇگىنگى الەمنىڭ ەشبىر اسىرەلەۋسىز بەت-بەينەسى.
تاپ قازىر قازاقستان دا اسا كۇردەلى تاڭداۋدىڭ الدىندا تۇر. تارازى باسىندا, بۇگىنگى ۋاقىت تالقىسىنىڭ ۋىسىندا ءبىزدىڭ بالالارىمىز بەن نەمەرەلەرىمىزدىڭ بولاشاعى بار. ەلىمىزدىڭ ەرتەڭىنىڭ دە پرەزيدەنت سايلاۋىندا كىمدى تاڭداۋىمىزبەن تىكەلەي بايلانىستى ەكەنى انىق. بيلىك باسىنا تاناۋىنان ارىدەگىگە تانىمى جەتپەيتىن مىڭ قۇبىلعان سۋماقايلار مەن الاياقتار, قىزىل ءسوزدى قىمىزداي ساپىرعان ءسوزۋارلار مەن جەلبۋاز ءدىلمارلار كەلە مە دەپ قورىقتىق. بار حالقىمىز ءۇشىن ستراتەگيالىق ۇلكەن ۇتىلىسقا ۇرىنۋ, بارشا قازاق پەن بۇكىل قازاقستاندىقتاردىڭ ءبىرجولا جەڭىلىس تابۋى وپ-وڭاي ەدى.
بۇل جاعدايدى ءبىزدىڭ «ازامات – ازاماتتىق باستاما» قوعامدىق بىرلەستىگى جاقسى ءتۇسىنىپ, بولاشاقتى اقىلمەن باعامداۋعا ونەر ادامدارى مەن زيالىلاردى جۇمىلدىرىپ وتىر.
سوندىقتان دا كەشەگى پرەزيدەنت سايلاۋىندا قاسىم-جومارت كەمەل ۇلى توقاەۆ حالىقتىڭ باسىم بولىگىنىڭ قولداۋىنا يە بولۋى – ەلدىڭ نيەتى, ارمانى دەي الامىز. ديپلومات قايراتكەردىڭ, اسا قيىن جاعدايدا ءۇش جىل ەلدىڭ باس يەسى بولعان ازاماتتىڭ وراسان زور تاجىريبەسىن ءبىلىپ, تۇلعالىق تەرەڭدىگىن تانىعاندىقتان دا حالىق شەشىمىن – تاريحي تاڭداۋ دەپ سانايمىز.
قاسىم-جومارت كەمەل ۇلى توقاەۆ – التى ءتىل مەڭگەرگەن مايتالمان, تاماشا ەلشى. ول بۇرىن بىرىككەن ۇلتتار ۇيىمى باس حاتشىسىنىڭ ورىنباسارى لاۋازىمىندا بولعان بىرەگەي جادى مەن ەنتسيكلوپەديالىق ءبىلىمنىڭ يەسى عانا ەمەس, قاراپايىم حالىقتىڭ شىن جاناشىرى, ەل مۇددەسى ءۇشىن ەڭبەك ءسىڭىرىپ جۇرگەن ەرەن ساياساتكەر.
ول – بەيمازا شاقتا قازاقستان مەملەكەتتىگىنىڭ كەمەسىن تۋلاعان تەڭىزدەردىڭ بەيبەرەكەت تولقىندارىنان جايلى اعىستارعا الىپ شىعۋعا قارىمى مەن قاۋقارى جەتەتىن, جايماشۋاق جاعالاۋلارعا باستاۋعا قابىلەتتى قايراتكەر.
«ازامات – ازاماتتىق باستاما» قوعامدىق بىرلەستىگى سايلاۋ دوداسى باستالعاندا قاسىم-جومارت كەمەل ۇلى توقاەۆقا بارىنشا قولداۋ كورسەتىپ, ونىڭ ەلدەگى ساياسي رەفورمالاردى ىسكە اسىراتىن, جەمقورلىقپەن كۇرەس جۇرگىزەتىن جانە كوپۆەكتورلى سىرتقى ساياسات باعىتىن ءارى قاراي دامىتاتىن بىردەن-ءبىر تۇلعا, كوشباسشى دەپ تانىدى جانە سولاي ناسيحاتتادى.
ەكىنشى دۇنيەجۇزىلىك سوعىستان كەيىن بولىپ كورمەگەن, ەندى عانا تاريح ساحناسىنا شىعىپ تۇرعان قازىرگى الماعايىپتار كەزەڭىندە قازاقستان حالقى ءۇشىن سىرتقى ساياساتتا دۇرىس تاڭداۋ جاساپ, الىس ءھام جاقىن كورشىلەرىمىزبەن ستراتەگيالىق سەرىكتەستىك پەن ىنتىماقتاستىق بايلانىستاردىڭ التىن كوپىرلەرىن قالىپتاستىرۋعا ۇمتىلۋ اسا ماڭىزدى ەكەنى داۋ تۋدىرا قويماس. ءبىز سىرتقى ساياساتتاعى وسىناۋ ءدۇدامال دۇربەلەڭدەردەن مەيلىنشە از شىعىنمەن, مۇمكىندىگىنشە مول تابىسپەن شىعۋعا تىرىسىپ باعۋىمىز كەرەك. جاراتۋشى يەمىز القالاپ, الەمدىك ساياسي احۋالدىڭ ءوزى قازاقستاننىڭ پوستكەڭەستىك كەڭىستىكتە دارگەيلى داۋلەتكە اينالىپ, گۇلدەنگەن دە دامىعان مەملەكەت بولۋىنا سيرەك مۇمكىندىكتى ۇسىنىپ تۇرعانداي. ءبىز بولساق, قازاقستاننىڭ مەملەكەتتىگىن نىعايتىپ, ەلدى كۇشەيتە ءتۇسۋ قاسىم-جومارت كەمەل ۇلى توقاەۆتىڭ قولىنان كەلەتىنىنە ەش كۇمان كەلتىرمەيمىز جانە سارابدال ساياساتتىڭ ساردارىنا ۇلكەن سەنىم ارتامىز.
ءيا, ەكونوميكامىز بەن ءوندىرىسىمىز ەڭسەسىن كوتەرە الماي تۇر. بىراق مەملەكەت باسشىسىنىڭ باعدارلاماسى وسى قيىندىقتى ەڭسەرەدى دەپ سەنەمىز. ونەر مەن مادەنيەت سالاسى وسى جولدا رۋحاني دەمەۋ, يدەولوگيالىق جاردەمشى بولۋعا دايار. «كوپ بىرىكسە – كۇش». بۇل باستامامىزدى باسقا سالالار دا قولدايدى دەپ ويلايمىز.
تۇڭعىشباي جامانقۇلوۆ,
قازاقستان رەسپۋبليكاسىنىڭ حالىق ءارتىسى,
سەرىك مالەەۆ,
«ازامات – ازاماتتىق باستاما» بىرلەستىگىنىڭ توراعاسى
