كاسىپكەرلىك كوكجيەگى كەڭەيۋدە

ۇلتتىق كاسىپكەرلەر پالاتاسى پرەزيديۋمىنىڭ توراعاسى تيمۋر ق ۇلىباەۆ جۇمىس ساپارىمەن وڭتۇستىك قازاقستاندا بولدى. وبلىس بيزنەسمەندەرىمەن ارنايى كەڭەس وتكىزىلىپ, وندا كاسىپكەرلىكتىڭ وزەكتى ماسەلەلەرى تالقىلاندى. كەڭەستى اشا وتىرىپ تيمۋر اسقار ۇلى ۇلتتىق كاسىپكەرلەر پالاتاسى تاراپىنان التى ايدا اتقارىلعان ناقتىلى ىستەرگە توقتالدى. ۇيىمداستىرۋ جانە كادرلىق جۇمىستار تياناقتالدى. رەسپۋبليكالىق دەڭگەيدە جوعارى بيلىك ورگاندارىمەن تىعىز بايلانىس ورناتىلدى. مەملەكەتتىك شەشىمدەر قابىلداۋدا بيزنەستىڭ ورنى مەن ءرولى جان-جاقتى ەسكەرىلۋدە. زاڭدار مەن زاڭنامالىق قۇجاتتارعا بەس جۇزدەن استام وزگەرىستەر مەن تۇزەتۋلەر ەندىرىلدى. ەندىگى جەردە وڭىرلىك دەڭگەيدەگى جۇمىستى تۇبەگەيلى تۇردە جانداندىرىپ, شيراتا ءتۇسۋدىڭ ماڭىزدى ەكەنى بەلگىلى, دەدى ت.ق ۇلىباەۆ. وسى ورايدا وقو كاسىپكەرلەر پالاتاسىنا جۇكتەلەر مىندەتتەر ۇلكەن. بيزنەستى دامىتۋدىڭ وڭىرلىك كارتاسىن قالىپتاستىرىپ, زاماناۋي ىزدەنىستەرمەن جۇمىس ىستەۋ كەرەك. وبلىستا كاسىپكەرلىككە جان-جاقتى كوڭىل بولىنەدى. دەگەنمەن, بارلىق جەردەگىدەي ءالى دە كەدەرگىلەر كوپ. ءبىز وبلىس اكىمدىگىمەن بىرلەسە جۇمىس جۇرگىزۋدىڭ مەحانيزمدەرىن ايقىندادىق. مەملەكەتتىك باعدارلامالار مەن ماڭىزدى جوبالاردى جۇزەلەۋدىڭ نەعۇرلىم ءتيىمدى جولدارىن قاراستىرامىز. مەملەكەتتىك ساتىپ الۋ, جەر قويناۋلارىن پايدالانۋ, ادام كاپيتالىن دامىتىپ, كادرلار دايارلاۋدى ۋاقىتقا يكەمدەۋ, جەرگىلىكتى وندىرىسشىلەرگە كەڭ جول اشۋ – مىنە, مۇنىڭ ءبارى ەلىمىزدىڭ ەاەو-عا كىرۋىنە بايلانىستى جاڭا مازمۇنعا يە بولاتىنى ايان. ۇلتتىق كاسىپكەرلەر پالاتاسىنىڭ اتقارۋشى توراعاسى ابىلاي مىرزاح­مەتوۆ جاڭا باعدارلامالار مەن جوبالار تۋرالى ايتا كەلىپ, اسىرەسە, اۋىل شا­رۋا­شىلىعىنىڭ وزگەشە باسىمدىق سيپات الاتىنىن اتاپ كورسەتتى. نەسيە, كەپىلدىك, بيزنەس-جوسپارلار جونىندەگى قيىندىقتاردى بىلەمىز, دەدى ول, وسى ماسەلەلەر جونىندە تۇركيا تاجىريبەسىن زەرتتەپ قايتتىق. ناقتىلى ۇسىنىستار بەرىلدى, ناتيجەلەر دە بولادى. وقو كاسىپكەرلەر پالاتاسىنىڭ ديرەكتورى جەڭىسبەك دۋلاتوۆ وبلىستاعى بيزنەسىن جاڭا باستاعان كاسىپكەرلەرمەن جۇمىس, ءار اۋداننىڭ ايرىقشا باعىتتارى, شاعىن جانە ورتا بيزنەستىڭ دامۋ بارىسى جونىندە باياندادى. كەڭەس سوڭىندا وبلىس اكىمى اسقار مىرزاحمەتوۆ مەملەكەت باسشىسىنىڭ تاپسىرمالارىنا سايكەس كاسىپكەرلىكتى دامىتۋ جونىندەگى اتقارىلعان تىرلىكتەرگە قىسقاشا توقتالىپ, يندۋستريالاندىرۋ كارتاسىنا بايلانىستى جوبالار شىمكەنتتە عانا ەمەس, بارلىق اۋدانداردا جۇزەلەنىپ جاتقانىن اڭگىمەلەدى. كەڭەستە قوزعالعان وزەكتى ماسەلەلەر جونىندە ءوز كوزقاراسىن ءبىلدىرىپ, وبلىس تاراپىنان قوسىلار ۇلەستەرگە توقتالدى. «ەگەمەن-اقپارات».