پروكۋراتۋراداعى بايقاۋ

بۇگىندە مەملەكەت باسشىسىنىڭ مەملە­كەتتىك ءتىلدى دامىتۋ جانە ونىڭ ءرولىن ارتتىرۋ, قازاق ءتىلىن بەلسەندى تۇردە ۇيرەنۋ, سونداي-اق, كۇندەلىكتى قىزمەتتە قولدانۋ ءۇشىن قىزمەتكەرلەردىڭ قىزىعۋشىلىعىن ارتتىرۋ جونىندەگى ساياسات جۇزەگە اسىرىلىپ كەلەدى. بۇعان ەلىمىزدىڭ پروكۋراتۋرا ورگاندارى دا قوماقتى ۇلەس قوسىپ وتىر. ماسەلەن, جۋىردا پرو­كۋرا­تۋرا ورگاندارى قىزمەتكەرلەرىنىڭ اراسىندا «مەملەكەتتىك قىزمەتتە – مەملە­كەتتىك تىلمەن» اتتى رەسپۋبليكالىق بايقاۋ ءوتتى. بايقاۋعا باس پروكۋراتۋرانىڭ قۇقىقتىق ستاتيس­تيكا جانە ارنايى ەسەپكە الۋ جونىندەگى كوميتەتى, استانا, الماتى قالالارىنىڭ پروكۋراتۋرالارى, باس اسكەري پروكۋراتۋرا, باس كولىك پروكۋراتۋراسى جانە وبلىستىق پروكۋراتۋرالاردىڭ وكىلدەرىنەن قۇرالعان 19 كوماندا قاتىستى. باس پروكۋروردىڭ ورىنباسارى جاقىپ اسانوۆ ءوزىنىڭ قۇتتىقتاۋ سوزىندە اتاپ وتكەندەي, مەملەكەتتىك ءتىلدىڭ قىزمەت ەتۋى مەم­لەكەتتىك ساياساتتىڭ ماڭىزدى باعىت­تارىنىڭ ءبىرى بولىپ تابىلادى. سوندىقتان بايقاۋدى وتكىزۋدىڭ باستى ماقساتى  مەملە­كەتتىڭ ءتىل ساياساتىن قولداۋ, پروكۋراتۋرا ورگاندارىنداعى قازاق ءتىلىنىڭ قولدانىلۋ اياسىن كەڭەيتۋ جانە ناسيحاتتاۋ بولىپ تابىلادى. ءاربىر كوماندا مەملەكەتتىك ءتىلدى ءبىلۋ مەن ونى ءوزىنىڭ كۇندەلىكتى كاسىبي قىزمەتىندە قولدانۋ دەڭگەيىن كورسەتتى. بايقاۋعا قاتىسۋشىلار ءارتۇرلى قىز­مەتتىك جاعدايلارداعى اۋىزشا سويلەۋ شەبەر­لىكتەرىمەن جارىسىپ, قىزمەتتىك قۇجاتتاردى ازىرلەۋ, ولاردى ساپالى اۋدارۋ داعدىلارىن كورسەتتى. سونداي-اق, ادىلقازىلار سوت پروتسە­سىندەگى مەملەكەتتىك ايىپتاۋشىنىڭ رولىندەگى پروكۋرور شەشەندىگىنىڭ ساپاسى مەن مادەنيەتىن باعالادى. قۇرامىنا پرەزيدەنت اكىمشىلىگىنىڭ, جوعارعى سوتتىڭ, مادەنيەت, ادىلەت مي­نيستر­لىكتەرىنىڭ وكىلدەرى, پارلامەنت دەپۋتاتتارى, باس پروكۋرا­تۋرانىڭ قىزمەتكەرلەرى, پروكۋراتۋرا ور­گاندارىنىڭ ارداگەرلەرى ەنگەن قازىلار القاسى بايقاۋدىڭ ناتيجەلەرىن باعالادى. بايقاۋ قورىتىندىسى بويىنشا جەڭىم­پازدار باعالى سىيلىقتارمەن ماراپاتتالدى. الەكساندر تاسبولاتوۆ, «ەگەمەن قازاقستان».