«قازمۇنايگاز» قاۋىپسىزدىكتى قامتاماسىز ەتەدى

«اپات ايتىپ كەلمەيدى» دەيدى حالىق دانالىعى. ەشكىم قالاماسا دا, ەشكىم كۇتپەسە دە ول ورىن الماي تۇرمايتىندىعىنا مىسال دا, دالەل دە كوپ. ولار بايقاۋسىزدا جىبەرىلگەن سالدەي قاتەلىك نەمەسە تەحنيكالىق اقاۋلىقتار, ءتىپتى, لاڭ سالىپ ءجۇرۋدى جانى قالايتىن لاڭكەستەر ارەكەتى سالدارىنان تۋىنداپ جاتادى. قاي ورىندا, قاي دارەجەدە بولسا دا سوڭى اششى قايعى مەن اۋىر زارداپتارعا سوقتىراتىن اپاتتاردىڭ الىپ ءوندىرىس ورىندارىندا ورىن الۋى قايعى مەن زارداپتار اۋقىمىن, سالماعىن ەسەلەپ جىبەرەتىنى بەلگىلى. بۇل قاسىرەت, بۇل ساتسىزدىك, ارينە, ەشكىمگە قاجەت ەمەس... اقتاۋ قالاسىندا «قازمۇنايگاز» ۇك» اق پەن «قازترانسويل» اق بىرلەسە وتكىزگەن ەكى كۇندىك وقۋ-جاتتى­عۋدىڭ ماقساتى دا وسى. العاشقى كۇنى سالا ماماندارى مەن توتەنشە جاعدايلاردا بىرلەسە قيمىلداۋعا ءتيىستى مەكەمەلەر وكىلدەرى تەوريالىق باعىتتا باس قوسىپ, كوتەرىلىپ وتىرعان تاقىرىپقا قاتىستى وزەكتى ماسەلەلەردى ورتاعا سالدى. «قازمۇنايگاز» كومپانيالار توبىنىڭ وندىرىستىك نىساندارى جۇمىسىنا زاڭسىز ارالاسۋ, لاڭكەستەر تۋىنداتقان توتەن­شە جاعدايلاردا ءتيىمدى جانە جۇمىلا ارەكەت ەتە بىلۋگە دايىندايتىن, سونداي-اق قاجەتتى ءىس-قيمىلدى وقىپ-ۇيرەنۋ جات­تى­عۋى «قازترانسويل» اق با­تىس فيليالىنىڭ «اقتاۋ» باس مۇ­ناي ايداۋ ستانساسى بازاسىندا ءوتتى. 50-گە جۋىق ءورت ءسوندىرۋ جانە اپاتتان قۇتقارۋ تەحنيكالارى شوعىرلانىپ, «وقيعاعا» قا­جەتتىلىگى بار وزگە دە قۇرال-جاب­­دىقتارمەن قامتىلعان كەڭ الاڭ­عا «قازمۇنايگاز» قۇرا­مىن­داعى 20-دان استام كور­پو­را­تيۆتىك قاۋىپسىزدىك قىز­مەتى­نىڭ قىزمەتكەرلەرى بار, مو­بيل­دى كۇزەت توپتارى, ماڭ­عىس­تاۋ وبلىسىنداعى قاۋىپسىزدىك ور­گان­دارى مەن ىشكى ىستەر سا­لاسى­نىڭ قىزمەتكەرلەرى, سون­داي-اق قۇتقارۋ قىزمەتى مەن ءورت قاۋىپ­سىزدىگى سالاسى قىز­مەت­كەر­لەرى بار, وڭىردەگى مۇناي-گاز مە­كە­مەلەرى باسشىلارى بار – بار­­لىعى 200-دەن استام ادام جيىل­­دى. ال وقۋ-جاتتىعۋعا قور­عا­­نىس مينيسترلىگىنىڭ «با­تىس» ايماقتىق باسقارماسى تە­ڭىز-جاياۋ اسكەرلەر بريگاداسى, «Semser-Security» جشس كۇ­زەت قىزمەتى, «سەمسەر-ءورت ءسون­دىرۋشى» جشس ورتكە قارسى قىزمەت بولىمشەلەرى, ماڭعىستاۋ وب­لىستىق لاڭكەستىككە قارسى كۇ­رەس جونىندەگى جەدەل شتاب, ماڭ­عىس­تاۋ وبلىستىق ءىىد, وب­لىس­تىق تجد, وبلىستىق ۇقك دە­پار­تا­مەن­تى, «ءورت ءسوندىرۋشى» اق, «ماەك-قازاتومونەركاسىپ» جشس, «مەديكەر» جشس, «قازاق­تەلەكوم» اق قىزمەتكەرلەرى قاتىستى. الدىمەن قاتىسۋشىلار مەن قوناقتارعا وقۋ-جاتتىعۋ بارىسى مەن ارنايى قۇرال-جابدىقتار تانىستىرىلىپ, قاۋىپسىزدىك شارتتارى ءتۇسىندىرىلدى. – بۇل كەشەندى ترەنينگ «قازمۇنايگاز» ۇك» اق-تىڭ 2013-2017 جىلدارعا ارنالعان قاۋىپ­سىزدىك باعدارلاماسىن ءجۇ­زە­گە اسىرۋ جونىندەگى شارا­لار جوسپارىنا جانە اتالمىش كومپانيانىڭ نىساندارى مەن ونىڭ ەنشىلەس جانە تاۋەل­دى ۇيىمدارىن لاڭكەستىك ارە­كەتتەردەن قورعاۋدى ۇيىم­داس­تىرۋ جوسپارىنا سايكەس ءوتۋ­دە. نىساندارداعى وندىرىستىك قىز­مەتتەگى قىزمەتكەرلەردىڭ توتەنشە جاعدايلارعا دايارلىعىن, قولداعى تەحنيكانىڭ ناقتى جاعدايى مەن ءورت قاۋىپسىزدىگىن قامتاماسىز ەتۋشى جۇيەنىڭ ازىرلىگىن كەشەندى تۇرعىدا تەكسەرۋ ماقسات ەتىل­گەن وقۋ-جاتتىعۋ ارقىلى وقىس وقيعالار كەزىندە باسشى ازا­مات­تاردىڭ, مامانداردىڭ, قۇ­رى­لىمدىق بولىمدەردىڭ ادام­داردى قورعاۋ بويىنشا جۇمىستى باسقارۋ ءبىلىمىن جەتىلدىرۋ, بىلىك­تىلىگىن ارتتىرا تۇسۋدە ويى­مىز دا بار. جانە قانداي جاعدايدا دا جۇمىس ىرعاعىنىڭ توقتاماۋىن, جوسپارلارعا ساي ءجۇرىپ جات­قان ۇردىستەردىڭ ۇزىلمەۋىن دە باس­­تى نازاردا ۇستاۋ كەرەك, تاك­تيكالىق وقۋ-جاتتىعۋ كەزىندە وسى ماسەلەلەرگە دە ءمان بە­رىپ, قامتيتىن بولامىز, – دەدى وقۋ-جاتتىعۋدىڭ اشىلۋ ءسوزىن­دە «قازمۇنايگاز» ۇك» اق كور­­­پوراتيۆتىك قاۋىپسىزدىك دە­پار­تامەنتىنىڭ ديرەكتورى ب.جاناساەۆ. وقۋ-جاتتىعۋ ەكى كەزەڭنەن تۇردى. الدىمەن ەكى بەلگىسىز ادام مۇناي ونىمدەرى ساقتالعان ارقايسىسىنىڭ سىيىمدىلىعى 20000 م³ رەزەرۆۋارلار ماڭىنا ۇرلانا باسىپ تاياپ كەلدى دە, قولدارىنداعى قوراپشالارىن رەزەرۆۋار ماڭىنا اپارىپ ۇلگەردى. وسى كەزدە ولاردى بايقاپ قالعان كۇزەت مەكەمەسىنىڭ قىزمەتكەرلەرى دەرەۋ جەتىپ, كۇدىكتى تۇلعالاردى قولعا ءتۇسىردى. وقيعا بولعان جەر­دى قورشاپ, ءتيىستى ورىندارعا جەدەل حابارلادى. ۇقق «ارلان» ار­نايى توبى, ءىىد قىزمەتكەرلەرى, ءوز­گە دە قۇزىرلى مەكەمەلەر قىز­­مەتكەرلەرى كەلىپ, قوراپقا سا­لىنعان جارىلعىش زاتتى زالالسىزداندىرۋ, وقيعا ورنىن تەكسەرۋ, قاۋىپسىزدىگىن قاداعالاۋ جۇ­مىستارىن جۇزەگە اسىردى. بىراق, جارىلعىش زات ءوز زار­­دا­بىن تيگىزگەن ەكەن, كوپ ۇزا­ماي №18 رەزەرۆۋاردان ءورت شىق­تى. وسى كەزدە جەتكەن ءورت ءسون­دىرۋشىلەر ءورتتى اۋىزدىقتاپ, قىزۋى كوتەرىلگەن كەلەسى رەزەرۆۋاردى دا سالقىنداتىپ, قىسىمىن قالىپتى جاعدايعا ءتۇسىرۋ ءۇشىن ارەكەتتەندى. ال, جاتتىعۋدىڭ ەكىن­­شى كەزەڭى «قالامقاس – قارا­جان­باس – اقتاۋ» مۇناي قۇبى­رى بويىن­داعى وقيعامەن بەينەلەندى. مۇندا دا قۇبىردى كەسىپ, ارام ويىن جۇزەگە اسىرماق بولعاندار قۇقىق قورعاۋ ورىندارىنىڭ قارماعىنان قۇتىلعان جوق. وقۋ-جاتتىعۋ سوڭى بەلسەن­دىلىك تانىتقان ۇزدىكتەردى ماراپاتتاۋمەن اياقتالدى. «ساقتانساڭ, ساقتايمىن» دە­گەن­دەي, قاي كەزدە دە اباي بول­عاننىڭ ايىبى جوق... گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.