جاس ساراپشىلار تالداۋى

مەكتەپ تىڭداۋشىلارى پرەزيدەنت قاسىم-جومارت توقاەۆتىڭ پرەزيدەنتتىك قىزمەتتەگى نەگىزگى الەۋمەتتىك-ەكونومي­كالىق، ىشكى جانە سىرتقى ساياسي باعىتتار بويىنشا قىزمەتىنە تالداۋ جاساي وتىرىپ، بيىل 20 قاراشادا وتكەن پرەزيدەنتتىك سايلاۋعا شولۋ جاسادى. سايلاۋ بارىسىن باقىلاعان جاس ساراپشىلار ۇگىت-ناسيحات جۇمىستارىنىڭ قالاي جۇرگەندىگىن، كانديداتتاردىڭ باعدارلامالارى جانە ەلىمىزدەگى ىشكى ساياسي احۋال توڭىرەگىندەگى بولجامدارىن ورتاعا سالدى.

«قاسىم-جومارت توقاەۆتىڭ پرەزي­دەنت كەزىندەگى جۇمىسىنىڭ نەگىزگى قورى­تىندىلارى: 2019-2022 جىلدار» بايانداماسىندا پرەزيدەنتتىڭ ءومىربايانى، قىزمەتى مەن باعدارلامالارى، توتەنشە جاع­دايلار كەزىندەگى ءىس-قيمىلدارى، سىرت­قى ساياساتتاعى قىزمەتتەرى قامتىلسا، «2022 جىلعى پرەزيدەنتتىك سايلاۋ» بايانداما­سىندا رەسپۋبليكاداعى پرەزيدەنتتىك ساي­لاۋ­دىڭ تاريحى مەن رەتتەلۋى، كانديدات­تار­دى ۇسىنۋ، ساياسي پلاتفورمالارى، ۇگىت-ناسيحات ناۋقاندارى، داۋىس بەرۋ ناتي­جەلەرى مەن ساياسي بولجامدار زەردەلەنگەن.

«ساراپتاما بارىسىندا بيىلعى ساي­لاۋ كامپانياسى قانداي جاعدايدا ءوتتى دەگەن باس­تى سۇراققا جاۋاپ بەرەدى. قاڭتار وقيعاسى، الەمدىك ينفلياتسيا، رەسەي مەن ۋكراينا اراسىنداعى قاقتىعىستىڭ قازاقستانداعى ساياسي جاعدايعا اسەرىن باسشىلىققا الا وتىرىپ، ەلىمىزدەگى سايلاۋدىڭ قالىپتى جاعدايدا وتكەنىنە تالداۋ جاسادىق. سايلاۋ بارىسىندا زاڭ بۇزۋشىلىقتار تىركەلگەن جوق، اكىمشىلىك قىسىم جاسالمادى. مۇنىڭ ءوزى – ۇلكەن ناتيجە. دەگەنمەن دە بۇل جەردە ەلەكتوراتتىڭ تاڭداۋى قانداي جاعدايدا دا كوپ رەسۋرستى كانديداتقا تۇسەتىنى بەلگىلى. بۇل جەردە ماتەريالدىق جاعداي عانا ەمەس، تانىمالدىق، حاريزما، ساياسي تاجىريبە باسشىلىقا الىنىپ وتىر. سايلاۋدا ق.توقاەۆقا ەلەكتوراتتىڭ باسىم داۋىس بەرىپ وتىرعانى، كانديداتتىڭ الداعى ءىس-قي­مىلدارىنان، ەلدىڭ بولاشاعىنا قاتىس­تى كوكەيكەستى ماسەلەلەردە كوشباس­شى بولا الادى دەگەن سەنىمنەن تۋىندا­دى. پرەزيدەنتتىك مەرزىمدى جەتى جىلعا بەل­گىلەي وتىرىپ، ءوز بيلىگىن شەكتەۋمەن قاتار ساياسي باتىل قادامدار جاساۋ­عا شەشىم قابىلداۋى دا رەسپۋبليكا جۇر­ت­شى­لىعىنىڭ الداعى كۇندەرگە قاتىستى سەنىمىمەن بايلانىس­تى»، دەپ اتاپ ءوتتى ساراپشى
م.شيبۇتوۆ.

جاس ساراپشىلار زەرتتەۋلەرىنەن اڭعار­عا­نىمىزداي، كانديداتتاردىڭ باعدار­لا­ماسىندا نازار اۋدارىلماعان قوعامدىق ماڭىزى بار ماسەلەلەر بولدى. ساراپشى اينۇر باقىتجانوۆانىڭ ايتۋىنشا، كانديدات ق.توقاەۆتىڭ باعدارلاماسىندا عانا مۇگەدەكتىگى بار ادامدارعا قاتىستى ناقتى باعىتتار ايتىلىپ، قوعامنىڭ بارلىق الەۋمەتتىك توبىنا قاتىستى ماسەلەلەر كوتەرىلدى. «مىسالى، مۇگەدەكتىگى بار ازاماتتاردىڭ جوعارى وقۋ ورىندارىندا ءبىلىم الۋى، جۇمىسپەن قامتۋ، ادىلەتتى قوعام قۇرۋ جاعدايىندا ولارعا دا تولىققاندى جاعداي جاساۋ قاجەت ەكەنى بەلگىلى. سونىمەن قاتار كانديداتتاردىڭ باعدارلاماسىن زەرتتەۋ كەزىندە قوعامنىڭ ءالسىز توپتارىنىڭ نامىسىنا تيەتىن ءسوز تىركەستەرى قولدانىلعان. بۇگىندە تەڭ قوعامدى قالىپتاستىرۋ جاعدايىندا وڭىرلەر بويىنشا تۋىنداپ وتىرعان ماسەلەلەر دە جەتكىلىكتى»، دەيدى
ساراپشى.

جاس ساراپشىلار الداعى ۋاقىتتا پرەزيدەنتتىكتەن ۇمىتكەر بولعان كانديداتتار ءوز باعدارلامالارىندا ايتىلعان ماسەلەلەردىڭ جۇزەگە اسۋىنا مۇددەلى بولۋى قاجەت دەپ سانايدى. سوندىقتان دا بارلىق كانديداتتاردىڭ قوعامدى جاقسارتۋعا باعىتتالعان باعدارلاماسىنىڭ ورىندالۋ بارىسى باقىلانىپ، ساراپتاما جاسالادى.

جاس ساراپشىلار – اكبوپە ابىل­قاسىموۆا، الماس اۋبەكەروۆ، جومارت ءامىر­حانوۆ، ماديا تورەباەۆا، ساۋلە ابدۋاليەۆا، ستەپان شرامكو، ليليا مان­شينا، يلياس باقتىعاليەۆ، سونىمەن قاتار ءماتىندى ەنگىزۋ، قورىتىندىلاۋ جانە رەداكتسيالاۋ بويىنشا ايدار وماروۆ، باياندامالاردى اۋدارۋمەن اي­نۇر باقىتجانوۆا، ستەپان شرامكو مەن تي­مۋر ۇمبەتوۆ اينالىسىپ، ورىس، قازاق جانە اعىلشىن تىلدەرىندە دايىندالعان ساراپ­تامالىق قۇجاتقا ساياساتتانۋشى ما­رات شيبۇتوۆ رەداكتسيالىق ەتتى.

ايتا كەتكەن ءجون، جاس ساراپشىلار مەكتەبى بيىل ماۋسىم ايىندا ەلباسى اكادەمياسىنىڭ قولداۋىمەن اشىلىپ، ىرىكتەۋ تۋرىنا 2 مىڭنان استام ءوتىنىش جولدانعان. وسى كەزەڭدە ىرىكتەۋدەن وتكەن 12 ساراپشى ەلىمىزدەگى ساياسي-ەكونو­مي­كالىق، الەۋمەتتىك احۋالدى زەرتتەۋ جۇمى­سىن جۇرگىزدى. بۇل باعىتتاعى زەرتتەۋلەر الداعى ۋاقىتتا دا جالعاسادى. ال كەلەر جىلدان باستاپ الەۋمەتتىك ساراپشى­لار­دىڭ جاڭا توبى ىرىكتەلىپ، وقىتىلماق.

الماتى