ەاەو بولاشاق ءۇشىن قۇرىلدى

كەشە ورتالىق كوممۋنيكاتسيالار قىزمەتىندە وتكەن بريفينگتە رەسەيلىك ساراپشىلار قازاقستاندىق جۋرناليستەردىڭ بىرقاتار سۇراقتارىنا جاۋاپ بەردى. ساراپشىلار قاتا­رىن­دا رعا ەكونوميكا ينستيتۋتى پوست­كەڭەستىك ەلدەردىڭ ەكونوميكاسى دامۋىن زەرتتەۋ سەكتورىنىڭ باس­شىسى ەلەنا كۋزمينا, رف ۇكىمەتى جانىنداعى ساراپتامالىق ورتا­لىق­تىڭ ساراپتامالىق-عىلىمي جۇمىس­تاردى باقىلاۋ ءبولىمىنىڭ باسشىسى الەكساندر كونكوۆ, «ساياسي كونيۋنكتۋرا ورتالىعىنىڭ» ساراپتاماشىسى, ساياساتتانۋ عىلىمدارىنىڭ كانديداتى ەۆگەنيا ماحمۋتوۆا قاتىستى. ءۇش ساراپتاماشى ءوز تاراپتارىنان ەۋرازيالىق ەكونوميكالىق وداقتىڭ كوپشىلىك قىزىقتىرعان تۇستارىن تالداي اشىپ, پىكىرلەرىمەن ءبولىستى. قۇرىلعان ەۋرازيالىق ەكونوميكالىق وداقتىڭ بولاشاعىنا قاتىستى, سونداي-اق وداق شتابىنىڭ قارجىلىق جانە باسقا دا شتابتارىنىڭ ءۇش ەلدە ورنالاسۋىنا بايلانىستى قويىلعان سۇراقتارعا قاتىستى جاۋاپ بەردى. ەلەنا كۋزمينا وداققا كەز كەلگەن ەلدىڭ كىرۋىنە شەكارا اشىقتىعىن جەتكىزىپ, بۇل ماسەلەدە ەڭ الدىمەن پوستكەڭەستىك كەڭىستىكتەگى ەلدەردى ايتىپ ءوتتى. «جالپى ەاەو-عا ءتۇرلى فورماتتاردا كىرۋگە بولادى. ول ءۇشىن وداققا كىرۋگە مۇددەلى ەل ەكونوميكاسىن, قارجى جۇيەسىن دايىنداۋى ءتيىس. ەكىنشى جول, مەملەكەتتەر توبىمەن ەركىن ساۋدا ايماعى تۋرالى كەلىسىم. بۇل وتە پەرسپەكتيۆالى جول. وسىنداي كەلىسىمگە قول قويۋدى اياقتاۋ كەزەڭىندە ۆەتنام تۇر», دەدى ول. جالپى ساراپشىنىڭ پىكىرىنشە, وزگە مەملەكەتتەر تاراپىنان ەاەو اياسىنداعى ىنتىماقتاستىققا قىزىعۋشىلىق ارتۋدا. ال ا.كونكوۆ وزىنە باعىتتالعان رەسەيگە قاتىستى ساۋالعا وراي ەو مەن اقش قولدانىپ جاتقان ەكونوميكالىق شارالار ەاەو قىزمەتىنە ەش اسەر ەتپەيدى, دەپ جاۋاپ بەردى. ونىڭ ايتۋىنشا, ەاەو دسۇ ەرەجەلەرىنە سايكەس قالىپتاسقان. «ساياسي كونيۋنك­تۋرا ورتالىعىنىڭ» ساراپتاماشىسى, ساياساتتانۋ عىلىمدارىنىڭ كانديداتى ە.ماحمۋتوۆا «رەسەي ازاماتتارىنا قاتىستى سالىنىپ جاتقان ەكونوميكالىق سانكتسيالاردىڭ ماقساتتارىنىڭ ءبىرى – ەاەو ىشىندە تۇراقسىزدىق ەنگىزۋ, ەۋروپالىق ينۆەستورلار تاراپىنان وعان دەگەن سەنىمدى جويۋ. سوندىقتان ولاردىڭ ماڭىزىن اسىرا ايتپاس ەدىم, ەاەو-داعى كاسىپكەرلەردىڭ ءوزى وسى شارالاردى ەنگىزۋگە كۇدىكپەن قارايدى. سەبەبى جاعداي وسى سانكتسيالارعا جاۋاپ رەتىندە قولدانىلاتىن شارالارعا بايلانىستى بولادى», – دەپ ءتۇسىندىردى. ال ساراپشىلاردىڭ پىكىرىنشە, قارجىلىق رەتتەۋشى ورگاننىڭ الماتى قالاسىندا ورنالاسۋىنىڭ وزىندىك ءمانى بار. ويتكەنى, بۇل ەاەو-نىڭ ماڭىزدى فۋنكتسيالارىنىڭ ءبىرى بولىپ تابىلادى. ۆەنەرا تۇگەلباي, «ەگەمەن قازاقستان».