شىعىس قازاقستانداعى اۆتوموبيل جولدارىنىڭ جالپى ۇزىندىعى 5 265 شاقىرىمدى قۇرايدى. ونىڭ ىشىندە 1 238 كيلومەتر رەسپۋبليكالىق ماڭىزى بار كۇرە جول بولسا, 1 587 شاقىرىمى – وبلىستىق ماڭىزى بار تراسسا. ال اۋداندىق ماڭىزى بار جولدار 2 440 كيلومەتردى قۇرايدى. مىڭداعان شاقىرىم جولدى ۋاقتىلى تازالاپ ۇستاۋ وڭاي ەمەس دەيىن دەسەڭ, قار كۇرەيتىن تەحنيكالار جەتكىلىكتى سەكىلدى. الايدا التايدىڭ اۋا رايى وقتىن-وقتىن بورانداتىپ, بۇرقاسىنداتىپ تۇرادى. جالپى, جولدار جايىن ءباسپاسوز بريفينگىندە جولاۋشىلار كولىگى جانە اۆتوموبيل جولدارى باسقارماسى باسشىسىنىڭ جولداردى دامىتۋ ماسەلەلەرى جونىندەگى ورىنباسارى نۇربەك تۇراروۆ ايتىپ بەردى.
– وبلىستىق ماڭىزى بار جولدارعا «وبلشىعىسجول» جشس قىزمەت كورسەتەدى. ولاردا 119 بىرلىك قار تازالاۋ تەحنيكاسى بار. ومەش اسۋىندا, تارعىن, ەگىندىبۇلاق, ۇرانحاي اۋىلدارىندا 4 جىلىتۋ پۋنكتى بار. بارلىق وندىرىستىك ءۇي-جايلار مەن جىلىتۋ پۋنكتتەرىن قىسقى كەزەڭگە دايىنداۋ جۇمىستارى اياقتالدى, – دەپ اتاپ ءوتتى ن.تۇراروۆ.
شىعىس قازاقستان وبلىسى بويىنشا «قازاۆتوجول» رەسپۋبليكالىق ماڭىزى بار اۆتوموبيل جولدارىن پايدالانۋ ءبولىمىنىڭ باستىعى تانا ابدىكارىموۆا فيليالدا اۆتوموبيل جولدارىن قىستا كۇتىپ ۇستاۋ ءۇشىن 156 بىرلىك جول-قۇرىلىس تەحنيكاسى بار ەكەنىن ايتتى.
– قاجەت بولعان جاعدايدا 41 تەحنيكا تارتۋ ءۇشىن كەلىسىمشارتتار جاسالدى. وڭىردە جولاۋشىلاردىڭ باقىلاۋىندا ۇزىندىعى 125 شاقىرىم بولاتىن 142 قارلى ۋچاسكە بار. بۇل ۋچاسكەلەردە اۋا رايىنىڭ قيىن كەزەڭدەرىندە تاۋلىك بويى پاترۋلدەۋ ۇيىمداستىرىلادى. جولدا قانداي دا ءبىر وقىس جاعدايلار تۋىنداسا «قازاۆتوجول» ۇك اق-نىڭ بىرىڭعاي كولل-ورتالىعىنا 1403 قىسقا ءنومىرى بويىنشا, سونداي-اق 26-28-08, 8-777-535-89-08 نومىرلەرى بويىنشا ديسپەتچەرلەرگە قوڭىراۋ شالا الاسىز, – دەدى ت.ابدىكارىموۆا.
باسا ايتا كەتەرلىگى, 2022-2023 جىلدارداعى قىس ماۋسىمىندا جولداردى كۇتىپ ۇستاۋ ءۇشىن 460 مىڭ ليتر جانار-جاعارماي قاجەت. بۇگىنگى تاڭدا ونىڭ 182 مىڭ ءليترى دايىندالدى.
ن.تۇراروۆتىڭ ايتۋىنشا, 1 800 توننا كوكتايعاققا قارسى ماتەريالدار دايىندالدى. وسكەمەن – تارعىن – سامار جانە وسكەمەن – تاۋلى ءۇلبى – سەۆەرنوە اۆتوجولدارىندا كوشكىن قاۋپى بار 7 ۋچاسكە بەلگىلى. سوعان بايلانىستى اتالعان ۋچاسكەلەردە توتەنشە جاعدايلار ورىن الا قالسا, جەدەل شارالار قابىلداۋ ءۇشىن كومەكشى ءوندىرىس بازاسىندا ارنايى جاساق قۇرىلعان. وسى تۇستا ايتا كەتەرلىگى, وبلىستىق ماڭىزى بار جولداردا قانداي دا كەلەڭسىزدىك بولسا, «وبلشىعىسجول» جشس-نىڭ ديسپەتچەرلىك قىزمەتىنە, ياعني, 8-705-798-05-99 نومىرىنە قوڭىراۋ شالا الاسىز.
ءيا, قوڭىراۋ شالۋىن شالادى عوي, ناتيجە بولسا... ماسەلەن, 13 قاراشا كۇنى التاي – وسكەمەن اراسىنداعى كۇرە جول ۋاقتىلى تازارتىلمادى. جاۋعان قاردان كۇرە جولدا كولىكتەردىڭ كەپتەلىسى ورىن العان. قىس ماۋسىمىنا ساقاداي ساي بولسا, جۇرگىزۋشىلەر نەگە نارازى؟
– 13 قاراشا كۇنى كاتونقاراعايدان وسكەمەنگە جولعا شىقتىم. قار جاۋاتىنىن الدىن الا كۇن رايى بولجامىنا قاراپ وتىرىپ, ءبىلىپ وتىردىق. بورانداتقان جوق, قىلاۋلاپ قانا جاۋدى. بىراق سونىڭ ءوزىن كۇرەي المادى عوي. تراكتورلارىن ءتىزىپ قويىپ, «كورمە» وتكىزگەننەن نە پايدا؟! جولىمىز كۇرەلمەسە, – دەگەن ەدى جۇرگىزۋشى اسحات قاسەنوۆ.
بۇل عانا ەمەس, جولداردىڭ ۋاقتىلى كۇرەلمەي جاتقانىنا بايلانىستى پىكىر بىلدىرگەندەر كوپ. ءتىپتى العاشقى قار جاۋعان كۇندەرى وسكەمەن – شەمونايحا, وسكەمەن – ريددەر باعىتتارىندا جول-كولىك وقيعالارى دا ورىن الىپ ۇلگەردى. البەتتە, وقىس وقيعالار جۇرگىزۋشىلەردىڭ ابايسىزدىعىنان دا ورىن الۋى مۇمكىن. قالاي دەسەك تە, كۇرە جولدارعا كۇرەك ۋاقتىلى ءتيىپ تۇرسا ەكەن دەيمىز.
بريفينگ سوڭىندا سپيكەرلەر وبلىس جولدارىندا ۇزدىكسىز قاۋىپسىز جول قوزعالىسىن قامتاماسىز ەتۋ ماسەلەلەرى تۇراقتى باقىلاۋدا ەكەنىن اتاپ ءوتتى.
شىعىس قازاقستان وبلىسى
