«شاحتاداعى اپات D6 ارنايى اعىزۋ قاباتىن اشۋ كەزىندە بۇرىن بۇرعىلانعان درەناجدىق ۇڭعىمالاردان گاز بەن كومىر شاڭىنىڭ كوبەيۋىنە بايلانىستى كەنەتتەن بولعان گاز-ديناميكالىق قۇبىلىس سالدارىنان ورىن الدى. نەگىزگى سەبەپ - شاڭمەن بىرگە مەتاننىڭ كوپ ءبولىنۋى جانە تۇتانۋعا اكەلگەن ناتيجە بۇرعىلاۋ قوندىرعىسىنداعى №79 پيكەت ايماعىندا بۇرعىلاۋ شتانگاسىنىڭ مەتالل بەكىتكىشتەردىڭ ەلەمەنتتەرىنە ۇيكەلۋ كەزىندە ۇشقىننىڭ پايدا بولۋى بولد», دەدى مينيستر.
يۋري يلين بىرقاتار زاڭبۇزۋشىلىق انىقتالعانىن, سونىڭ ىشىندە جۇمىستىڭ قاناعاتتانارلىقسىز ۇيىمداستىرىلعانىن, ينجەنەرلىك-تەحنيكالىق پەرسونال تاراپىنان ءتيىستى باقىلاۋدىڭ جوقتىعىنان بولعانىن اتاپ ءوتتى.
لەنين اتىنداعى شاحتاداعى اپاتقا كىنالى 26 شەنەۋنىك, ونىڭ ىشىندە باسشىلىق قىزمەتتە جۇرگەن ەكى شەتەلدىك ازامات انىقتالدى.
بۇعان دەيىن حابارلاعانىمىزداي, 3 قاراشا كۇنى ساعات 03:00-دە «ارسەلورميتتال تەمىرتاۋ» اق كومىر دەپارتامەنتىنە قاراستى لەنين اتىنداعى شاحتادا اپات بولدى. اپات كەزىندە جەر استىندا 106 ادام بولعان. 101 ادام ەۆاكۋاتسيالاندى, بەس ادام قازا تاپتى, ءتورت ادام جاراقات الدى.
قر قىلمىستىق كودەكسىنىڭ 277-بابىنىڭ 3-بولىگى «تاۋ-كەن جۇمىستارىن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بويىنشا قىلمىستىق ءىس قوزعالدى. كەيىن «ارسەلورميتتال تەمىرتاۋ» اق كومىر دەپارتامەنتىنىڭ ديرەكتورى ارمان قالىقوۆ لەنين اتىنداعى شاحتاداعى اپاتتىڭ سەبەبىن اتادى. ونىڭ ايتۋىنشا, گاز درەناجدىق ۇڭعىمالاردى بۇرعىلاۋ كەزىندە مەتاننىڭ كەنەتتەن ءبولىنۋى ورىن العان.
