كەدەيلىكتىڭ شىنايى دەڭگەيىن اشىق مويىنداپ, الەۋمەتتىك سالانى قورعاۋعا بۇرىن-سوڭدى بولماعان قارجى ءبولدى. جاڭا جۇمىس ورىندارىن اشىپ, ميلليونداعان ادامنىڭ, ونىڭ ىشىندە مۇعالىم, دارىگەر, الەۋمەتتىك, مادەنيەت, ونەر, سپورت جانە مۇراعات قىزمەتكەرلەرىنىڭ جالاقىلارىن, ستۋدەنتتەردىڭ شاكىرتاقىسىن كوتەردى. زەينەتاقى قورىنداعى جيناقتالعان قارجىنى پاتەر الۋعا نەمەسە ەمدەلۋگە جۇمساۋعا رۇقسات ەتتى. نەسيەلىك امنيستيا جاسالدى, ماسىلدىق پەن ىسىراپشىلدىقتىڭ جولدارىن كەستى. سونىمەن قاتار دەنساۋلىق ساقتاۋ ماسەلەلەرىنە ەرەكشە ءمان بەرىپ, مەديتسينالىق ساقتاندىرۋ جۇيەسىنە قوسىمشا ميللياردتاعان قارجى بولگىزدى.
قاڭتار وقيعاسىنان كەيىن ىشكى ساياسي جاعداي كۇرت وزگەردى. جاڭا ۇكىمەت قۇرىلدى. تاۋەلسىزدىكتىڭ 30 جىلىندا ەلدىڭ بايلىعى تەك 162 ادامنىڭ قولىنا شوعىرلانعانىن ەسكەرە وتىرىپ, پرەزيدەنت «الدىمەن ەكونوميكا, سودان كەيىن ساياسات» دەگەن ۇستانىمدى «ساياسي مودەرنيزاتسياسىز ەكونوميكالىق رەفورمالار مۇمكىن ەمەس» دەگەن قاعيداتقا اۋىستىردى. بيلىكتىڭ ءۇش تارماعىنىڭ تيىمدىلىگىن ارتتىرۋدى كوزدەيتىن «كۇشتى پرەزيدەنت-ىقپالدى پارلامەنت-ەسەپ بەرەتىن ۇكىمەت» دەپ اتالعان رەفورمانى جۇرگىزۋدى قولعا الدى.
كادرلىق رەزەرۆ قۇردى. سىبايلاستىق پەن جەمقورلىققا قارسى كۇرەستى كۇشەيتتى. مەملەكەتتىك كاپيتاليزمنەن جانە مەملەكەتتىڭ ەكونوميكاعا شەكتەن تىس ارالاسۋىنان باس تارتۋدى ۇسىندى. سايلاۋ جۇيەسىن وزگەرتتى. پرەزيدەنتتىڭ بارلىق پارتيادان بويىن اۋلاق ۇستاۋ كەرەكتىگىن مالىمدەپ, «Amanat» پارتياسىنىڭ جەتەكشىلىگىن ءماجىلىس توراعاسىنا تاپسىردى. ەل قاۋىپسىزدىگى مەن ازاماتتاردىڭ قۇقىقتارىن قورعاۋعا, كورشى جانە الپاۋىت مەملەكەتتەرمەن قارىم-قاتىناستاردى نىعايتۋعا ايرىقشا كوڭىل ءبولدى. ەلىمىزگە ينۆەستيتسيا تارتۋدىڭ, ەكسپورتتىق تاۋارلاردى تاسىمالداۋدىڭ جاڭا جولدارىن تاپتى. ەلدەن زاڭسىز شىعارىلعان كاپيتالدى قايتارۋ باستالدى, ولاردى ءتيىمدى پايدالانۋ ءۇشىن قورلار اشتى. بوس جاتقان جەرلەر مەن جايىلىمدار مەملەكەت مەنشىگىنە قايتارىلا باستادى.
ەندىگى باستى قادام – جازدا وتكەن جالپىحالىقتىق رەفەرەندۋمنىڭ شەشىمىن ناقتى زاڭدار ارقىلى بەكىتىپ, ساياسي جانە ەكونوميكالىق جۇيەلەردى تۇبەگەيلى وزگەرتۋ. حالىقتىڭ ءومىر ءسۇرۋ دەڭگەيىن جاقسارتۋ ءۇشىن ۋاقىت پەن حالىقتىڭ جاڭا قولداۋى كەرەك ەكەنىن تۇسىنگەن ق.توقاەۆ وكىلەتتىگىن ەكى جىلعا قىسقارتىپ, مەرزىمنەن تىس پرەزيدەنتتىك سايلاۋ وتكىزۋدى, كەلەسى پرەزيدەنتىڭ وكىلەتتىگىن ءبىر رەتتىك 7 جىل ەتۋدى ۇسىندى.
ق.توقاەۆتىڭ بۇل ۇسىنىسىن بارلىق ساياسي پارتيا قوعامدىق ۇيىم وكىلدەرى ءبىراۋىزدان قولداپ, حالىقتىق كواليتسيا قۇرىلدى. 20 قاراشادا وتكەن كەزەكتەن تىس پرەزيدەنت سايلاۋىندا ق.توقاەۆ جەڭىسكە جەتتى. سايلاۋدىڭ بارلىق دەموكراتيالىق تالاپتارعا ساي وتكەنىن حالىقارالىق, شەتەلدىك جانە وتاندىق بايقاۋشىلار مەن باق ءبىراۋىزدان مويىنداپ وتىر.
سايلاۋ ناتيجەسى حالقىمىزدىڭ قازىرگى اۋمالى-توكپەلى زاماندا ق.توقاەۆتىڭ اينالاسىنا توپتاسىپ, سەنىم ءبىلدىرىپ, ونىڭ ساياساتى مەن جۇرگىزىپ جاتقان رەفورمالارىن قولدايتىنىن جانە جاڭا ءداۋىردىڭ باستالعانىن كورسەتەدى. بۇل قولداۋ ەلىمىزدى ەلەۋلى بيىكتەرگە باستايدى دەپ سەنەمىز.
ەرجان يساقۇلوۆ,
گەنەرال-مايور, ساياسي عىلىمدار دوكتورى
