اۋداندىق گازەت كوشىپ-قونىپ ءجۇر...

وبلىستاعى ماي اۋدانى كە­زىن­دە سەمەي پوليگونى زاردابىن كوردى. ءالى سىزى كەتە قويعان جوق. ءانشى بايعابىل جىلقىباەۆ, ءارتىس شاحان مۋسين, عالىمدار مەيىرحان, جابايحان ابدىلديندەر تۋعان جەر. اۋىل-اۋىلدارى ءان مەن كۇيدىڭ ورتاسى, اقىن-جازۋشى, جىرشىلارى از ەمەس. سىرىن بۇگىپ, قالماق قىرىلعان, اقشيمان تاۋلى-دالا­ قۇپياسى جاتىر. مالايسارى اۋى­لىندا كىل كوكپارشى جىگىتتەر تۇرادى. وسى اۋىلداردا تۇراتىن ورىس-نەمىسىڭنىڭ ءوزى قازاقشادان جاڭىلدىرادى. ال اۋداندىق «شامشىراق» گازەتىنىڭ 70 جىلدىق تاريحى بار. اكىمدىك كوڭىل اۋدارا قويماعان با, قازاق گازەتىنىڭ عۇمىرلى تاريحى بىلتىر اتاۋسىز قالدى. ءتىپتى, رەداكتسيانىڭ تۇراق­تى عيماراتى دا جوق, اندا-مىن­دا كوشىپ قونىپ جۇرەدى. قازىر اۋدان ورتالىعىنداعى مادەنيەت ءۇيى­نىڭ ءبىر بولمەسىنە كەلىپ, پانا تاۋىپتى. جولساپارعا بارعاندا ءارىپ­تەستەرىمىزدىڭ «كوشپەلى رەداكتسيا­لارىن» كورگەنبىز. اپاتتى جاع­داي­دا تۇرعان عيماراتتا ەرىكسىز «زاڭ­سىز» تۇردە جۇمىس جاسايدى. وبلىستىق ىشكى ساياسات باسقار­ماسى, اۋداندىق گازەتتەردىڭ جاع­دايىن جاقسارتامىز دەگەن اتى ءدۇر­كىرەگەن «ەرتىس» حولدينگى, اۋدان­ باسشىلىعى «شامشىراق» گازە­تىنىڭ جابىلۋعا شاق قالعانىن, رەداكتسياعا عيمارات, تەحنيكالىق قۇرالدار, كولىك قاجەت ەكەنىن ءبىل­مەي­ مە؟ كورىپ-بىلە وتىرا, اۋداندىق گازەتتىڭ تاعدىرىنا بەي-جاي قاراپ وتىر. رەداكتسيادا جۇمىس جاسايتىن اينالدىرعان ءۇش-ءتورت ادام. ەكى ءتىلشى بار. ءتىلشى جىگىت مەيرامبەك قىزىر باۋىرىمىزدىڭ ايتۋىنشا, «شامشىراقتىڭ» باسىندا قانداي قيىندىق بولسا دا, رەداكتسيا جۇكتەرىن كوتەرىپ كوشىپ-قونىپ جۇرسە دە گازەت شىقپاي قالعان بىردە-ءبىر كۇن بولماپتى. جوعارىدا اتى اتالعان جەرگىلىكتى بيلىك ورىندارىنا بۇل سىن, ۇيات. اۋدان اكىمى اسحات جارماعانبەتوۆ اۋدانعا كەلگەن كۇنى-اق, اۋدان اكىمدىگىنىڭ تىنىس-تىرشىلىگىن جازاتىن گازەت ۇجىمىنا جاعداي جاساۋى كەرەك ەدى. وزگە تىلدە ءبىلىم العان, وزگە تىلدە سويلەيتىن باۋىرجان قاپەنوۆ, رۋسلان بيليالوۆتار اۋداندىق گازەتكە قامقورلىق جاساعاندارى مەملەكەتتىك ءتىل – مارتەبەلى انا ءتىلىمىزدى قۇرمەتتەگەنىمىز ەكەنىن ءالى تۇسىنبەي ءجۇر مە سوندا؟.. فاريدا بىقاي, «ەگەمەن قازاقستان». پاۆلودار وبلىسى, ماي اۋدانى.