تۇركىستان ءوڭىرى تۇرعىندارىنىڭ ساياسي ناۋقانعا دەگەن بەلسەندىلىگى جوعارى بولدى. وبلىس بويىنشا 919 سايلاۋ ۋچاسكەسى بار. ونىڭ 50-ءى وبلىس ورتالىعىندا ورنالاسقان. سايلاۋ ۋچاسكەلەرىنىڭ 893-ءى ازاماتتاردىڭ تۇرعىلىقتى جەرى بويىنشا جانە 26-سى ۋاقىتشا بولۋ ورىندارىنداعى سايلاۋ ۋچاسكەسى. تاڭ سارىدەن كەلىپ تاڭداۋ جاساعانداردىڭ اراسىندا جاستار دا, قاريالار دا از ەمەس. مىسالى, سايرام اۋدانىندا ەڭ بەلسەندى داۋىس بەرۋشىلەردىڭ ءبىرى 100 جاستاعى سادىق قۋاتبەكوۆ اقساقال №560 سايلاۋ ۋچاسكەسىنە نەمەرەلەرىن ەرتە كەلىپتى.
«ەلىمنىڭ بولاشاعىنا بەيجاي قاراي المايمىن. سوندىقتان ءاربىر سايلاۋدان قالماي داۋىس بەرىپ كەلەمىن. پرەزيدەنتتى تاڭداۋ جارقىن بولاشاقتى تاڭداۋ دەپ بىلەمىن», دەيدى عاسىر جاساعان قاريا.
جالپى اۋدان بويىنشا 133 065 داۋىس بەرۋشى بار. ولاردىڭ باسىم بولىگى تۇسكە دەيىن ءوز تاڭداۋىن جاساپ ۇلگەردى.
سونداي-اق كەنتاۋ قالاسىندا 96 جاستاعى ەكىنشى دۇنيەجۇزىلىك سوعىستىڭ ارداگەرى بادان تورەباەۆ سايلاۋ ۋچاسكەسىنە تاڭ سارىدەن كەلگەن. قاريانىڭ بەلسەندىلىگى كوپشىلىكتى ءتانتى ەتتى. اقساقال داۋىس بەرگەن سوڭ, اللادان ەلدىڭ اماندىعىن تىلەپ, باتا بەردى.
وبلىس اكىمى دارحان ساتىبالدى تۇركىستان قالاسىنداعى №133 سايلاۋ ۋچاسكەسىنە كەلىپ داۋىس بەردى. تۇركىستان قالاسىندا 5 سايلاۋ ۋچاسكەسىندە داۋىس بەرۋ كۇنى تىركەۋدە جوق ازاماتتاردى انىقتاۋ جانە تىركەۋ بويىنشا قىزمەتتەر ۇيىمداستىرىلعان.
ايتا كەتەلىك, سايلاۋ كۇنى وبلىس بويىنشا 90 نارەستە دۇنيە ەسىگىن اشتى. وبلىستىق قوعامدىق دەنساۋلىق باسقارماسىنىڭ حابارلاۋىنشا, 46 ەر بالا, 44 قىز, ونىڭ ىشىندە 2 ەگىز دۇنيەگە كەلدى. ەگىزدەردىڭ ءبىرى – قازىعۇرت اۋدانىندا, ەكىنشىسى تۇلكىباس اۋدانىندا تۋعان. دارىگەرلەردىڭ حابارلاۋىنشا, انالار مەن سابيلەردىڭ دەنساۋلىعى جاقسى.
تۇركىستان وبلىسى
